«28 panfılovshylar» týraly ańyzdy joqqa shyǵarǵan Reseı Memlekettik muraǵatynyń basshysy Sergeı Mıronenko laýazymynan bosaǵanyn aqparat quraldary jarysa jazýda.

Muraǵat basshylyǵynan bosaǵan S. Mıronenko budan bylaı sol mekemede ǵylymı qyzmetshi retinde jumysyn jalǵastyratyn bolady.

Azattyqtyń orys redaksıasyna bergen suhbatynda ol laýazymdy qyzmetten ketkenmen, byltyrǵy aıtqandarynan aınymaıtynyn, áli de ótirik tarıh jasaǵysy kelmeıtinin málimdegen. Iaǵnı, qansha qyzmetten qý, qansha jerden teristese de, tarıhta bolmaǵan, oıdan qurastyrylǵan «28 panfılovshylar» erligi degen ańyzdy moıyndamaıtynyn, halyqty budan ári aldaýǵa ary shydamaıtynyn aıtqan.

Bári durys. Muraǵat basshysy óz oıyn aıtty jáne ol oıy jalań pikir ne uran emes, KSRO Bas prokýratýrasy bastaǵan resmı mekemelerdiń muraǵat derekterimen qýattalady.  

Olaı bolsa, osy oqıǵa týraly aqparattarǵa ımandaı senip júrgen bizge ne joq?! KSRO halqy Uly Otan soǵysy ataǵan Ekinshi dúnıejúzilik soǵysqa 1 196 164 adam attandyrǵan (bul sol kezdegi QazaqKSR halqynyń (6,5 mln) 20 paıyzyna teń), olardyń 601 939-y maıdan dalasynda kóz jumdy) Qazaqstanda ulyqtaıtyn basqa batyr joq pa? Úlgi eter tulǵa tappadyq pa? Qasym Qaısenov, Raqymjan Qoshqarbaev, Baýyrjan Momyshuly, Tólegen Toqtarov, Álıa Moldaǵulova, Mánshúk Mámetova bastaǵan qazaq batyrlarynyń esimderi odaqtas elderdiń barlyǵyna aıan emes pe? Maıdannan tys tyldaǵy tógilgen ter men besikten beli shyqpaı jatyp aýyr eńbekke aralasqan jas taǵdyrlar she?

Olaı bolsa, Almaty ortalyǵyndaǵy 28 panfılovshylar atyn ıelengen saıabaqty basqasha ataıtyn ýaqyt keldi emes pe? Tek Almatydaǵy ǵana emes, tutastaı respýblıka aýmaǵyndaǵy ásem de úlken saıabaqtyń birin tarıhy kúmándi oqıǵaǵa telýimiz tek tarıhqa ǵana emes, ulttyq sana men jańa zamandaǵy tól ıdeologıamyzǵa qıanat emes pe?

Bıylǵy jyly el aýmaǵynda ataýly datalar birinen soń biri kelip otyr. Ult-azattyq kóterilistiń 100 jyldyǵy, Jeltoqsan kóterilisiniń 30 jyldyǵy, Táýelsizdiktiń 25 jyldyǵy, Alash kósemi Álıhan Bókeıhanulynyń 150 jyldyǵy memlekettik, aldy halyqaralyq deńgeıde atalyp ótýde. Arý qalamyz Almaty 1000 jyldyq tarıhyn resmı merekeleý ústinde. Keler jyly Alash avtonomıasynyń 100 jyldyǵy kele jatyr degendeı.

Osy aıtýly oqıǵalardyń mán-mańyzyn qoǵam sanasyna sińirý, ulttyq qundylyqtar men tarıhı tulǵalarymyzdyń esimderin ulyqtaý maqsatynda qala basshylyǵy keńestik ıdeologıa syrqatynan ada, egemen eldiń táýelsiz qundylyqtaryna qyzmet etetin naqty sheshim shyǵarady dep senemiz. Otarlaýshy eldi qorǵaýǵa shaqyratyn (Velıka Rossıa, a otstýpat nekýda  - pozadı Moskva!) jalǵan urannyń endigi jerde bas qalamyzdyń tórinde turatyn reti joq.

Jomart Abdollauly