Қазақстандық боксшылары арасында, оның ішінде өзіміздің қаракөздер қатарындағы бірі де бірегейі Жанқош Тұраров шығар. Жастайынан үздік шығуға талпынып, білегін бекітіп, кәсіби спортқа, оның ішінде боксқа ден қойғандардың ішіндегі Америка асып, өз бетімен Лас-Вегаста рингте атой салған аз қандастарымыздың да бірі осы – Жанқош.
Әрине, шаршы алаңға шыққаннан кейін әлемде үздік атануды армандамайтын спортшы жоқ. Жанқош та балалық шағынан өз алдына осындай асқақ міндет қойған екен. Қазір ол сол биік арманына жету үшін тер төгіп жүр және «Мен Әлем чемпионы боламын!» деген уәдесін орындаудың алдында тұр. Таяуда отандық сайттардың біріне берген сұхбатында ол: «Арманыма жетуге сәл ғана қалды», – деп ашығын айтқан болатын.
Ол кәсіби рингтегі ең есте қаларлықтай жекпе-жегін Отанымызда, «Алматы-Арена» спорт сарайында өткізгенін мақтанышпен еске алады. «18 мыңға жуық жанкүйерлер жиналды. Бәрі де «Жанқош – жеңімпаз» деп бір адамдай ұрандағандағы толғанысымды, ішкі жан-дүниемнің аударылып түскенін сөзбен жеткізе алмаймын. Мұның қандай бақыт екенін білсеңіз ғой», – деп ағынан жарылады ол.
Жанқош Қазақстанда спорттың дамуына Елбасы зор қолдау көрсетіп отырғанын атап көрсетті, сол үшін Нұрсұлтан Назарбаевқа алғысын жеткізді. "Мемлекетіміз басшысының осындай саясаты арқасында ҚР Мәдениет және спорт министрі А. Мұхамедиұлы қазақстандық спортты және боксты да одан әрі дамыту мақсатында болашағы зор бағдарламаларды жүзеге асыруда", – дейді жеңімпаз боксшы.
– Арыстанбек Мұхамедиұлының өзі министр болып жұмыс істеп жатқан кезең аралығында қазақ спортын көтеру жолында қыруар еңбек сіңірді. Әлемдік, Азия құрлығы біріншіліктерінде де біздің спортшылар өте жоғары көрсеткіштерге қол жеткізді. Мәдениет саласында да бүкіл еліміз бойынша мәні зор, ауқымды шаралар, концерттер өткізілді. Бәрі де аса жоғары деңгейде ұйымдастырылды. Осының барлығы да министрдің тікелей қолдауы нәтижесінде жүзеге асуда, – дейді Жанқош Тұраров.
Дәл қазір ол халықаралық «ЭКСПО-2017» көрмесі аясындағы 9-шы қыркүйекте отандық былғары қолғап шеберлері көшбасшыларының бірі Қанат Исламның белгілі канадалық боксшы Брэндон Кукқа қарсы өткізетін кәсіби бокс кешіне қатысуға қызу даярлық үстінде.