باتىس قازاقستان وبلىسىندا ءۇش جىلدىڭ ىشىندە 45 ءىت-سىنىپ اشۋ كوزدەلسە، العاشقى 15ء-ى بيىلعى وقۋ جىلىندا پايدالانۋعا بەرىلمەك. جاڭا وقۋ جىلى قارساڭىندا ورال قالاسىنداعى ءۇش ءبىلىم ورداسىندا جانە ءار اۋدان ورتالىعىندا اشاتىن مۇنداي سىنىپتاردى جابدىقتاۋعا وبلىستىق بيۋدجەتتەن 49 ملن. 800 مىڭ تەڭگە قارجى ءبولىنىپ، قاجەتتى مامانداردىڭ ءبىلىمىن جەتىلدىرۋ كۋرسى ۇيىمداستىرىلدى.
جۋىردا ماحامبەت وتەمىسوۆ اتىنداعى بقمۋ بازاسىندا استانا قالاسىنداعى «STEM» اكادەمياسىنىڭ عىلىمي قىزمەتكەرلەرى قالالىق جانە اۋداندىق مەكتەپتەردىڭ وتىزدان استام مۇعالىمىنە وقۋشىلاردىڭ تەحنيكالىق پاندەرگە دەگەن قىزىعۋشىلىعىن وياتۋ تاسىلدەرىن، روبوتتەحنيكا جانە 3D مودەلدەۋ نەگىزدەرىن ۇيرەتتى.
– كۋرسقا قاتىسۋشىلاردىڭ ءبىلىم دەڭگەيى ءار ءتۇرلى بولدى. سوندىقتان ءار مۇعالىمگە جەكە-جەكە كوڭىل بولۋگە تىرىستىق. جالپى العاندا، جەرگىلىكتى مامانداردىڭ كوپشىلىگى Pascal باعدارلامالاۋ ءتىلىن قولدانادى ەكەن. قازىرگى تاڭدا بۇل جۇيە ءبىراز ەسكىردى، ونىڭ ورنىن زاماناۋي Stretch ءتىلى الماستىرا باستادى. مۇندا بالالار قىزىقتى مۋلتفيلم قاراپ وتىرىپ، قاجەتتى اقپاراتقا قانىعادى. سونىمەن قاتار 3D مودەلدەۋدە نىسانداردى قۇراستىرۋعا جانە وڭدەۋگە ارنالعان AutoDesk باعدارلاماسىندا كەزەڭ-كەزەڭىمەن جۇمىس ىستەۋدى ۇيرەتتىك، – دەيدى «STEM» اكادەمياسىنىڭ عىلىمي قىزمەتكەرى ءادىل اياپبەرگەن.
شىڭعىرلاۋ اۋدانىنداعى ل. قلىشيەۆ اتىنداعى جببوم ينفورماتيكا جانە روبوتتەحنيكا ءپانىنىڭ ءمۇعالىمى مارات جۇماعالييەۆتىڭ ايتۋىنشا، اۋىل بالالارىنىڭ روبوتتەحنيكاعا، سونىڭ ىشىندە لەگو قۇراستىرۋعا قىزىعۋشىلىعى جوعارى. جاس ۇستازدىڭ ويىنشا روبوتتەحنيكا ءپانى مەكتەپ پاندەرىنىڭ اراسىندا ەڭ ۇزدىك تورتتىككە ەنىپ ۇلگەرگەن. ءىت سالاسىنداعى زاماناۋي باعدارلامالار مەن كەڭ سۇرانىسقا يە ونىمدەر تۋرالى جاڭالىقتى وقۋشىلارعا ساپالى ءارى ۋاقتىلى ۇسىنۋ ءۇشىن ەڭ الدىمەن ءپان ءمۇعالىمى مىقتى، ءبىلىمدى بولۋى كەرەك. وسى ورايدا «نۇر وتان» پارتياسىنىڭ باستاماسىمەن ىسكە اسقان وقىتۋ كۋرسىنىڭ پايداسى وراسان زور.
جانىبەك اۋىلىنداعى ت. جاروكوۆ اتىنداعى جببوم فيزيكا-ينفورماتيكا ءپانىنىڭ ءمۇعالىمى ماقسات وتەپبەرگەنوۆ كۇندەلىكتى قولدانىپ جۇرگەن EV3 نەگىزگى جيناعىنا قوسا، Arduino اپپاراتتى ەسەپتەۋىش پلاتفورماسى تۋرالى ءبىلىمىن جەتىلدىرگەنىنە قۋانىشتى. «ەندىگى ماقسات بىلگەنىممەن ءبولىسۋ، شالعاي اۋىلدارداعى بالالاردىڭ قىزىعۋشىلىعىن وياتىپ، روبوتتەحنيكامەن اينالىسۋىنا جاعداي تۋعىزۋ» دەيدى ول.
IT-سىنىپ جەتەكشىلەرى ءبىلىم جەتىلدىرۋ كۋرسىنان وتكەن سوڭ «STEM» جۇيەسى بويىنشا وقۋ كۋرسىنان وتكەندىگىن راستايتىن سەرتيفيكاتتارعا يە بولدى.
