كورولدىك وتباسىعا جاقىن ءۇش دەرەككوزدىڭ اگەنتتىككە حابارلاۋىنشا، "ونداعان حانزادا" جانە كورولدىك وتباسىنىڭ باسقا دا مۇشەلەرى تاق مۇراگەرى رەتىندە باسقا ادامدى كورگىسى كەلەدى، ءبىراق ولار ساۋد ارابياسىنىڭ 82 جاستاعى كورولى سالمان بەن ابدەل ءازىز ءال ساۋد ءتىرى كەزىندە ەشقانداي ارەكەت جاسامايدى. كورول "سۇيىكتى ۇلىنا" قارسى شىعا قويماس دەپ ەسەپتەيدى ولار.
دەرەككوزدەردىڭ ءبىرىنىڭ مالىمەتى بويىنشا، كورولدىك وتباسى سالمان كورولدىڭ جالعىز ءىنىسى - 76 جاستاعى احمەدتى قولداۋعا دايىن. اقش شەنەۋنىكتەرى دە سونى جاقتاعان.
بۇعان دەيىن Washington Post گازەتىنىڭ ءوز دەرەككوزىنە سۇيەنىپ حابارلاۋىنشا، ورتالىق بارلاۋ باسقارماسى ساۋد ارابياسىنىڭ تاق مۇراگەرى مۇحاممەد بەن سالمان ءال ساۋد وپپوزيسيالىق جۋرناليست جامال حاشوگگيدى ولتىرۋگە تاپسىرما بەرۋى مۇمكىن ەكەنىن انىقتاعان.
تۇركيا قورعانىس ءمينيسترى حۋلۋسي اكاردىڭ مالىمدەۋىنشە، حاشوگگي دەنەسى بولشەكتەلىپ، ديپلوماتيالىق وكىلدىكتەن چەموداندارمەن شىعارىلعان. كونسۋلدىق قىزمەتكەرلەرى بۇنى "ديپلوماتيالىق مارتەبەسى ارقىلى" جۇزەگە اسىرعان دەدى مينيستر.
ساۋد ءجۋرناليسى جامال حاشوگگي ساۋد ارابياسىنىڭ ستامبۋلداعى ەلشىلىگىندە 2 قازاندا ءولتىرىلدى. اۋەلى ەر-رياد جۋرناليست كونسۋلدىقتان شىعىپ كەتكەن دەپ، ءۇش اپتادان سوڭ ونى ولتىرگەنىن مويىندادى.
15 قاراشادا ساۋد پروكۋرورى جۋرناليست ولىمىنە ايىپتالعان بەس ادامعا ءولىم جازاسىن سۇرايتىنىن جاريالادى. سول كۇنى اقش جۋرناليست ولىمىنە قاتىسى بولۋى مۇمكىن 17 ازاماتقا قارسى سانكسيا ەنگىزدى. ەر-رياد مەملەكەت باسشىلىعىنىڭ كىسى ولتىرۋگە قاتىسى بار دەگەن ايىپتاۋلاردى جوققا شىعارىپ وتىر.
