8 قازاندا بولعان وقيعا رەسەيدە ۇلكەن رەزونانس تۋدىردى.  «زەنيت» فۋتبول كلۋبىنىڭ شابۋىلشىسى الەكساندر كوكورين، ونىڭ ءىنىسى كيريل كوكورين جانە «كراسنودار»  فۋتبول قۇراماسىنىڭ جارتىلاي قورعاۋشىسى پاۆەل مامايەۆ رەسەيلىك ەكى شەنەۋنىك دەنيس پاك پەن سەرگەي گايسيندى ۇرىپ-سوققانى ءۇشىن ايىپتالىپ وتىر. بۇزاقى فۋتبولشىلاردىڭ تاعى ءبىر توبەلەسكە قاتىسى بار ەكەنى انىقتالىپ وتىر.

وقيعا بىلاي بولعان. 8 قازاندا الەكساندر كوكورين مەن ونىڭ ءىنىسى جانە پاۆەل مامايەۆ رەسەيلىك تەلەجۇرگىزۋشى ولگا ۋشاكوۆانىڭ كولىك جۇرگىزۋشىسىن ۇرىپ-سوققان. ءبىر توپ جىگىت پەن جابىرلەنۋشىنىڭ اراسىندا كەلىسپەۋشىلىك تۋىندايدى. كەيىن بۇل توبەلەسپەن اياقتالادى. كولىك جۇرگىزۋشىسى اۋىر جاراقاتتارمەن اۋرۋحاناعا تۇسكەن. ولگا ۋشاكوۆا اتالعان ءىس بويىنشا پوليسياعا ارىز جازدى. دارىگەرلەردىڭ ايتۋى بويىنشا، جابىرلەنۋشىنىڭ مۇرنى سىنعان جانە باستان اۋىر جاراقات العان.

اراعا ءبىر ساعات سالىپ بۇزاقى فۋتبولشىلار تاعى دا شۋ شىعارادى.

الەكساندر كوكورين مەن پاۆەل مامايەۆ جەرگىلىكتى كافەلەردىڭ بىرىندە ىشىمدىك ءىشىپ، اڭگىمەلەسىپ وتىرعان. ولاردىڭ جانىندا بەلگىلى ءبىر ماسەلەلەردى اقىلداسىپ وتىرعان رەسەيلىك شەنەۋنىك دەنيس پاك پەن سەرگەي گايسين بولعان. كەيىن شەندىلەر جۇمىستارىنا كەدەرگى جاساپ وتىرعان فۋتبولشىلارعا شۋلاماي، تىنىشتىق ساقتاۋدى سۇراعان. بۇل ىشىمدىككە ماس بولعان كوكوريننىڭ شامىنا ءتيىپ كەتسە كەرەك، ول دەنيس پاكتىڭ ۇلتىنا ءتىل تيگىزگەنىمەن قويماي، ۇستەلمەن ۇرىپ، بالاعاتتاعان. بەينەباقىلاۋعا ءتۇسىپ قالعان بۇل جايت رەسەيلىك باق-تاردا جاريالاندى. كەيىن مامايەۆ كوكوريندى توقتاتپاق بولعان.

دەنيس پاك اتالمىش جايتتى جايدان-جاي قالدىرمايتىنىن ايتقان. سونىمەن بىرگە سول كۇنگى توبەلەستەرگە كوكوريننىڭ ءىنىسى دە قاتىسقان. رەسەيلىك شەندىنىڭ ايتۋى بويىنشا، پاۆەل مامايەۆتىڭ بۇل جايتقا قاتىسى جوق.

«مەن مامايەۆتىڭ ماعان قاتىستى بالاعات سوزدەرىن ەستىمەدىم. ونىڭ بۇل ىسكە قاتىسى جوق»، -دەپ مالىمدەدى دەنيس پاك. ءبىراق دەنيس الەكساندر كوكوريندى كەشىرمەيتىنىن ايتتى.

11 قازاندا ماسكەۋدىڭ قاق ورتاسىندا بولعان توبەلەسكە قاتىستى قىلمىستىق ءىس قوزعالىپ، تۆەرسك اۋداندىق سوتى 8 جەلتوقسانعا دەيىن كوكورين مەن مامايەۆتى تۇتقىندادى. ءقازىر الەكساندر كوكورين مەن پاۆەل مامايەۆ تەرگەۋ يزولياتورىندا وتىر. ولاردى 7 جىل باس بوستاندىعىنان ايىرۋى مۇمكىن. الايدا سوت شەشىم شىعارعانعا دەيىن تەرگەۋ يزولياتورىندا وتىرادى. تەرگەۋ يزولياتورىنىڭ قىزمەتكەرلەرىنىڭ ايتۋى بويىنشا، تانىمال فۋتبولشىلار كەزەكتەسىپ اجەتحانا جۋىپ ءجۇر. بۇل وزدەرىنىڭ قالاۋى ەكەن. سونىمەن بىرگە الەكساندر كوكورين مەن پاۆەل مامايەۆ اتالمىش جايتقا بايلانىستى جابىرلەنۋشىلەردەن كەشىرىم سۇراپ ۇلگەرگەن.

كەزەكتەسىپ اجەتحانا تازالاپ جۇرگەن فۋتبولشىلار سپورتزالدى اڭساپ ءجۇر. ءبىر كۇندىك ومىرلەرى مىنانداي: تەز دايىندالاتىن كەسپە، بوتقا، شاي، تەلەديدار، كىتاپ. شالقىپ ءومىر سۇرگەن فۋتبولشىلاردىڭ جاڭا ءومىرى وسىلاي ءوتىپ جاتىر. سونىمەن بىرگە ولارعا اتا-اناسى، تۋعان-تۋىسىمەن حابارلاسىپ تۇرۋعا مۇمكىندىك بەرىلگەن. 

"تاڭەرتەڭ بوتقا جەيمىن. كەلگەن بويدا سپورتزالدىڭ بار-جوعىن سۇراعان ەدىم. كۇندەلىكتى جاتتىعۋ ءۇشىن سپورتزالعا بارىپ تۇرۋعا رۇقسات سۇراپ، ءوتىنىش تە جازىپ قويدىم. ماعان كوپتەگەن حاتتار كەلىپ جاتىر. ءقازىر سول حاتتارعا جاۋاپ بەرۋگە تىرىسىپ جاتىرمىن. ءبىرىن قالدىرماي وقيمىن"،-دەيدى "زەنيتتىڭ" ويىنشىسى. 

ال "بۋتىركا" تۇرمەسىندە سپورتزالدى قولدانۋ اقىلى بولىپ شىقتى. فۋتبولشىلار فيزيكالىق فورماسىن جوعالپاۋ ءۇشىن كۇنىنە 400 رۋبل تولەپ، سپورتزالدى قولدانا الادى. سونىمەن بىرگە جاتتىعۋدان كەيىن دۋش قابىلداۋعا رۇقسات ەتىلگەن. نەگىزى جازاسىن وتەۋشىلەر اپتاسىنا ءبىر رەت قانا دۋشتى قولدانادى. ءقازىر ەكى فۋتبولشى دا تەلەديدارى بار، بارلىق جاعداي جاسالعان كامەرادا وتىر. ءبىراق كوكورين تەلەديدار قاراعاننان گورى كىتاپ وقىعاندى ءجون كورەدى ەكەن.  

سونىمەن قوسا رامزان قادىروۆ الەكساندر كوكورينگە ءوزىنىڭ "احمات" كومانداسىنىڭ ويىنشىسى بولۋىنا مۇمكىندىك بەرەتىنىن ايتىپ قولقا سالىپتى. كوكورين رامزان قادىروۆكە قولداۋ بىلدىرگەنى ءۇشىن العىس ايتتى. 

ءبىر ايتا كەتەتىنى، تەرگەۋ يزولياتورىندا ارتىق قيمىل-قوزعالىسقا شەكتەۋ قويىلعان. ءبىراق بەلگىلى ءبىر اۋىر جۇمىستاردى ىستەۋگە بولادى. 1 ساعات سەرۋەنگە رۇقسات بەرىلگەن، ال قالعان 23 ساعات بويى ءتورت قابىرعاعا قاراپ وتىرعاننان باسقا امال جوق.