Pavlodarda jol polısıasy qyzmetkerleri urlanǵan kóliktiń izine túip, talapqa baǵynbaǵan júrgizýshi basqarǵan kólikti soǵyp toqtatty, - dep habarlaıdy «Qamshy» portaly.

Oqıǵa keshe bolǵan. Polısıaǵa Olgınka aýlynan Deý-Matız markaly kólik urlanǵany týraly habar túsedi. Kólik Pavlodar-Lebáje tasjoly boıymen oblys ortalyǵyna qaraı ketip bara jatqany belgili bolady.

Joǵary jyldamdyqpen ketip bara jatqan kólik júrgizýshisi polısıa qyzmetkerleriniń toqtaý týraly talaptaryna qulaq aspaıdy.

«İzine túsken kezde mashına qala kóshelerimen joǵary jyldamdyqpen júrýin jáne jol erejesin buzýyn toqtatpady. Kóshelerdiń birinde ol Toıota-Kamrı kóligimen soqtyǵysty. Aqyrynda polısıanyń Ýaz markaly arnaıy kóligimen tosqaýyl qoıý arqyly toqtatyldy», - delingen polısıa taratqan habarlamada.

Alaıda, polıseılerdiń biri toqtaǵan kóliktiń esigin ashqan kezde júrgizýshi qaıtadan júrip ketip, polıseıdi biraz jerge deıin súırep ketken.