Astanada jaýyzdyqpen óltirilgen stýdent Erasyl Áýbákirovtiń súıiktisi Aıgerim Ábsadyqova Tengrinews.kz tilshisine suhbat berdi, - dep habarlaıdy «Qamshy» portaly.

 Áıgerim Ábsadyqova Erasyldyń árdaıym úılený týraly aıtatynyn eske aldy. Onyń aıtýynsha, olar Óskemendegi mektepte birinshi synyptan bastap tanys kórinedi.  

"Mektepte biz aralasyp turatynbyz. Toǵyzynshy synyptan bastap maǵan kóńilin bildirip júrdi, biraq kezdesip júrmegen edik. (...) Sosyn men Almatyǵa oqýǵa kettim. Almatydaǵy Energetıka jáne baılanys ýnıversıtetinde oqydym. Biz hat almasyp turdyq. Men 2014 jyly oqý bitirip, sol jyly Astanaǵa kóship bardym. Sosyn biz jaqyn aralasa bastadyq. Ol árdaıym qasymnan tabylatyn. Maǵan degen erekshe nazaryn sezetinmin. Ol árqashan "Biz birge bolýymyz kerek" deıtin. Men bastapqy kezde nazar aýdarmaı júrdim. Ol odan da tyǵyz qarym-qatynasta bolǵysy keletinin aıtatyn. Oǵan deıin bári ázil retinde bolatyn, dos bolyp, kezdesip júrdik. Men oǵan osyǵan baılanysty jaqsylap sóıleseıik dedim. Ol jazda úılengisi keletinin, sondyqtan tyǵyz qarym-qatynasta bolǵysy keletinin aıtty. Múmkin men de armandap ketken shyǵarmyn. 4 aqpanda, beısenbi kúni biz kezdesýimiz kerek edi, al juma kúni synyptastarymyzben kezdesemiz dep keliskenbiz. Eger beısenbi kúni sóılessek, aramyzdaǵy jaǵdaıdy synyptastarymyzǵa juma kuni aıtatyn shyǵarmyz dep oıladym", - deıdi Áıgerim. 

Qyzdyń aıtýynsha, Erasyl Jańa jyldan keıin úılený týraly kóp aıta bastaıdy. 

"Ol maǵan unaıtyn. Biz synyptastarymyzǵa aıtpadyq, sýretterimizdi de jasyrdyq. Biraq synyptastarymyz sezetin. Qarashada meniń týǵan kúnim boldy, biz karaokede boldyq, ol ándi jaqsy aıtatyn, maǵan án de arnady. (...) Men ápkesimen, anasymen sóıleskenmin, bir kelgeninde anasy úılerinde áńgime bolǵanyn, januıalarynyń qarsy emes ekenderin aıtqan edi. Ápkesi bolsa "senderdi jazda úılendiremiz dep oıladym" dep aıtqan. Anasy da kelgende "Ony tabamyz, birge ómir súresińder" dedi. Men tipti bul qarym-qatynasymyzdy sıpattap ta bere almaımyn. (...) Aralasyp turdyq, dos boldyq. Dostarymyz kezdesesińder me dep te suraıtyn", - deıdi Áıgerim Ábsadyqova. 

Al kisi óltirý isine baılanysty ustalǵandardy bilesiń be degen suraqqa Aıgerim "Olardy tipti de tanymaımyn. Oqıǵaǵa qatysy bar adamdardyń kim ekenin surastyrǵanymda da dostary bilmeıtin bolyp shyqty. Ózim de olar týraly birinshi ret estidim" dep jaýap berdi. 

"Joǵalyp keter aldynda ol "Qaıyrly tań, ne istep jatsyń?" dep jazǵan edi, óziniń ne istep júrgenin aıtyp otyratyn. Sol kúni olarda ýnıversıtette jınalys boldy. Osydan keıin jazbaı qaldy. Beısenbi kúni dostary maǵan habarlasyp, ony menen surady. Al ózimen birge turǵan dosy úıde onyń túnemegenin aıtty. Al Erasyl oqýdy birinshi orynǵa qoıatyn adam. Ózi de "beısenbi kúni emtıhan tapsyramyn" dep aıtqan. Ol tańǵy beste turyp, sabaǵyna daıyndalatyn. Beısenbi kúni dostarymen birge ony izdeı bastadyq. Eriktiler de, basqa dostary da izdestirýge qosyldy. Úmitimizdi úzbedik. Onyń endi joq ekenine áli kúnge sene almaımyn. Ol óz úıinde júrgendeı sezinemin. Biz Óskemenge jerleýine baryp keldik", - dep túsindirdi Áıgerim. 

Ol áleýmettik jelilerde taralyp jatqan vıdeolarǵa senbeıtinin de aıtyp berdi. 

"5 aqpanda biz polısıany shaqyrttyq, ol eń sońǵylardyń biri bolyp maǵan telefon shalypty. Menen polıseıler kim ekenimdi, sońǵy ret qashan kezdeskenimizdi surap, jaýap aldy. Men Astanaǵa dúısenbi kúni oraldym, biraq keshe jumysqa shyǵa almadym. Sońǵy kezderi uıyqtaı almaı júrmin. Sene alar emespin. Qaryzy da, problemalary ja joq edi. Ol pysyq edi. Án aıtatyn. Eshqashan muń-renishin aıtpaıtyn", - deıdi qyz. 

23 jastaǵy Erasyl Áýbákirovtiń denesi 10 aqpanda jedel-izdestirý jumystarynyń barysynda tabyldy. Qylmys jasady degen kúdikpen tórt adam ustaldy. Olar Aıan Meıirbaev, Andreı Tıhonenko, Vıtalıı Sherstenev jáne Nurbek Ájimbeı. Erasyl Áýbákirov elordadaǵy joǵary oqý ornynyń altynshy kýrsynda oqydy. 3 aqpanda úıinen shyǵyp ketip, qaıta oralmady. Kelesi kúni dostary onyń joǵalyp ketkenin habarlady. Áýbákirov ıntern-hırýrg bolǵan. Stýdenttiń dostary onyń úzdik oqyǵanyn, belsendi bolyp, qatarlastarymen jaqsy qarym-qatynasta bolǵanyn atap ótti.