Májilis depýtaty Qaırat Balabıev zeınetaqy tólemderin kiris kózi retinde sanamaı, zeınetkerlerdiń qaryzyn keshirýi usynyp otyr. 

Depýtat Premer-Mınıstrdiń orynbasary Ermek Kósherbaevtyń atyna depýtattyq saýal joldady.

"Bankterge barsańyz, bar-joǵy 32 myń teńge zeınetaqysy bank kartasyna túspeı jatyp joq bolyp ketken, zar ılegen zeınetkerlerdi kóresizder. Jaǵdaıdy zerttesek, zeınetaqy "kiris kózi" bolyp sanalady jáne zeınetaqy áleýmettik qorǵalǵan esepshot sanatyna jatqyzylmaǵan. Áleýmettik qorǵalǵan esepshottardy  ashý tek "Kaspı bank", "Halyq banki" jáne "Sentr kredıt" bankterine bekitilgen. Bul bankterdiń fılıaldary turmaq, bankomattary joq jer kóp. Barlyq jerde bankomattary bolmasa da, bólimsheleri bar "Qazposhta"  áleýmettik qorǵalǵan esepshottardy ashýǵa bolatyn tizimge  enbegen. Bul qasaqana jasalǵan áreket emes pe?", – dedi ol.

Qaırat Balabıevtiń aıtýynsha, eldegi mıkroqarjy uıymdary aılyqtan-aılyqqa dep az aqsha berip aldap, aınaldyrǵan 30 myń teńgeni tóleı almasa da, oǵan on eselep ósim qosyp, qaryzǵa batyryp jatyr. 

"Eshbir tabys kózi joq azamattarǵa ýaqytsha kómek bolǵanymen, ońaılyqpen qutylmaıtyn qaryzǵa aınalyp ketetinin kópshilik bile bermeıdi. Biraq, bul bizdiń buqaranyń toqtyǵyn kórsetpeıdi", – dedi depýtat.