14 ناۋرىز-14 ماۋسىم ارالىعىندا «جاس وتان» «ەلباسىنىڭ بەس باستاماسى» تاقىرىبىندا ۆيدەو-بايقاۋ جاريالادى. بىرنەشە كۇن بۇرىن بايقاۋ جەڭىمپازدارىنىڭ ەسىمدەرى بەلگىلى بولدى. سولاردىڭ ىشىندە استانا قالاسىنىڭ ىشكى ىستەر دەپارتامەنتىنىڭ مامانى ەربولات ورىمبايەۆ تا بار. جەڭىمپازدار ماراپاتتاۋ راسىمىنە استاناعا ەلىمىزدىڭ باسقا قالالارىنان كەلىپ جەتتى.

بايقاۋعا الماتى قالاسىن قاتىسقان، قالاداعى جوعارى وقۋ ورىندارىنىڭ بىرىندە ديزاين پانىنەن ساباق بەرەتىن ايجۇلدىز ابىكەيەۆا 1-ورىن مەن Canon 7d Mark فوتوكامەراسىن جەڭىپ الدى. 2-ورىننىڭ جانە ەلەكتروندى ستەديكامنىڭ يەگەرى قاراعاندى مەملەكەتتىك ۋنيۆەرسيتەتىنىڭ 1-كۋرس ستۋدەنتى بەردىبەك قازىعۇلوۆ اتاندى. ول ماڭعىستاۋ وبلىسىنىڭ بورانقۇل اۋىلىنان «سەرپىن» باعدارلاماسى ارقىلى وقۋعا ءتۇسىپ، «اقپاراتتىق تەحنولوگيالار» ماماندىعى بويىنشا ءبىلىم الۋدا. استانا قالاسىنىڭ ىشكى ىستەر دەپارتامەنتىنىڭ مامانى ەربولات ورىمبايەۆ جوعارى وقۋ ورىندارىندا جاتاقحانالاردىڭ جەتىسپەۋشىلىگى تۋرالى الەۋمەتتىك روليك ءتۇسىرىپ، 3-ورىنعا بەرىلگەن DJI Osmo كامەراسىن ۇتىپ الدى. ال دينارا قۇرمانعوجينا ۇسىنعان جۇمىس ارنايى جۇلدەگە لايىق دەپ تانىلىپ، GoPRo ەكشن-كامەراسىن سىيعا الدى. الايدا دينارا جاقىن كۇندەرى رەلستەن شىعىپ كەتكەن استانا-الماتى باعىتىنداعى پويىزدا بولعاندىقتان، استانا قالاسىنا كەلۋگە مۇمكىندىگى بولمادى. ول ءقازىر ءوزىن جاقسى سەزىنەتىنىن جانە جەڭىسىنە وتە قۋانىشتى ەكەنىن جەتكىزدى. ۇيىمداستىرۋشىلار جەڭىمپازدارعا شىعارماشىلىق تابىس تىلەپ، سىيلىققا العان تەحنيكالارمەن تۇسىرىلگەن ساپالى ۆيدەولاردى كۇتەتىندەرىن جەتكىزدى.

بايقاۋدىڭ باستى ماقساتى – جاستاردى ەلباسى جاريالاعان الەۋمەتتىك باستامالارمەن، سولاردىڭ ىشىندە، تۇرعىن ءۇي باعدارلاماسى، ءبىلىم بەرۋ گرانتى، سالىق cالۋ ماسەلەسى، شاعىن جانە ورتا بيزنەستى دامىتۋ سىندى باستامالارمەن تانىستىرۋ.