M.Áýezov atyndaǵy Qazaq memlekettik akademıalyq drama teatrynda İ. Esenberlınniń 100 jyldyǵyna oraı “Almas qylysh” tarıhı dramasy alǵash ret sahnalanbaq, - dep habarlaıdy «Qamshy» portaly teatrdyń baspasóz qyzmetine silteme jasap.

Kórnekti jazýshy İ.Esenberlınniń ataqty «Almas qylysh» romany jelisimen qoıylǵan spektákl Qazaq eliniń irgetasy qalanýyn beıneleıdi. XV ǵasyr ortasy. Deshti-Qypshaq dalasy. Ábilhaıyr handyǵyndaǵy tolassyz qan tógis soǵystar, ishki qyrqystar men aıaýsyz ezgiden halyq aýyr kúızeliste.  Al, han óz taǵyn saqtap qalý úshin qol astyndaǵylardy bir-birine aıdap salyp otyrady.  Osyndaı almaǵaıyp kezeńde Kereı men Jánibek sultandar qazaq rýlarynyń basyn qosyp bólek el bolmaqqa bekinedi. Moǵolstan hany Esenbuǵamen kelisimge kelip, azattyq ańsaǵan qazaq rýlaryn bastap batys Jetisý jerindegi Shý men Talas óńirine qonys aýdarady. Spektákl jeke óz aldyna handyq qurý jolynda nebir tar jol, taıǵaq keshýden ótip, uly tarıh kóshinen óziniń laıyqty ornyn alǵan halqymyzdyń rýh myqtylyǵyn pash etedi.

«Qoıylymnyń rejıseri – QR eńbek sińirgen qaıratkeri Alma Kákisheva, sahnalyq nusqasynyń avtory – Ánnás Baǵdat, qoıýshy-sýretshisi – Murat Saparov, kompozıtory – Sh.Bazarkýlova», - delingen baspasóz qyzmeti taratqan habarlamada.