الماتى اكىمى باۋىرجان بايبەك شۆەيساريا كونفەدەراسياسى فەدەرالدى جيىنى كانتوندار كەڭەسىنىڭ حالىقارالىق ىستەر جونىندەگى كوميتەتىنىڭ ءتوراعاسى فيليپپو لومبارديمەن كەزدەستى. تاراپتار ساۋدا-ەكونوميكالىق جانە مادەني-گۋمانيتارلىق بايلانىستاردى نىعايتۋ ماسەلەلەرىن تالقىلادى.

قازىرگى كەزدە شۆەيساريا ەنەرگيانىڭ تيىمدىلىگىن ارتتىرۋ مەن جاڭا ەنەرگيا كوزدەرىن اشۋ سالاسىندا يننوۆاسيانى دامىتۋ بويىنشا كوش باستاۋدا، ال سۋگ قالاسى بلوكچەيندەر تەحنولوگياسىنىڭ جاھاندىق ورتالىعىنا اينالىپ وتىر.

ونىڭ ۇستىنە، «Smart-City» جوباسىن جۇزەگە اسىرۋدا شۆەيساريالىق كومپانيالاردىڭ جيناقتاعان تاجىريبەلەرى مول. مەملەكەتتىك «سيفرلى قازاقستان» باعدارلاماسى مەن «Smart Almaty» جوباسى بويىنشا جاڭا تەحنولوگيالاردى ەنگىزۋگە وراي تاراپتار وسى باعىتتار بويىنشا ىنتىماقتاستىقتى نىعايتىپ، تاجىريبە الماسۋعا قىزىعۋشىلىق ءبىلدىردى.

ايتا كەتەرلىگى، شۆەيساريا قازاقستاننىڭ ءۇشىنشى اۋقىمدى شەتەلدىك ينۆەستورى بولىپ تابىلادى. الماتى مەن شۆەيساريا اراسىنداعى تاۋار اينالىمى وڭ ديناميكاعا يە. قالادا ساۋدا، مەديسينا، قارجى جانە باسقا سالالاردا شۆەيسارلىق كاپيتالمەن 93 كاسىپورىن جۇمىس ىستەيدى.