AQSH prezıdenti Donald Tramptyń ákimshiligi soǵys saldarynan elge bas saýǵalap kelgen 240 000-ǵa jýyq ýkraınalyqty ýaqytsha quqyqtyq mártebesinen aıyrýdy josparlap otyr. Bul olardy deportasıalaý qaýpin týdyrýy múmkin.

Basylymnyń jazýynsha, bul sheshim AQSH-ta sáýir aıynda qabyldanýy múmkin. Degenmen ýkraınalyqtardy qorǵaý sharalaryn toqtatý Tramp pen Ýkraına prezıdenti Vladımır Zelenskıı arasyndaǵy ótken aptadaǵy janjaldan buryn bastalǵan.

Derekkózderdiń aıtýynsha, bul – Tramp ákimshiliginiń Baıden bıligi kezinde ýaqytsha gýmanıtarlyq baǵdarlamalar aıasynda AQSH-qa kirýge ruqsat alǵan 1,8 mıllıonnan astam mıgrantty legaldyq mártebesinen aıyrýǵa baǵyttalǵan áreketiniń bir bóligi.

AQSH İshki qaýipsizdik mınıstrliginiń baspasóz hatshysy Trısha Maklaflın ázirge bul máselege qatysty eshqandaı resmı málimdeme jasalmaǵanyn aıtty.

Alaıda mıgranttar jedeldetilgen deportasıa prosedýrasyna tap bolýy múmkin.  Bul baǵdarlamalar 240 000 ýkraınalyqty, sondaı-aq 530 000 kýbalyq, gaıtılik, nıkaragýalyq jáne venesýelalyq mıgranttardy qamtyǵan. Buǵan qosa, 70 000-nan astam aýǵan bosqyny da osy baǵdarlamalar arqyly AQSH-qa kelgen.