قازاقستاننىڭ مۇناي اعىنى ەلوردادان تىكەلەي باسقارىلاتىن بولادى. بۇگىن «سامۇرىق-قازىنا» ءۇاق» اق باسقارماسىنىڭ ءتوراعاسى احمەتجان ەسىموۆ «قازترانسويل» اكسيونەرلىك قوعامىنىڭ جاڭا باس ديسپەچەرلىك باسقارماسىن ىسكە قوستى. مۇندا ماگيسترالدىق مۇناي قۇبىرلارى جۇيەسى بويىنشا مۇناي اعىنىن باسقارۋ ورتالىقتاندىرىلعان جانە سيفرلاندىرىلعان.

«قازترانسويل» اق مۇنايدى قابىلداۋدى جانە تاپسىرۋدى، «اقتاۋ» پورتى مەن كومپانيانىڭ تەمىرجول ەستاكادالارىندا مۇناي قۇيۋدى باس ديسپەچەرلىك باسقارماسىنان ونلاين رەجيمدە قاداعالايتىن بولادى. وسى ارقىلى  «قازترانسويل» اعىندى ديسپەچەرلىك باقىلاۋ جانە باسقارۋ SCADA جۇيەسىن ەنگىزۋ بويىنشا جوبانى تولىق جۇزەگە اسىردى. 

 «قازترانسويل» كومپانياسىنداعى سيفرلىق تەحنولوگيالار قازاقستاندىق مۇنايدى ەلىمىزدىڭ مۇناي وندەۋ زاۋىتتارىنا جەتكىزۋدى، قارا جانە بالتىق تەڭىزدەرىنىڭ پورتتارى ارقىلى قىتايعا جانە وزبەكستانعا ەكسپورتتاۋدى باسقارۋعا، سونداي-اق رەسەيلىك مۇنايدى قحر مەن وزبەكستانعا ترانزيتتەۋگە جاڭا مۇمكىندىكتەر بەرەدى.

«قازترانسويل» اق-داعى  ديسپەچەرلىك باسقارمانىڭ بۇرىنعى قۇرىلىمى ءتورت دەڭگەيلى ساتىدان تۇراتىن: جەرگىلىكتى ديسپەچەرلىك پۋنكتىلەر (جدپ)، اۋداندىق ديسپەچەرلىك پۋنكتىلەر، ورتالىق ديسپەچەرلىك پۋنكتىلەر جانە استاناداعى باس ديسپەچەرلىك باسقارما. قازىرگى ۋاقىتتا قۇرىلىمدا تەك جدپ مەن بدب عانا قالدى، ياعني 2 دەڭگەي وڭتايلاندىرىلدى.

سونىمەن قاتار، «سامۇرىق-قازىنا» قورىنىڭ باسشىسى احمەتجان ەسىموۆ قايتا قالپىنا كەلتىرۋ جۇمىستارى جۇرگىزىلگەن اقتوبە وبلىسىنداعى «كەڭقياق» باس مۇناي ايداۋ ستانساسىن سيفرلى تەحنولوگيالار ارقىلى  باس ديسپەچەرلىك باسقارمادان ىسكە قوستى.

«كەڭقياق» باس مۇناي ايداۋ ستانساسىنىڭ ىسكە قوسىلۋى قازاقستاندىق مۇنايدى قحر-عا ەكسپورتتاۋ كولەمىن ۇلعايتۋعا، باتىس قازاقستان مۇنايىن وتاندىق موز-دەرگە تاسىمالداۋدى قامتاماسىز ەتۋگە  مۇمكىندىك بەرەدى.