تۇركىستان وبلىسى جەتىساي اۋدانىنا قاراستى اباي اۋىل وكرۋگىندە جۇزىمدىك القابى 280 گەكتارعا جەتىپ وتىر. ءقازىر اباي وكرۋگىندە ءجۇزىم جيناۋ ناۋقانى اياقتالۋعا جاقىن. وڭىردەگى ەڭ ءىرى «ماحارام» شارۋا قوجالىعى ەگىس القابىنىڭ ءار گەكتارىنان 25 سەنتنەرگە دەيىن ءونىم الۋدا. ءجۇزىمنىڭ «تايفى» سورتىنان جينالعان ءونىمنىڭ باسىم بولىگى رەسەيگە جونەلتىلىپ جاتىر.
جالپى اتالعان قوجالىقتا 42 گەكتار جەرگە ءجۇزىم ەگىلگەن. سونىڭ 26 گەكتارى ءونىم بەرسە، قالعان 16 گەكتارى الداعى ەكى جىلدا جەمىسىن بەرە باستايدى.
قوجالىق ءتوراعاسى ماحارام نيفتالييەۆتىڭ ايتۋىنشا، 1 گەكتارعا شامامەن 2 ميلليون تەڭگەگە جۋىق شىعىن كەتەدى ەكەن. 50 جىلعا جۋىق ءونىم بەرۋگە قاۋقارلى ءجۇزىم باقتارى جالپى كەتكەن شىعىندى 5-6 جىلدا تولىعىمەن اقتايتىن كورىنەدى. قازىرگى تاڭدا ونداعى ءجۇزىمنىڭ ءبىر كەلەسى 120 تەڭگەدەن ساۋدالانىپ وتىر. جۇزىمدىك القابىندا 30 ادام جۇمىس ىستەيدى.
جالپى سوڭعى 3 جىلدا تۇركىستان وبلىسى بويىنشا جەمىس-جيدەك پەن ءجۇزىمنىڭ ەگىس كولەمى 1،8 مىڭ گەكتارعا ارتىپ، ەگىس كولەمى 30 مىڭ گەكتارعا جەتكەن. ونىڭ ىشىندە جەمىس – 19،5 مىڭ گەكتار، ءجۇزىم – 10،5 مىڭ گەكتاردى قۇرايدى. اعىمداعى جىلى 85 مىڭ توننا جەمىس-جيدەك جانە 70 مىڭ توننا ءجۇزىم جيناۋ جوسپارلانىپ وتىر. ايتا كەتەرلىگى، رەسپۋبليكادا وندىرىلگەن ءجۇزىمنىڭ 72،5 پايىزى تۇركىستان وبلىسىنىڭ ەنشىسىندە.
