ەڭبەك داۋلارىن ەندى سوتقا جەتكىزبەي شەشۋگە بولادى. الماتىدا تاتۋلاسۋ ورتالىعى اشىلدى. وندا مەدياتور، سۋديا جانە پسيحولوگتار اقىسىز كومەك كورسەتەدى. جۇمىسشى مەن جۇمىس بەرۋشى اراسىنداعى تۋىنداعان كيكىلجىڭ بىتىمگەرشىلىك جولىمەن رەتتەلەدى.

سالتاناتتى تۇردە لەنتاسى قيىلعان تاتۋلاسۋ ورتالىعىندا جۇمىس بەرۋشى مەن جۇمىسشى اراسىنداعى تۋىنداعان داۋلى ماسەلەلەر سوتقا جەتكىزبەي شەشىمىن تابۋ ءۇشىن قۇرىلدى. مۇندا مەدياتور، نوتاريۋس قىزمەتكەرلەرى، جەكە سوت ورىنداۋشىلارى جانە پسيحولوگتار كومەك كورسەتەدى. ماريا پوپيلوۆا قىزمەت ەتىپ جۇرگەن مەكەمە باسشىلىعىمەن ارادا كيكىلجىڭ جاعداي تۋىنداپ، داۋلى ماسەلەنىڭ شەشىمى تابىلماي جۇرگەن. الەۋمەتتىك جەلىگە جاعدايىن جازعان كەلىنشەككە «الماتى قالالىق كاسىپوداقتار ورتالىعى» اكب ماماندارى كومەك كورسەتكەن.

«الماتى قالالىق كاسىپوداقتار ورتالىعىنىڭ» باسشىلىعى تەز ارادا كومەك كورسەتتى. 2 كۇن ىشىندە ماسەلە وڭ شەشىمىن تاپتى. ولارعا العىسىم شەكسىز. بۇگىنگى اشىلعان ورتالىق تا تالاي داۋلى ماسەلەنى سوتقا جەتكىزبەي شەشۋگە سەپتەسەدى دەپ ويلايمىن»، – دەدى ماريا پوپيلوۆا.

كوبىنە ازاماتتار جالاقىنى ۋاقىتىلى تولەمەۋ بويىنشا شاعىم تۇسىرەدى دەيدى مەدياتورلار. قالعانى جۇمىستان زاڭسىز شىعارۋ مەن باسقا دا ماسەلەلەرگە قاتىستى كورىنەدى. سونداي-اق، ارىز تۇسىرۋشىلەردىڭ باسىم بولىگى جۇمىس بەرۋشىلەرىمەن كەلىسىم-شارت بەكىتپەي ورنالاسىپ جاتادى. سول سەبەپتى، سوتتا جۇمىسكەرلەردىڭ قۇقىعىن قورعاۋ قيىنعا سوعادى.

«جۇمىسشى شاعىم تۇسىرسە، ونى قابىلداپ، ءبىز جۇمىس بەرۋشىسىنە بارىپ ءمان-جايدى انىقتايمىز. كەيدە ەكى تاراپتى شاقىرىپ، جينالىس وتكىزەمىز. ال كەي جاعدايدا ەكى تاراپتى بولەك قارايتىن كەزدەر بولادى. وسىنداي وتىرىس ناتيجەسىندە كەلىسىمگە كەلگەندە، ءبىز ولاردىڭ قارىم-قاتىناسىن جاقسارتۋعا دا ءمان بەرەمىز»، – دەدى كاسىبي مەدياتور يرينا روديونوۆا.

«الماتى قالالىق كاسىپوداقتار ورتالىعىندا» اشىلعان تاتۋلاسۋ ورتالىعى تاڭعى ساعات 9-دان باستاپ، كەشكى التىعا دەيىن جۇمىس ىستەيدى. ازاماتتار ونداعى مامانداردان كەڭەستەردى تەگىن الا الادى.

«سوڭعى جىلدارى الماتىدا ەڭبەك داۋى 1،5 ەسە ۇلعايىپ كەتتى. سوندىقتان مۇنداي ورىندار سول داۋلاردى ازايتۋعا سەپتىگىن تيگىزەدى دەپ سانايمىن. بىتىمگەرشىلىك ورىندارى قونايەۆ اتىنداعى ەۋرازيالىق زاڭ اكادەمياسى، ءال-فارابي اتىنداعى قازاق ۇلتتىق ۋنيۆەرسيتەتى مەن «Open Almaty» قوعامدىق قابىلداۋ ورتالىعىندا جۇمىس ىستەيدى»، – دەدى «الماتى قالاسى كاسپوداقتار ورتالىعى» اۋماقتىق كاسىپوداقتار بىرلەستىگىنىڭ ءتورايىمى زاۋرەش ومىربايەۆا. 

«وسىنداي ورتالىقتاردىڭ قانداي تيىمدىلىگى بار دەگەن سۇراق تۋىنداۋى مۇمكىن. داۋ-دامايعا قاتىسى بار ادامدار ۋاقىتتارىن ۇنەمدەيدى. وزدەرىڭىز بىلەسىزدەر، سالىق كودەكسى بويىنشا ارىز بەرۋشىلەر مىندەتتى تۇردە سالىق تولەۋى كەرەك. سول سالىقتى تولەمەي-اق، وسى جەردەگى تەگىن مەدياتورلاردىڭ جانە زاڭگەرلەردىڭ كومەگىنە جۇگىنۋىنە بولادى»، – دەيدى الماتى قالالىق سوتىنىڭ ءتوراعاسى نۇرعازى ءابدىقانوۆ.

قازىرگى كەزدە كاسىپوداقتاردىڭ نەگىزگى مىندەتى – ەڭبەك داۋلارىن شەشۋمەن قاتار، جۇمىسشىلاردىڭ بوس ۋاقىتىن ۇيىمداستىرۋ. ونشاقتى جىل بۇرىن مۇنداي قاۋىمداستىقتار تۇرعىن ءۇي الۋ نەمەسە قىزمەتكەردىڭ بالاسىن بالاباقشاعا تىركەۋگە جاردەمدەسۋ سياقتى ماسەلەلەردى شەشۋمەن عانا اينالىساتىن.

بۇگىندە الماتىدا قۇرامىنا 187 مىڭ ادام كىرەتىن 657 كاسىپوداق ۇيىمى بار.