اتىراۋدا بيزنەس سۋبەكتىلەرىنىڭ ىرگەلەس اۋماقتاردى اباتتاندىرۋ ەرەجەسىن بۇزۋىن انىقتاۋ بويىنشا رەيدتىك ءىس-شارالار باستاۋ الدى، دەپ حابارلادى اتىراۋ قالاسى اكىمدىگىنىڭ باسپا ءسوز قىزمەتى.
پروفيلاكتيكالىق رەيد بۇگىن، 12 شىلدەدە باستالدى. شوب سۋبەكتىلەرى تازالىق پەن ءتارتىپتى ساقتاۋ، سونداي-اق جاسىل كوشەتتەردى كۇتىپ-باپتاۋ جانە قورعاۋ بويىنشا تەكسەرىلدى.
ولاردىڭ اراسىندا دۇكەندەر، سۋپەرماركەتتەر، ساۋدا ۇيلەرى مەن قوعامدىق تاماقتاندىرۋ ورىندارى بار.
تەكسەرۋشى توپتىڭ قۇرامىنا اتىراۋ قالالىق كاسىپكەرلىك ءبولىمىنىڭ، سونداي-اق قۇقىق قورعاۋ ورگاندارىنىڭ ماماندارى كىردى. رەيدتىڭ العاشقى كۇنى 5 بيزنەس وبەكتىسى تەكسەرىلدى. ولاردىڭ كوپشىلىگىندە بۇزۋشىلىقتار انىقتالدى.
- قالا اكىمىنىڭ قالانى ارالاۋى بارىسىندا كاسىپكەرلەردىڭ ىرگەلەس اۋماقتى اباتتاندىرۋ جانە كۇتىپ-ۇستاۋ ەرەجەلەرىن ساقتاماۋى بويىنشا وتە كوپ بۇزۋشىلىقتار انىقتالعان بولاتىن. زاڭدى تۇلعالارعا انىقتالعان بۇزۋشىلىقتاردى جويۋ جونىندە 100-دەي ۇيعارىم بەرىلدى. بۇگىنگى كۇنى بىرنەشە كاسىپكەرگە اۋماعىندا تۇرمىستىق جانە قۇرىلىس قالدىقتارىنىڭ بولعانى، ىرگەلەس جەر ۋچاسكەسىن ءوز بەتىمەن يەلەنىپ العانى، اۋماعىنىڭ سىرتقى ءتۇرىنىڭ تالاپقا ساي بولماعانى ءۇشىن ايىپپۇلدار سالىندى. كەيبىر زاڭدى تۇلعالارعا كەمشىلىكتەردى جويۋ تۋرالى ەسكەرتۋلەر جاسالدى، - دەدى اتىراۋ قالالىق كاسىپكەرلىك جانە تۋريزم ءبولىمىنىڭ باسشىسى رۋسلان داۋلەتوۆ.
وسىعان دەيىن اتىراۋ قالاسىنىڭ اكىمى اليمۇحاممەد قۇتتۇمۇرات ۇلى وبلىس ورتالىعىنىڭ بىرنەشە ىقشام اۋدانىن تەكسەرىپ، قاراماعىنداعىلارعا قوزعالىس كوپ جول قيىلىستارىن جەڭىلدەتۋ، سونداي-اق قالا ورتالىعىنداعى قوقىس پەن قۇرىلىس قالدىقتارى ماسەلەلەسى، تۇرعىن ۇيلەردىڭ قاسبەتتەرىندەگى اقاۋلاردى جويۋ جانە جول جيەگىندەگى يەسىز جەر ۋچاسكەلەرىن كوركەيتۋ بويىنشا ءبىرقاتار ناقتى تاپسىرمالار بەرگەنىن ەسكە سالامىز.
- ءبىز قالا تۇرعىندارىن تازالىق ساقتاۋ مادەنيەتىنە ادەتتەندىرۋىمىز قاجەت. ءبىرىنشى كەزەكتە – قالانى تازالايتىن كوممۋنالدىق قىزمەتتەردىڭ جۇمىسىن كۇشەيتۋ كەرەك، سوڭعى ۋاقىتتا تۇرعىندار ءبىزدىڭ اتىمىزعا كوپتەگەن رەنىشتەر ءبىلدىرىپ جاتادى. ەكىنشىدەن – كاسىپكەرلەردى وزدەرىنىڭ ىرگەلەس اۋماقتارىن كورىكتەندىرۋگە، ۋچاسكەلەرىندەگى ەسكى، قيسايعان قورشاۋلاردى، قۇرىلىس قوقىستارىن، ارام شوپتەردى جويۋعا داعدىلاندىرۋ قاجەت. ۇشىنشىدەن – تۇرعىن ۇيلەردىڭ قاسبەتتەرىن جاقسارتۋ جانە جول جيەگىندەگى جەرلەردى، قالانى ءساندى، ەستەتيكالىق تۇرگە كەلتىرۋ قاجەت. وسىنىڭ بارلىعىن ءبىز اعىمداعى جىلدىڭ سوڭىنا دەيىن شەشۋىمىز قاجەت، - دەپ تاپسىرما بەردى اليمۇحاممەد قۇتتۇمۇرات ۇلى.
