بۇگىن ماڭعىستاۋ وبلىسىنىڭ اكىمى ە.توعجانوۆ استانا قالاسىندا دزيۋدودان ەرلەر مەن ايەلدەر اراسىندا وتكەن ەل چەمپيوناتىنىڭ جۇلدەگەرلەرىمەن كەزدەستى.

اكىمدىكتىڭ باسپا ءسوز قىزمەتىنىڭ حابارلاۋىنشا، باسشىنىڭ قابىلداۋىندا باۋىرجان ناربايەۆ، اقنيەت تۇردان، اننا كازيۋلينا، رۋسلان مۋسايەۆتارمەن قاتار برازيليا ەلىندە وتكەن دزيۋدودان اسكەريلەر اراسىندا الەم چەمپيوناتىنىڭ قولا جۇلدەگەرى امىربەك جەڭىسوۆ بولدى.

وبلىس اكىمى دزيۋدوشىلارعا تولاعاي تابىس تىلەپ، كەزەكتى دودالارعا ساتتىلىك تىلەدى. سپورتشىلار ءبىر جىل بۇرىن ايماق باسشىسىمەن كەزدەسكەنىن ەسىنە الىپ، العىسىن ءبىلدىردى. وبلىس اكىمى دزيۋدو سالاسىندا جاسالىپ جاتىرعان جۇمىستارعا توقتالىپ، چەمپيونداردىڭ باپكەرلەرى ايبەك يماشيەۆ، ماناربەك بيسەكەنوۆ، سەرگەي ۆولوبۋيەۆ، ماڭعىستاۋ وبلىسى دزيۋدو فەدەراسياسىنىڭ پرەزيدەنتى اسىلبەك جولدىبايەۆقا ءوزىنىڭ ىستىق لەبىزىن ءبىلدىردى. «رەسپۋبليكالىق دەڭگەيدە وبلىسىمىزدىڭ ابىرويىن اسقاقتاتقان ماڭعىستاۋلىق سپورتشىلار نامىستى قولدان بەرمەگەنىن بىلەمىز. بۇل سپورتشىلار ماڭعىستاۋ وبلىسىنىڭ قورجىنىنا مەدال سالىپ، مەرەيىمىزدى ۇستەم ەتتى. بۇدان باسقا الدا وتەتىن ازيا جانە الەم چەمپيوناتىندا، 2020 جىلى توكيودا وتەتىن جازعى وليمپيادا ويىندارىنا قاتىساتىن ءبىزدىڭ سپورتشىلارعا زور سەنىم بىلدىرەمىز»، - دەدى وبلىس اكىمى. ەستەرىڭىزگە سالا كەتەيىك، دزيۋدودان ق ر چەمپيوناتىندا ماڭعىستاۋلىق سپورتشىلار 3 التىن جانە 2 كۇمىس مەدالدى يەلەنىپ، جالپى كوماندالىق ەسەپتە ەكىنشى ورىندى ولجالاعان بولاتىن. سونىمەن قاتار برازيلياداعى اسكەريلەر اراسىنداعى الەم چەمپيوناتىندا 66 كگ. سالماق دارەجەسىندە بەلدەسكەن ماڭعىستاۋلىق پالۋان امىربەك جەڭىسوۆ قولا جۇلدەگەر اتاندى.