بۇل ەكى ارۋ ءبىزدىڭ قازاقتىڭ جۇرەگىن ءبىر ۆيدەومەن-اق جاۋلادى. ماسكەۋدە تۇراتىن ليزا مەن ناستيا بۇگىندە قازاقستانعا تانىمال بولىپ ۇلگەردى. ورىستىڭ قوس ارۋىن تانىتقان ولاردىڭ «موسكۆا  قازاقشا» اتتى YouTube جەلىسىندە شىققان بەينەماتەريالدارى ەدى. وندا بويجەتكەن قىزدار ماسكەۋدەگى ءتۇرلى اسەم كوشەلەر مەن عيماراتتاردى قازاق تىلىندە تانىستىرادى. قىزداردىڭ ەڭبەگى ءۇشىن وتانداستارى باستارىنان سيپالاي قويماس، الايدا Qamshy.kz اقپارات اگەنتتىگى مۇنى ەرەكشە باعالادى. قازاق تىلىندە ءبىر اۋىز ءسوز بىلمەيتىن كەيبىر قازاق دوكەيلەرىنەن گورى انا تىلىمىزدە سايراعان وزگە ۇلتتىڭ قىزدارىن جانىنا جاقىن سانادىق دا، سۇحباتتاسۋعا اسىقتىق. ناستيا مەن ليزا نەگە قازاق ءتىلىن تاڭداعان، قازاق تىلىنە دەگەن ماحابباتتارى قايدان پايدا بولدى، وسى جانە باسقا دا سۇراقتارعا جاۋاپ الدىق. ەكەۋى دە – ماسكەۋ مەملەكەتتىك لينگۆيستيكالىق ۋنيۆەرسيتەتىنىڭ ستۋدەنتتەرى.

ناستيا مەن ليزا

Qamshy.kz: نەگە قازاق ءتىلىن تاڭدادىڭىزدار؟ نەگە قىزىقتىڭىزدار؟

ەليزاۆەتا وسيپوۆا: ۋنيۆەرسيتەتتە ءتىلدى ءبىز تاڭدامايمىز، دەگەنمەن ءبىزدىڭ تاڭداۋعا قازاق ءتىلى تۇسكەنىنە قاتتى قۋاندىق. بۇدان بۇرىن مەن فرانسۋز ءتىلىن ۇيرەنىپ ءجۇردىم. كەيىن قازاق ءتىلىنىڭ باي، اۋەزدى ەكەنىن بايقادىم دا، ەرىكسىز عاشىق بولدىم. مەن ءۇشىن قازاق ءتىلى تازا اۋانىڭ تىنىسىنداي...

Qamshy.kz: قازاق تىلىنە دەگەن ماحاببات قايدان پايدا بولدى، مۇمكىن بىرەۋ سەبەپكەر بولعان شىعار؟

اناستاسيا رەشەتنيكوۆا: راسىندا، قازاق تىلىنە ماحابباتىمىز ەرەكشە. گرامماتيكاسى ەۋروپالىق تىلدەردىڭ ەشقايسىسىنا ۇقسامايدى. ءاربىر سوزىندە ۇلكەن تاريح جاتىر. ونىڭ ماعىناسىن ءتۇسىنۋ قيىن، ءبىزدى قىزىقتىرىپ تۇرعانى دا وسى.

Qamshy.kz: ءتىلدى مەڭگەرمەي، بىلمەي جۇرگەن كەزدەرىڭىزدە قازاقستان، قازاق ءتىلى دەگەندە ويلارىڭىزعا ءبىرىنشى نە كەلەتىن ەدى؟

ەليزاۆەتا وسيپوۆا: قازاقستان، قازاق حالقى جايلى اقپارات بىزدە بولعان جوق دەسەك تە بولادى. العاشقى ساباقتا قازاقستان دەگەندە كوز الدىما دالا، جايىلىپ جۇرگەن تۇيەلەر، سوسىن پرەزيدەنت نۇرسۇلتان نازاربايەۆ ەلەستەدى. مۇنى ءقازىر ويلاسام، وز-وزىمنەن ۇيالىپ كەتەمىن. ال قازىرگى ۋاقىتتا ءبىز مەملەكەتتىڭ الەۋمەتتىك، ەكونوميكالىق جاڭالىقتارىن، وقيعالارىن باقىلاپ وتىرامىز. قازاقستان تۋرالى كوپ اقپارات جينادىق.

ەليزاۆەتا وسيپوۆا

Qamshy.kz: قازاقستاندا بولدىڭىزدار ما؟

اناستاسيا رەشەتنيكوۆا: مەن قازاقستاندا ءۇش رەت بولدىم. بىرىنشىسىندە ۋنيۆەرسيتەتتە بىرگە وقىعان ستۋدەنتتەرمەن بىرگە الماتىداعى اۋدارماشىلار كونفەرەنسياسىنا قاتىسىپ قايتتىق. ودان كەيىن قازاق ءتىلى بويىنشا جارىسقا باردىم. ءۇشىنشى رەت استاناداعى ەۋرازيالىق ۇلتتىق ۋنيۆەرسيتەتتە تاجىريبەدەن وتتىك. بۇل ساپارلارىم قازاقستان تۋرالى جەتىك بىلۋىمە سەبەپ بولدى.  

ەليزاۆەتا وسيپوۆا: ال مەن قازاقستاندا بولعان ەمەسپىن، ءبىراق بارۋ – ۇلكەن ارمانىم.

Qamshy.kz: ليزا، ءسىز بارماعان ەكەنسىز. ايتىڭىزشى، قازاقستان حالقىن قالاي ەلەستەتەسىز؟

ەليزاۆەتا وسيپوۆا: قازاق حالقى – وتە قوناقجاي. قوناعىنىڭ الدىنا بار جاقسىسىن ۇيىپ-توگەدى. حالقى جايلى سەكىلدى. بارسام، ءوزىمدى ءوز ۇيىمدە جۇرگەندەي سەزىنەتىنىمە ەش ءشۇبام جوق.

Qamshy.kz: قازاقستان جايلى نە بىلگىلەرىڭىز كەلەدى؟

ەليزاۆەتا وسيپوۆا: مەنى قازاقستاننىڭ تاريحى مەن ءداستۇرى قىزىقتىرادى. ءار ساباق سايىن ول مەملەكەت جايلى جاڭا، بۇرىن-سوڭدى ەستىمەگەن اقپاراتتاردى ءبىلىپ جاتامىن، ساباق سونىسىمەن قىزىقتى وتەدى.

Qamshy.kz: YouTube كانالدارىڭىزدا كوبىنە ءقازاقتىلدى كورەرمەندەر قولداۋ كورسەتىپ جاتادى، ال رەسەيدە سىزدەردىڭ قازاقشا بلوگتارىڭىزدى قالاي قابىلدايدى؟ 

ەليزاۆەتا وسيپوۆا: وتكەن اپتادا اۋدارماشىلار كونفەرەنسياسىندا ناستيا ەكەۋمىز جوبامىز جايلى تولىعىراق ايتىپ بەردىك. قاتىسۋشىلار ءبىزدى قولدادى، جوبامىزدىڭ كرەاتيۆتى، بولاشاعى زور ەكەنىن ايتىپ قۋانتتى. وتانداستارىمىز ءبىزدى قولدايدى. ارينە، ريزامىز!

Qamshy.kz: «موسكۆا قازاقشا» ءقازىر كادىمگىدەي تانىمال؟ بۇل بلوگتى جۇرگىزۋدەگى ماقساتتارىڭىز قانداي بولدى؟

اناستاسيا رەشەتنيكوۆا: «موسكۆا قازاقشا» ارقىلى ءبىز قازاقستاندىقتاردى ماسكەۋدىڭ كورىكتى كوشەلەرىمەن، قالانىڭ تاريحىمەن، مادەنيەتى جانە ساۋلەت ونەرىمەن تانىستىرعىمىز كەلەدى. ءارى رەسەيلىكتەردىڭ دە قازاق ءتىلىن ۇيرەنۋگە دەگەن ىنتاسىن ارتتىرۋدى ماقسات ەتىپ وتىرمىز. وسى جوبا ارقىلى قازاقستان مەن رەسەيدىڭ قارىم-قاتىناسىن نىعايتساق دەيمىز.

اناستاسيا رەشەتنيكوۆا

ەليزاۆەتا وسيپوۆا: ءيا، بۇل مادەني ديپلوماتيا سياقتى...

Qamshy.kz: تانىمال بولىپ كەتەدى دەپ ويلادىڭىزدار ما؟

ەليزاۆەتا وسيپوۆا:  جو-و-وق! ءبىز ءۇشىن كورەرمەننىڭ ىستىق ىقىلاسى ماڭىزدى. قالاي قابىلدايدى دەپ قوبالجىعان ەدىك، الايدا ءبارى ءساتتى شىقتى. مۇنى ۆيدەوداعى پىكىرلەردەن-اق بايقاۋعا بولادى. بۇل جوبانى باستاعانىمىز بەكەر ەمەس دەپ ويلايمىن. قوعامعا، حالىققا پايدامىز تيسە بولعانى...

Qamshy.kz: قازاق تىلىنەن وزگە تىلدەردى بىلەسىزدەر مە؟ قازاق ءتىلىن ۇيرەنۋ قانشالىقتى قيىن بولدى؟

ەليزاۆەتا وسيپوۆا:  جوق، بىلمەيمىن، ءبىراق تۇرىك ءتىلىن ۇيرەنگىم كەلەدى. شىنى كەرەك، قازاق ءتىلىن ۇيرەنۋ وتە قيىن بولدى. قيىندىق تۋدىرعانى – قازاق تىلىندەگى جالعاۋ. ورىس تىلىنەن قازاق تىلىنە اۋدارعاندا كالكاعا سالىپ كەتەمىن. ونىڭ ۇستىنە اكسەنت تە قاتتى بايقالادى. ءبىراق ۋاقىت وتە كەلە بۇل ولقىلىقتاردىڭ ءبارىن جەڭەمىن دەپ سەنەمىن. قازاق تىلىندە بۇلبۇلشا سايرايتىن بولامىن.

Qamshy.kz: قازاق تىلىندە قانداي كىتاپ وقىدىڭىزدار، قانداي اندەردى بىلەسىزدەر؟ 

اناستاسيا رەشەتنيكوۆا: قازاق تىلىندە ءبىز ابايدىڭ، مۇقاعالي ماقاتايەۆتىڭ ولەڭدەرىن وقىدىق. ال ەڭ سۇيىكتى اڭدەرىم –  «دۋدار-اي»، «اسپانعا قارايمىن»، «ارمانداستار» جانە ماعان Son Pascal-دىڭ اندەرى قاتتى ۇنايدى.

Qamshy.kz: قانداي اقىن-جازۋشىلاردى جانە انشىلەردى بىلەسىزدەر؟

ەليزاۆەتا وسيپوۆا: بۇل ءتىزىمىنىڭ كوشىن باستايتىن ارينە، اباي قۇنانبايەۆ. مۇقاعالي ماقاتايەۆتى، مۇحتار اۋەزوۆتى جاقسى بىلەمىز. ال قازاق انشىلەرىنەن الىبەك دىنىشيەۆ پەن الەمگە تانىمال ديماش قۇدايبەرگەندى بىلەمىز ءارى تىڭدايمىز.

Qamshy.kz:  قازاق دوستارىڭىز كوپ پە؟

اناستاسيا رەشەتنيكوۆا: مەن قازاقستانعا بارعاندا بىرنەشە قازاقپەن تانىستىم. قازىرگى ۋاقىتتا جەلى ارقىلى ارا-تۇرا ارالاسىپ تۇرامىز.

ەليزاۆەتا وسيپوۆا: مەنىڭ دە قازاق دوستارىم كوپ. الايدا ولارمەن قازاقستاندا ەمەس، وزگە مەملەكەتتەردە تانىسىپپىن. ماسەلەن، ۇلىبريتانيادا رەگينا دەگەن الماتىلىق قىزبەن تانىستىم. ەكەۋمىز – جاقىن دوستارمىز.

Qamshy.kz: جاقىندارىڭىزعا قازاق ءتىلىن ۇيرەتەسىزدەر مە؟

اناستاسيا رەشەتنيكوۆا: ارينە، مەن عانا ەمەس، جاقىندارىم دا تىلگە قىزىعادى. اتا-انام كەي سوزدەردى بىلسە دە سويلەم قۇراي المايدى. سوندا دا تىرىسادى. مەنىڭ قازاقشا سويلەگەنىمە قىزىعادى.

ەليزاۆەتا وسيپوۆا: قازاق اندەرىن تىڭدايتىن دوستارىم كوپ. ولار دا كەيبىر سوزدەردى بىلەدى. وعان ىقپالىمنىڭ ءتيىپ جاتقانىنا تەك قۋانىشتىمىن.

Qamshy.kz: بولاشاقتارىڭىزدى قازاق تىلىمەن بايلانىستىراسىزدار ما؟

ەليزاۆەتا وسيپوۆا: ءيا، ارينە! مەنىڭ ديپلومات بولعىم كەلەدى. ماگيستراتۋرانىڭ ەكىنشى كۋرسىندا وقىپ جۇرگەنىمدە رەسەي سىرتقى ىستەر مينيسترلىگىندە تاجىريبەدەن ءوتتىم. بولاشاقتا رەسەي مەن قازاقستان اراسىنداعى دوستىق قارىم-قاتىناستى نىعايتۋ ءۇشىن جۇمىستار اتقارعىم كەلەدى. جانە قازاق ءتىلىن ۇيرەنگىسى كەلەتىن ستۋدەنتتەر مەن قازاقستاندىقتار ءۇشىن باسقا دا قىزىقتى جوبالار جاساۋدى ارماندايمىن.

Qamshy.kz: جالپى ءقازىر نە ىستەپ جۇرسىزدەر، قايدا جۇمىس ىستەيسىزدەر؟

اناستاسيا رەشەتنيكوۆا: ءقازىر مەن اقپارات اگەنتتىگىندە ءتىلشى بولىپ جۇمىس ىستەيمىن.

ەليزاۆەتا وسيپوۆا: مەن ساراپشى بولىپ جۇمىس ىستەپ ءجۇرمىن. كەي-كەزدەرى اۋدارمامەن اينالىسامىن.

Qamshy.kz: قازاق جىگىتىنە تۇرمىسقا شىعار ما ەدىڭىزدەر؟

ەليزاۆەتا وسيپوۆا: ءومىر توسىن سىيلارعا تولى عوي. الدا نە كۇتىپ تۇرعانىن بىلمەيسىڭ. قازاقستاندا بىرنەشە كۇن تۇرۋعا قارسى بولماس ەدىم. ال قازاق جىگىتىنە كەلەر بولساق، ماحابباتتا ۇلتقا بولىنۋشىلىك بولماۋ كەرەك. تاعدىرىما قازاق جىگىتىن جازسا، باس تارتپايمىن. ءتىپتى ول جىگىت وزگە ۇلت وكىلدەرىنەن بولسا دا ەڭ باستىسى - ءسۇيۋ. 

Qamshy.kz: سۇحباتتاسقاندارىڭىزعا راقمەت! ءار ىستەرىڭىزگە بەرەكە بەرسىن!

سۇحباتتاسقان: گۇلىم جاقان