مەگاپوليستە قوعامدىق كولىك جۇرگىزۋشىلەرىنىڭ ساپاسىن كوتەرۋگە دەن قويىلماق. الماتىداعى 2 جارىم مىڭنان اسا اۆتوبۋس جۇرگىزۋشىلەرى بىلىكتىلىك سىناعىنان ءوتتى. تەستكە قالاداعى 14 اۆتوبۋس پاركىنىڭ قىزمەتكەرلەرى قاتىستى. كولىك رەفورماسى اياسىندا العاش رەت قولعا الىنعان شارا جۇرگىزۋشىلەردىڭ ءيميدجىن كوتەرۋگە قانشالىقتا اسەر ەتپەك؟
تەست تاپسىرۋعا كەلگەن رولان بولات ۇلىنىڭ مەگاپوليستە قوعامدىق كولىك جۇرگىزىپ جۇرگەنىنە بيىل 10 جىل. قانشا جىل اۆتوبۋس تىزگىندەپ جۇرسە دە سىناققا كەلگەندە قوبالجىعانىن جاسىرمادى. جانە بىلىكتىلىكتى ارتتىرىپ تۇرۋعا باعىتتالعان بۇل شارانى قوس قولداپ قولداپ وتىر. ويتكەنى، الماتىداي ۇلكەن قالادا قوعامدىق كولىكپەن جۇرەتىن حالىق تا، قاۋىپ-قاتەر دە كوپ.
«ءقازىر قالا جولدارىندا وزگەرىستەر كوپ قوي. سونىڭ ءبارىن ءوزىمىز وقىپ، كورىپ، ءقازىر تەست وتكىزىپ جاتىرمىز. مۇنداي سىناقتار كەرەك، ارينە، تەك اۆتوبۋس جۇرگىزۋشىلەرى عانا ەمەس جەڭىل كولىك جۇرگىزۋشىلەرىنە دە كەرەك دەپ ويلايمىن»، – دەدى اۆتوبۋس جۇرگىزۋشىسى رولان بولات ۇلى.
تەست 3 بلوكتان تۇرادى: جول ەرەجەسى، العاشقى مەديسينالىق كومەك كورسەتۋ جانە كولىك جۇرگىزۋ مادەنيەتى مەن سترەسسكە توزىمدىلىگىن انىقتايتىن سۇراقتار بار. سىناقتان سۇرىنگەندەردى قايتا وقىتامىز دەيدى ماماندار. سەبەبى، بۇگىنگى كۇننىڭ جۇرگىزۋشىلەرىنە قويىلاتىن تالاپ تا جوعارى. ولار تەك تۇرعىنداردى تاسىپ قانا قويماي، قالامىزدىڭ تاريحى مەن مادەنيەتىنەن حاباردار بولۋى ءتيىس. الماتىعا قىدىرىپ كەلگەن قوناقتار مەن تۋريستەرگە دە اسەم قالانىڭ كورىكتى جەرلەرىن تۇسىندىرە الۋى كەرەك دەيدى. ءقازىر اۆتوبۋس جۇرگىزۋشىلەرىنىڭ سىرت كەلبەتىنە دە اسا ءمان بەرىلۋدە. جاقىندا مەگاپوليستەگى قوعامدىق كولىك جۇرگىزۋشىلەرىندە بىرەگەي فورما بولادى.
«ءقازىر الماتىدا بارلىق اۆتوبۋستاردىڭ جۇيەلەرى، تەحنيكالاردىڭ ءبارى جاڭالانىپ جاتىر. جۇرگىزۋشىلەر ءارتۇرلى جاعدايلارعا، وقىس جاعدايلارعا دايىن بولۋى كەرەك. سوندىقتان ولاردى وقىتىپ، ءبىلىمىن ارتتىرعان وتە پايدالى دەپ ويلايمىن»، – دەيدى اۆتوكولوننا باسشىسى باۋىرجان دارييەۆ.
قازىرگى تاڭدا قوعامدىق كولىك جۇرگىزۋشىلەرىنىڭ ءيمميدجىن كوتەرۋگە دەن قويىلماق. وسىلايشا، قالا بيلىگى بۇل ماماندىققا كەلگىسى كەلەتىن جاڭا كادرلار لەگىن قالىپتاستىرماقشى. وعان سەبەپ، سوڭعى جىلدارى اۆتوبۋس پاركتەرىندە تۋىنداپ جاتقان مامان تاپشىلىعى.
«مىنا تەستتەن كەيىن ءبىز جۇرگىزۋشىلەردى تاعى دا قوسىمشا ترانسپورت ماماندارىنىڭ بىلىكتىلىگىن ارتتىرۋ ورتالىعىندا وقىتامىز. جۇرگىزۋشىلەرگە ءبىز ءوز ءومىرىمىزدى سەنىپ تاپسىرامىز. ءبىراق ماسەلە ولاردىڭ ءبىزدى دىتتەگەن جەرىمىزگە قالاي جەتكىزەتىنىندە عوي. جاڭا كادرلار كەلسە، جاقسى بولار ەدى»، – دەدى الماتى قالاسى ءماسليحاتىنىڭ ەڭبەك، جۇمىسپەن قامتۋ جانە كولىكتى دامىتۋ جونىندەگى تۇراقتى كوميسسيانىڭ ءتورايىمى روزا بادايەۆا.
تەستىلەۋدىڭ قورىتىندىسى الداعى كۇندەرى دايىن بولادى. سونىڭ ناتيجەسىندە ماماندار كولىك جۇرگىزۋشىلەرىنە ارنايى وقىتۋ جوسپارىن قۇرماق. الماتىلىق كولىك ماماندارىن دايارلاۋ ورتالىعىنداعىلار بۇدان بىلاي جۇرگىزۋشىلەردى تەستتەن وتكىزىپ، بىلىكتىلىگىن ارتتىرۋ جىل سايىن جۇرگىزىلەدى دەپ وتىر.
ايتا كەتەيىك، وتكەن اپتادا عانا قالا پاركتەرىنە 200 جاڭا اۆتوبۋس قوسىلدى. ال، كەلەر جىلدىڭ باسىنا دەيىن مەگاپوليستەگى جاڭالانعان قوعامدىق كولىكتىڭ ۇلەسى 87 پايىزعا جەتپەك. جانە تۇرعىندارعا قولايلى بولۋى ءۇشىن جىل سوڭىندا ايالداملاردا ەلەكتروندى تابلولار قويىلا باستايدى.
