Búgin, QR Qarýly Kúshteriniń Joǵarǵy Bas Qolbasshysy N.Nazarbaevtyń nusqaýlaryna sáıkes Qazaqstannyń Qarýly Kúshterinde «Aıbalta – 2016» iri aýqymdy jedel-taktıkalyq komandalyq-shtabtyq oqý-jattyǵýy bastaldy, - dep habarlaıdy «Qamshy» portaly Qorǵanys mınıstrliginiń baspasóz qyzmetine silteme jasap. 

Oqý-jattyǵý daǵdarystyq ahýaldardy oqshaýlaý kezinde áskerlerdiń is-qımyldary máselelerin pysyqtaýǵa baǵyttalǵan.

Oqý-jattyǵý alǵash ret jaýyngerlikke jaqyndatylǵan jaǵdaılarda qysqy ýaqytta ótkizilýde. Bul oqý-jattyǵýdyń erekshelikteri úlken qashyqtyqtarǵa qaıta toptasýy jáne jedel áýeaılaqtarǵa maıdandyq avıasıanyń kóshirilýinen keıingi áskerlerdiń is-qımyldary, kúrdeli qysqy jaǵdaıdaǵy is-qımyldar boldy.

«Oqý-jattyǵýǵa «Astana» óńirlik qolbasshylyǵy, Aeroutqyr áskerleri, «Shyǵys» óńirlik qolbasshylyǵy qatysýda. Sondaı-aq, biz Shekara áskerlerin, Ulttyq ulan men Áýe qorǵanysy kúshterin tarttyq. Biz oqý-jattyǵýdy tómen temperatýrada, qysta jáne áskerler úshin tańsyq jerde ótkizdik. Sondyqtan áskerlerdi biz komandırlerdiń bul jerdi bilmeıtindeı etip tańdadyq. Birqatar jekelegen batalóndar ońtústikten Merki, Arystan, birqatar batalón, dıvızıon batystan keldi. Olar qazir kelip jatyr, tıelip bitedi jáne belgilengen aýdandarǵa shyǵady.  Negizi maqsat – kúrdeli jaǵdaılarda jumys jasaý úshin shtabtardy, áskerlerdi daıarlaý, sondaı-aq jaýyngerlikke jaqyndatylǵan, qysqy temperatýrada áskerı operasıalardy josparlaýǵa úıretý», - deıdi QR QK Qurlyq áskerleriniń bas qolbasshysy general-leıtenant Murat Maıkeev.

Oqý-jattyǵý 2016 jylǵy aqpannyń 22-i men 26-y aralyǵynda udaıy ornalasý pýnktterinde, qozǵalý baǵdarlarlary men «Shyǵys», «Saryózek» jáne «Spassk» polıgondarynda ótedi.

Barlyǵy oqý-jattyǵýǵa 5 myńǵa jýyq adam, 1 500-den asa birlik qarý-jaraq pen áskerı tehnıka jáne shamamen 30 birlik avıasıalyq tehnıka tartylady.

«Búgin bólimdi jaýyngerlik ázirliktiń joǵary dárejesine keltirý jónindegi is-sharalar ótkizildi. Biz kórsetilgen aýdanǵa marsh jasaýǵa oqý-jaýyngerlik tapsyrma aldyq. Onda jaýyngerlikke jaqyndatylǵan jaǵdaılarda bólim shtabymen jaýyngerlik is-qımyldardy josparlaý júrgiziledi, al bólimshelerdiń jeke quramy oqý-jattyǵý boıynsha shartty qarsylasty is júzinde joıý jónindegi tapsyrmalardy oryndaıdy. 177 adam jáne 52 birlik tehnıka tartylady. Oqý-jattyǵýdaǵy artılerıashylardyń mindeti shartty qarsylasty atyspen qoldaý, jalpyáskerı bólimsheler men bólimderdi qoldaý», - dep 28738 áskerı bóliminiń komandıri podpolkovnık Janat Rasqulov atap ótti.

Osy aptada oqý-jattyǵýdyń negizgi kezeńderi ótetinin aıta keteıik. Onda áskerı qyzmetshiler áskerlerdiń dalalyq mashyǵyn, kúrdeli qysqy jaǵdaıda is-qımyl jasaý kezinde jeke quramnyń moraldyq-psıhologıalyq turaqtylyǵy men fızıkalyq turǵydaǵy tózimdiligin arttyrady.