«نۇر وتان» پارتياسىنا الماتىنىڭ جاس تۇرعىندارى مۇشەلىككە الىندى. ولاردىڭ قاتارىندا وليمپيادا چەمپيوندارى، دارىگەرلەر، عالىمدار مەن جۋرناليستەر بار.

پارتيانىڭ جاڭا مۇشەلەرى قالانىڭ دامۋى ءۇشىن، جۇدىرىقتاي جۇمىلىپ جۇمىس ىستەۋگە نيەتتى ەتكەن. بۇگىن قالا اكىمى باۋىرجان بايبەك جاستاردىڭ قولىنا پارتيالىق بيلەتتەرى مەن ءتيىستى سەرتيفيكاتتارىن تابىستادى.

«نۇر وتان» پارتياسى بيلەۋشى پارتيا رەتىندە كوپ جۇمىس اتقارىپ كەلە جاتىر. ەلباسى – ءبىزدىڭ پارتيامىزدىڭ ليدەرى. كەلەسى جىلى پارتيانىڭ 20 جىلدىعىن اتاپ وتەتىن بولامىز. «نۇر وتان» پارتياسىنىڭ ماقساتى – تاۋەلسىزدىگىمىزدى نىعايتۋ، حالىقتى بىرىكتىرۋ، دامىعان مەملەكەتتەردىڭ اراسىنا ەنۋ ءۇشىن جۇمىس ىستەۋ. ول ءۇشىن بارلىعىمىز بەرىك بولۋىمىز كەرەك، تۇتاس بولۋىمىز كەرەك. سوندىقتان ەل ابىرويىن اسقاقتاتىپ جۇرگەن سىزدەرگە ۇلكەن ءۇمىت ارتا وتىرىپ، ەلباسى ساياساتىن ىسكە اسىرۋشى پارتيا مۇشەسى بولاتىندارىڭىزعا سەنىم بىلدىرەمىز»، – دەدى الماتى قالاسىنىڭ اكىمى باۋىرجان بايبەك.

سالتاناتتى جيىن كەزىندە شاھار باسشىسى «نۇر وتان» پارتياسىنىڭ جاڭارتىلعان فيليالىمەن تانىستى. جاڭا كەڭسە جوندەۋدەن سوڭ تۇرعىندارعا بارىنشا ىڭعايلى بولعان. جىل سايىن پارتيانىڭ كەڭسەسىنە 10 مىڭنان استام ادام كەلىپ، ءتيىستى كومەك پەن كەڭەس الادى. حالىققا ىڭعايلى بولۋ ءۇشىن مۇندا ەلەكتروندىق ۇكىمەت تەرمينالدارى قويىلعان. ەندى پارتيانىڭ جاڭا مۇشەلەرى دە ۇيىمنىڭ جۇمىسىن جەتىلدىرۋگە ءوز ۇلەستەرىن قوسادى.

«بۇگىن ەلباسىمىز باسقارىپ وتىرعان پارتياعا قوسىلۋ ۇلكەن مارتەبە بولدى. مەن بۇل ۇلكەن جاۋاپكەرشىلىك ەكەنىن سەزىنىپ وتىرمىن. سەبەبى، «نۇر وتان» پارتياسى ءبىزدىڭ ەلىمىزدىڭ پاتريوت كۇشى. ول ءار كەزدە «جاسۇلان»، «جاس قىران» سىندى جاستار ۇيىمىمەن، «جاس وتان» بىرلەستىگىمەن جۇمىس ىستەپ، سونداي-اق ارداگەرلەردى قولداپ كەلەدى. سول سەبەپتى، بۇل مەن ءۇشىن ۇلكەن جاۋاپكەرشىلىك جانە مارتەبە»، – دەدى «نۇر وتان» پارتياسىنىڭ مۇشەسى، جۋرناليست وكسانا دراچيەۆا.