Қазақстанның еңбек сіңірген қайраткері, музыкант, "Мюзикола" тобының негізін салған Болат Сыздықовпен қоштасу рәсімі Жамбыл атындағы Қазақ мемлекеттік филарморниясында өтті.

Филарморния ғимаратының алдында әртістің жақын достары, әріптестері және тыңдармандары жиналды. Көңіл айту үшін танымал қайраткерлер, әртістер, әншілер келді. Атап айтқанда, Карина Абдуллина, Ренат Гайсин, Асылбек Еңсепов, Жәмила Серкебаева, Парвиз Назаров, Бауыржан Шүкенов, Болат Әбілов және "Дос-Мұқасан" тобының мүшелері. Сонымен қатар, шараға Алматы әкімі Бауыржан Байбек қатысты. 

Белгілі қазақстандық гитарашы, композитор және "Мюзикола" тобының аранжирлеушісі, "А’Студио" тобының бұрынғы мүшесі Болат Сыздықов Қарағандыда 1956 жылы 21 маусымда дүниеге келген. Бала кезінен музыкамен айналысқан, атақты оқытушы Александр Мажелянның джаз гитарасы курсын бітірген. 16 жасында Болат Қарағандыдағы филармонияға жеке ән орындаушысы болып қабылданады, сонымен қатар "Гәкку" ансамблінің құрамымен гастрольдік сапарларда жүрді.

1976 жылы Болат Республикалық "Гүлдер "жастар ансамблінің шақыртуымен Алматыға келеді. Болат атақты Роза Рымбаева жеке орындаушы болған "Арай" тобының гитарисі болады. 90-жылдардың басында "Алма-Ата" тобы мүшелерінің арасында Болат та болды. Мәскеуге бара салып, жаңа топ танымал болады. Нәтижесінде "Алма-Ата" тобының атауы "А`Студио" болып өзгереді. 1992 жылы Болат Сыздықов өзінің жеке жаңа музыкалық жобасын ашпақ болады. Ол әнші Карина Абдуллинамен бірлесіп, "Мюзикола" тобын құрады. Қазақстан Президентінің жарлығымен 2012 жылдың 5 желтоқсанында Болат Сыздықовқа Қазақстан Республикасының Еңбек сіңірген өнер қайраткері атағы берілді.

Болат Сыздықов Алматыда 2016 жылдың 7 мамырында 60-қа қараған жасында қайтыс болды. Оның өліміне қанның ұюы себеп болған.