الماتى وبلىسىندا شاعىن جانە ورتا كاسىپكەرلىك سۋبەكتىلەرى  ءۇشىن جەر ۋچاسكىلەرىنىڭ قولجەتىمدى بولۋى،كوتەرمە جانە تاراتۋ ورتالىقتارىنىڭ قۇرىلىسى جانە ۇزاق مەرزىمدى كەلىسىمشارتتار ەنگىزۋ ماسەلەلەرى تالقىلاندى.

وڭىرگە جۇمىس ساپارىمەن ق ر پرەزيدەنتىنىڭ بەس الەۋمەتتىك باستاماسىن جۇزەگە اسىرۋ بويىنشا رەسپۋبليكالىق قوعامدىق كەڭەستىڭ مۇشەلەرى – «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ابىلاي مىرزاحمەتوۆ پەن ق ر پارلامەنتى ءماجىلىسىنىڭ دەپۋتاتى نۇرتاي ءسابيليانوۆ باردى.

ساپار اياسىندا وڭىرلىك پالاتا الاڭىندا كاسىپكەرلەرمەن كەزدەسۋ ءوتتى.

كەزدەسۋ بارىسىندا تالقىلانعان باستى ماسەلەلەردىڭ ءبىرى – جەر ۋچاسكەلەرى تۋرالى اقپاراتتىڭ قولجەتىمدىلىگى. ۇكپ باسقارما ءتوراعاسىنىڭ ايتۋىنشا، الماتى وبلىسى قولدانىستاعى باس جوسپاردىڭ  ماتەريالدارى مەن ەگجەي-تەگجەيلى جوسپارلاۋدى قامتيتىن قالا قۇرىلىسى جوبالارى بويىنشا گەواقپاراتتىق دەرەكتەر بازاسىن قۇرۋ جۇمىسىن باستادى. مۇنداي جۇمىس قىزىلوردا وبلىسى، استانا جانە الماتى قالالارىندا جۇرگىزىلۋدە.

«اكىمدىكتەردىڭ باس جوسپارلار تۋرالى، ەگجەي-تەگجەيلى جوسپارلاۋ جانە بوس جاتقان جەر ۋچاسكەلەرى تۋرالى اقپاراتتى ونلاين قولجەتىمدى ەتۋ ءۇشىن قاراجات ءبولۋى وتە ماڭىزدى. مىسالى، 5-6 سيىرى بار «باستاۋدىڭ» تۇلەگى ءوز ءىسىن كەڭەيتىپ، تاعى 10-15 سيىر ساتىپ الۋعا نيەتتى. وعان جايىلىم قاجەت. جەر ۋچاسكەسى ىزدەگەن ول جەر ۋچاسكەسىنىڭ جوقتىعىن نەمەسە بوس جاتقان جەر ۋچاسكەسى تۋرالى اقپاراتتىڭ جوقتىعىن بىلەدى. كاسىپكەر ىزدەمەۋى كەرەك. بارلىق اقپارات ونلاين رەجيمدە قولجەتىمدى بولۋى ءتيىس. كاسىپكەرلەر بارلىق ەسىكتەردى قاقپاي، بارلىق قىزمەتتى ءبىر جەردەن الۋى ءۇشىن بۇل الاڭدى وڭىرلىك پالاتالار ارقىلى قۇرۋ قاجەت»، – دەدى ابىلاي مىرزاحمەتوۆ.

ۇلتتىق كاسىپكەرلەر پالاتاسىنىڭ باسقارما ءتوراعاسى قارجى رەسۋرستارىنا قولجەتىمدىلىكتى قامتاماسىز ەتۋ، مەملەكەتتىك ساتىپ الۋلاردى جەتىلدىرۋ، وتاندىق تاۋار وندىرۋشىلەردى قولداۋ جانە كادرلاردى وقىتۋ تۋرالى اتقارىلعان جانە جوسپارلانعان جۇمىستار بارىسى تۋرالى اڭگىمەلەدى.

«ايماقتارداعى فەرمەرلەردىڭ تاعى ءبىر ماڭىزدى ماسەلەسى – ساۋدا جەلىلەرىنە قولجەتىمدىلىك. بۇگىنگى تاڭدا الەۋمەتتىك-كاسىپكەرلىك كورپوراسيالار  ەلدى مەكەندەردە فەرمەرلەر ءوز ونىمدەرىن وتكىزۋگە بولاتىن كوتەرمە جانە تاراتۋ ورتالىقتارىنىڭ جۇيەسىن  قۇرۋدا. وسىنداي ورتالىقتاردىڭ جوقتىعىنان ولار ءوندىرىستىڭ 30% -ىن جوعالتادى. فەرمەرلەر نارىققا شىعۋ ماسەلەسىن وزدەرى شەشپەۋى كەرەك. ولار تەك ءونىمدى قويماعا وتكىزىپ، تيەسىلى قاراجاتتى الۋعا مىندەتتى. قازىرگى ۋاقىتتا كتو جۇيەسى بويىنشا اۋىل شارۋاشىلىعى مينيسترلىگىمەن بىرلەسىپ جۇمىس اتقارىلۋدا»، - دەدى ابىلاي مىرزاحمەتوۆ.

كەزدەسۋ بارىسىندا الماتى وبلىسى كاسىپكەرلەر پالاتاسىنىڭ وڭىرلىك كەڭەسىنىڭ ءتورايىمى ريمما سالىقوۆا كاسىپكەرلىككە ۇزاق مەرزىمدى كەلىسىمشارتتاردى ەنگىزۋ قاجەتتىلىگى تۋرالى ماسەلەنى كوتەردى.

«ءبىزدىڭ زاۋىت جول قۇرىلىسى ماتەريالدارىن وندىرۋمەن اينالىسادى. نارىققا شىققانىمىزعا 10 جىل بولدى. تەندەرلەر جەلتوقسان ايىندا، كەيدە قاڭتاردا نەمەسە اقپان ايىندا وتەدى، ال تاپسىرۋشى ءونىمدى ناۋرىز ايىندا تالاپ ەتەدى. وسى از ۋاقىت ىشىندە مەن كەلىسىمگە قول قويىپ، شيكىزات ساتىپ الىپ، ءونىمدى دايىنداپ، بۇكىل قازاقستان بويىنشا جەتكىزىپ بەرۋگە مىندەتتىمىن. قازىرگى جاعدايدا بۇل مۇمكىن ەمەس. سوندىقتان بيزنەسكە ۇزاق مەرزىمدى كەلىسىمشارتتار بەرۋ وتە ماڭىزدى. سوندا عانا بيزنەس ءوز جۇمىسىن جوسپارلاي الادى. بۇل ماسەلە مەندە عانا ەمەس، بۇل جۇيەلى ماسەلە. مەكتەپ اسحانالارىندا، اۋرۋحانالاردا دا وسىعان ۇقساس جاعداي، ولار دا جىل سايىن ساتىپ الۋدى جاريالاۋعا ءماجبۇر بولادى»، – دەيدى كاسىپكەر.

ءوز كەزەگىندە ابىلاي مىرزاحمەتوۆ «سامۇرىق-قازىنا» ۇلتتىق ءال-اۋقات قورىمەن بەس جىل مەرزىمگە ۇزاق مەرزىمدى كەلىسىمشارتتار جاساۋ تۋرالى كەلىسىمگە قول جەتكىزىلگەنىن اتاپ ءوتتى.

«بۇل كاسىپكەر ءۇشىن دە، تاپسىرىس بەرۋشى ءۇشىن دە ىڭعايلى. بۇگىندە ءبىز ءىرى جوبالار بويىنشا مەملەكەتتىك ساتىپ الۋدى جۇزەگە اسىرۋدى جوسپارلاپ وتىرمىز. مەنىڭ ويىمشا، مەكتەپتەر مەن اۋرۋحانالاردا كونكۋرستار وتكىزۋ دۇرىس ەمەس. مۇندا قوعامدىق جانە الەۋمەتتىك مۇددەلەر تۇرعىسىنان كەلۋ كەرەك. ءبىز وسى باستامانى قولعا الۋعا دايىنبىز»، – دەپ اتاپ ءوتتى ۇكپ باسقارما ءتوراعاسى.

تاعى ەرەكشە تالقىلانعان تاقىرىپ – جۇمىسسىزدار مەن ءوزىن-وزى جۇمىسپەن قامتىعانداردىڭ «باستاۋ» جوباسىنا قاتىسۋى. جوبانىڭ تۇلەكتەرى وزدەرىنىڭ العاشقى وقۋ ناتيجەلەرىمەن جانە كەزدەسكەن قيىندىقتارىمەن ءبولىستى.

قازاقستان رەسپۋبليكاسى پارلامەنتى ءماجىلىسىنىڭ دەپۋتاتى نۇرتاي ءسابيليانوۆ وڭىرلىك بيزنەستىڭ ماسەلەلەرى مەن ۇسىنىستارى پارلامەنتتىڭ سەسسيالارىندا جاريالاناتىن بولادى دەپ مالىمدەدى.

«پرەزيدەنت بيزنەستى قولداۋعا ەرەكشە كوڭىل بولەدى. بۇل جاقىندا كاسىپكەرلىك قىزمەتى تۋرالى قول قويىلعان زاڭدا كۋالاندىرىلعان. جالپى، بارلىق بەس الەۋمەتتىك باستاما كاسىپكەرلىكپەن تىعىز بايلانىستى. بۇگىندە ءبىز «اتامەكەنمەن»، سالالىق قاۋىمداستىقتارمەن بىرلەسىپ كاسىپكەرلىك سالانى جەتىلدىرۋ بويىنشا نورماتيۆتىك-قۇقىقتىق اكتىلەرگە وزگەرتۋلەر ەنگىزۋ بويىنشا جۇمىستاردى جالعاستىرۋدامىز»، – دەدى دەپۋتات.

سونداي-اق نۇرتاي ءسابيليانوۆ كاسىپكەرلەر پالاتاسىنىڭ كەڭسەسى كاسىپكەرلەردىڭ ءۇيى ەكەنىن ايتىپ ءوتتى. ول الماتى وبلىسى اكىمدىگىنىڭ قولداۋىمەن قۇرىلعان بولاتىن. ول وزگە وڭىرلەر ءۇشىن بيزنەس پەن بيلىك اراسىنداعى ءوزارا قارىم-قاتىناستىڭ تابىستى ۇلگىسى.

ق ر پرەزيدەنتىنىڭ بەس الەۋمەتتىك باستاماسىن جۇزەگە اسىرۋدى قاداعالاۋ ءۇشىن رەسپۋبليكالىق قوعامدىق كەڭەستىڭ مۇشەلەرى – «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ابىلاي مىرزاحمەتوۆ،  ق ر پارلامەنتى ءماجىلىسىنىڭ دەپۋتاتى نۇرتاي سابيليانوۆ جۇمىس ساپارى اياسىندا وبلىس اكىمىنىڭ قاتىسۋىمەن وتكەن وتىرىسقا قاتىستى، وڭىرلىك كاسىپكەرلەر پالاتاسىنىڭ كەڭسەسىندە بولدى، كاسىپكەرلەرگە تولىق فورماتتى قىزمەت كورسەتۋ ورتالىعى جۇمىسىن بايقاپ،  تالدىقورعان قالاسىنداعى 16-قاباتتى ءۇش تۇرعىن ءۇيدىڭ قۇرىلىسىمەن تانىستى. سونداي-اق، ساپار بارىسىندا «تالدىقورعان» اۆتوماتتاندىرىلعان گاز تاراتۋ ستانسياسىنا جانە «سارىمساقوۆ ر.ج.» شارۋا قوجالىعىنا بارۋ دا جوسپارلانىپ وتىر.