جۇگىرۋ استانانىڭ 20 جىلدىق مەرەيتويىنا وراي ۇيىمداستىرىلدى، دەپ xابارلايدى اتىراۋ وبلىستىق وڭىرلىك كوممۋنيكاسيالار قىزمەتى.
تۇنگى مارافوننىڭ جالپى قاشىقتىعى - 5 شاقىرىم. قاتىسۋشىلار مۇز سارايى جانىنان جۇگىرۋدى باستاپ، ورتالىق كوپىر ارقىلى وبلىستىق اكىمدىككە دەيىنگى جولدى جۇگىرىپ ءوتتى.
«-اتىراۋ قالاسىندا مارافون جىلىنا ءبىر رەت وتكىزىلەدى. ال تۇنگى مارافوندى العاش رەت قالانىڭ تۇرعىندارى مەن قوناقتارىنىڭ قىزىعۋشىلىعىن ارتتىرۋ ءۇشىن ۇيىمداستىردىق. بۇل، جاستاردىڭ سپورتپەن تۇراقتى اينالىسۋىنا ۇلكەن مۇمكىندىك بەرەدى. الداعى ۋاقىتتا بالالار اراسىندا جانە كۇزگى مارافون وتكىزۋ جوسپاردا بار»، - دەيدى «Atyrau Marathone-2018» ۇيىمداستىرۋ كوميتەتىنىڭ ۆيسە-پرەزيدەنتى يۋريي پونوماريەۆ.
مارەگە العاش بولىپ مارافونىنىڭ تۇراقتى قاتىسۋشىسى، قالا تۇرعىنى بازارباي داۋتالييەۆ كەلىپ، جەڭىمپاز مەدالىن موينىنا تاقتى.
بارلىق قاتىسۋشىلارعا جارىس الدىندا نەون بىلەزىكتەر، ال مارەگە جەتكەن سوڭ ەستەلىك مەدالدار بەرىلدى. سونداي-اق، مارافوننىڭ جۇگىرۋشىلەرى سپورتتىق كوستيۋمدەرىن مەرەكەنىڭ جالپى اتموسفەراسىن كورسەتكەن جارقىن ەلەمەنتتەرمەن -گيرلياندتار، نەون شامدارمەن بەزەندىردى.
العاش كەلگەن ۇزدىك 10 قاتىسۋشىعا ۇيىمداستىرۋشىلار اتىنان ارنايى سىيلىقتار تابىس ەتىلدى.
ەندى اتىراۋلىقتار كۇزگى مارافونعا دايىندالادى.
