قاراعاندىدا تۇرعىن ۇي-كوممۋنالدىق شارۋاشىلىقتى ءبىر جەردەن باسقارۋعا ارنالعان ءبىرىڭعاي ديسپەچەرلىك ورتالىق قۇرۋ جوسپارى جاريا ەتىلدى. قىزمەت ساپاسىن اشىق ەتىپ، جەدەل ارەكەت ەتۋگە جول اشاتىن جوبا وڭىرلىك دەڭگەيدە العاشقىلاردىڭ ءبىرى بولماق.

جوسپار جايىن پرەمەر-مينيستردىڭ ورىنباسارى – جاساندى ينتەللەكت جانە سيفرلىق دامۋ ءمينيسترى جاسلان مادييەۆ وبلىسقا ساپارىندا تىڭدادى. ۆيسە-پرەمەر جەرگىلىكتى كاسىپورىنداردىڭ جۇمىسىمەن تانىسىپ، ىت-ونەركاسىپتى دامىتۋ مەن جاساندى ينتەللەكتتى ەكونوميكا جانە باسقارۋ جۇيەسىنە ەنگىزۋ ماسەلەسىن تالقىلادى.

كوممۋنالدىق قىزمەتتى «ءبىر ەكراننان» كورۋ

KAZPROM AVTOMATIKA كومپانياسى قالاعا ورتاق ديسپەچەرلىك ورتالىق قۇرۋدى ۇسىندى. سۋ، جىلۋ، كوشە جارىعى سياقتى قىزمەتتەردى دەرەكتەرمەن باسقارۋدى كومپانيا 20 جىلدان استام تاجىريبەگە سۇيەنىپ ۇسىندى. ماقسات – تۇتىنۋ مەن جەتكىزۋدى وڭتايلاندىرىپ، كورسەتكىشتەردى قىزمەت كورسەتۋشىلەر مەن اكىمدىككە تولىق اشىق ەتۋ.

«العاشقى كەزەڭدە تۇكش قىزمەتىنىڭ تۇتىنۋىن جانە جەتكىزىلۋىن وڭتايلاندىرۋدى جوسپارلاپ وتىرمىز. سۋ، جىلۋ، كوشە جارىعى سەكىلدى كۇندەلىكتى ومىرگە تىكەلەي اسەر ەتەتىن باعىتتاردى ءبىرىڭعاي باقىلاۋعا بىرىكتىرەمىز»، – دەدى تەحنيكالىق ديرەكتور دميتريي لەپەحوۆ.

پيلوتتىق جوبا ىبىراي التىنسارين اتىنداعى مەكتەپ-ليسەي بازاسىندا ىسكە قوسىلماق. تيىمدىلىگى دالەلدەنسە، قالالىق ينفراقۇرىلىمعا كەزەڭ-كەزەڭ ەنگىزىلۋى مۇمكىن.

«پيلوت ناتيجە بەرسە، جوبانى رەسپۋبليكا بويىنشا ماسشتابتايمىز. سالاعا جاۋاپتى مينيسترلىكپەن بارلىق دەتالدى پىسىقتاۋ قاجەت»، – دەدى جاسلان مادييەۆ.

مەكتەپتەن ىت-كە: جاڭا فورماتتاعى وقۋ

ۆيسە-پرەمەر ىت-مەكتەپ اشىلاتىن الاڭعا باردى. مۇندا وقۋ كلاسسيكالىق لەكسياسىز جانە ءمۇعالىمسىز، «تەڭ تەڭدى وقىتادى» قاعيداتىمەن، جوبالىق جۇمىس پەن گەيميفيكاسياعا سۇيەنىپ جۇرەدى. ماقسات – نارىق سۇرانىسىنا ساي باعدارلامالاۋ مەن زاماناۋي سيفرلىق داعدىلاردى مەڭگەرتۋدى جولعا قويۋ.

ءبىر تەرەزە قاعيداتىمەن جۇمىس ىستەيتىن مەملەكەتتىك جانە سەرۆيس قىزمەتتەرى ورتالىعىندا شامامەن 20 مەكەمە قىزمەت كورسەتىپ وتىر. سول جەردە 12–18 جاس ارالىعىنداعى وقۋشىلارعا ارنالعان TUMO Center اشۋ جوسپارى تانىستىرىلدى. جاسوسپىرىمدەر گەنەراتيۆتى جي، باعدارلامالاۋ، انيماسيا، 3D-مودەلدەۋ جانە روبوتوتەحنيكا باعىتتارىن تەگىن وقي الادى. جوبا Astana Hub-پەن بىرلەسىپ ىسكە اسادى، العاشقى ورتالىق استانادا جۇمىس ىستەپ تۇر.

ءقاۋىپسىز قالاعا – وتاندىق شەشىمدەر

مينيستر «پەرسپەكتيۆا» عىلىمي-وندىرىستىك بىرلەستىگىنىڭ قىزمەتىمەن دە تانىستى. كومپانيا بەينەباقىلاۋ، ۆيدەواناليتيكا جانە قاۋىپسىزدىك بويىنشا باعدارلامالىق-اپپاراتتىق شەشىمدەر ازىرلەپ كەلەدى. «ءقاۋىپسىز قالا»، «سيفرلىق پوليسەي»، «اقىلدى قالا»، «سيفرلىق ۋچاسكەلىك»، ۇلتتىق بەينەمونيتورينگ جۇيەسى جانە «ءقاۋىپسىز مەكتەپ» سەكىلدى جوبالارعا كومپانيا قاتىسىپ وتىر.

ينسيدەنتكە جەدەل جاۋاپ بەرەتىن ورتالىق

ساپار سوڭىندا قوعامدىق قىزمەتتەردىڭ ساپاسىن كوتەرىپ، توتەنشە جاعدايلارعا جەدەل ارەكەت ەتۋگە ارنالعان ءبىرىڭعاي ۇيلەستىرۋ ورتالىعى كورسەتىلدى. وسىنداي ارحيتەكتۋرا تۇكش ديسپەچەرلىك ورتالىعىمەن ءتۇيىسىپ، قالا ينفراقۇرىلىمىن كەشەندى باسقارۋعا مۇمكىندىك بەرۋى ءتيىس.

ءوڭىردىڭ باعىتى: جي ارقىلى تيىمدىلىك ارتتىرۋ

قاراعاندى وبلىسىنىڭ اكىمى ەرماعانبەت بولەكپايەۆ وڭىردە سيفرلىق ترانسفورماسيانى جۇيەلى تۇردە ىلگەرىلەتىپ جاتقانىن ايتتى. «پرەزيدەنت جولداۋىندا جاساندى ينتەللەكت نەگىزىندە قازاقستاندى سيفرلىق ەلگە اينالدىرۋ مىندەتى قويىلدى. ءبىز ەكونوميكا مەن باسقارۋ جۇيەسىنە ءتيىمدى ينتەللەكتۋال ونىمدەردى كەڭىنەن ەنگىزۋدى كوزدەپ وتىرمىز. وبلىستا سيفرلىق ترانسفورماسيا كارتاسى مەن «اقىلدى قالالار» ستراتەگياسى بەكىتىلدى. ءبىز يي-اگەنتتەردى كوبەيتۋگە ەمەس، ولشەنەتىن ناتيجە بەرەتىن نەيروجەلىلەر مەن اناليتيكالىق مودەلدەردى تاجىريبەلىك دەڭگەيدە قولدانۋعا باسىمدىق بەرىپ وتىرمىز»، – دەدى ءوڭىر باسشىسى.

قاراعاندى ۇسىنىلعان ديسپەچەرلىك ورتالىقتى ءبىرىنشى بولىپ ىسكە قوسسa، جوبانى باسقا قالالار ءۇشىن ۇلگى ەتۋ جانە ەل كولەمىندە تاراتۋ مۇمكىندىگى ارتا تۇسپەك.

بۇل تۋرالى Qamshy.kz اقپارات اگەنتتىگى حابارلايدى.