كوكتەمگى اسكەر قاتارىنا شاقىرۋ ناۋقانى بارىسىندا الماتى وبلىسىنان 1991-2000 جىلى تۋىلعان 1800-دەن استام ازاماتتى اسكەر قاتارىنا شاقىرۋ جوسپارلانعان. بۇگىنگى كۇنى 1500-گە جۋىق شاقىرىلۋشى اسكەر قاتارىنا الىنىپ، ءوز بورىشتارىن وتەۋگە كىرىسىپ تە كەتتى.

الماتى وبلىسى قورعانىس ىستەرى جونىندەگى دەپارتامەنتىنەن كەزەكتى 50 ۇلان وتان الدىنداعى بورىشىن وتەۋ ءۇشىن قاراعاندى قالاسىندا ورنالاسقان ق ر ءىىم ۇلتتىق ۇلانعا قاراستى 5451 اسكەري بولىمىنە سالتاناتتى تۇردە اتتاندىرىلدى. سالتاناتتى شاراعا قورعانىس ىستەرى جونىندەگى دەپارتامەنتىنىڭ باسشىلىعى، قارۋلى كۇشتەرىنىڭ ارداگەرلەرى، ق ر ءىىم ۇلتتىق ۇلاننىڭ وكىلدەرى، سونداي-اق اسكەرگە قابىلدانۋشىلاردىڭ اتا-انالارى مەن تۋعان-تۋىستارى قاتىسىپ، اق تىلەكتەرى مەن جىلى لەبىزدەرىن ءبىلدىردى.

الماتى وبلىسى قورعانىس ىستەرى جونىندەگى دەپاراتمەنتى باستىعىنىڭ مىندەتىن ۋاقىتشا اتقارۋشى پودپولكوۆنيك تالعات داۋلەتحانوۆ اسكەرگە اتتانۋشى ۇلاندارعا قۇرمەت كورسەتۋ ماقساتىندا «شاقىرىلۋشىلار كۇنى» اتتى اسكەري-پاتريوتتىق اكسياسىن ءداستۇرلى تۇردە وتكىزىلەتىنىن جەتكىزدى.

- الماتى وبلىسىنان اسكەر قاتارىنا الىنعان جاستار بۇگىندە قارۋلى كۇشتەردىڭ ءار سالاسىندا اسكەري بورىشتارىن ابىرويمەن وتەپ كەلەدى. اسكەري ءبولىم كومانديرلەرى جەتىسۋ جاستارىنىڭ جىگەرى مەن قايراتتىلىعىنا، دەنە دايارلىعىنا، اسكەري تەحنيكانى مەڭگەرۋدەگى زەرەكتىگىنە تاڭدانىس ءبىلدىرىپ جاتادى. وتان الدىنداعى بورىشتى ادال اتقارىپ، ەلگە ابىرويمەن امان-ەسەن ورالۋلارىنا تىلەكتەسپىن، - دەپ اتاپ ءوتتى پولكوۆنيك تالعات داۋلەتحانوۆ.

ۇستىمىزدەگى جىلدىڭ ناۋرىز ايىنان باستالعان كوكتەمگى اسكەر قاتارىنا شاقىرۋ ناۋقانى ماۋسىم ايىنىڭ سوڭىنا دەيىن جالعاسادى. الماتى وبلىسىنان شاقىرىلعان جاستار ق ر ۇقك شەكارا قىزمەتىنىڭ، ق ر مەملەكەتتىك كۇزەت قىزمەتىنىڭ، ق ر قارۋلى كۇشتەرىنىڭ، ق ر ءىىم ۇلتتىق ۇلاننىڭ اسكەري بولىمدەرىنە اسكەري بورىشتارىن وتەۋگە اتتاندىرىلۋدا.

جەرگىلىكتى اسكەري باسقارۋ ورگاندارىنىڭ، دەنساۋلىق ساقتاۋ جانە قۇرىلىمدىق كۇشتەردىڭ وكىلدەرىنەن قۇرالعان شاقىرۋ جانە مەديسينالىق كوميسسياسى اسكەرگە قابىلدانۋشىلاردى تۇبەگەيلى تەكسەرۋدەن وتكىزەدى. كوميسسيا مۇشەلەرى ءار ۇمىتكەردى دارا قاراستىرىپ، العان ءبىلىمىن، ماماندىعىن، وتباسى جاعدايىن، قىزىعۋشىلىقتارىن، سپورتتاعى جەتىستىكتەرىن نازارعا الا وتىرىپ، دەنساۋلىق جاعدايىنا قاراي مەرزىمدى اسكەر قاتارىنا قابىلداۋ تۋرالى شەشىم شىعارادى.