Qonaev qalasynyń Qurmetti azamaty, belgili kásipker Murat Sirgebaev respýblıkalyq referendým kúni erekshe bastama kóterip, retrokólikterden quralǵan avtosherý uıymdastyrdy.

Qala kóshelerimen júrip ótken sáni kelisken kóne avtomobılder kópshiliktiń nazaryn aýdardy. Sırek kezdesetin retrokólikterdi kórgen turǵyndar qyzyǵa qarap, sýretke túsip, erekshe áser aldy. Kópshilik úshin bul kún tek mańyzdy saıası oqıǵa ǵana emes, sonymen birge kóterińki kóńil kúı syılaǵan merekelik sátke aınaldy. Osylaısha, Qonaev qalasynda jaǵymdy, pozıtıvti atmosfera qalyptasty.

Aıta ketý kerek, Murat Sirgebaev – qalada óz kásibin tabysty júrgizip otyrǵan iri kásipkerlerdiń biri. Ol qaıyrymdylyq sharalaryna belsendi qatysyp, shahardyń qoǵamdyq ómirine turaqty túrde úles qosyp keledi. Sonymen qatar qaladaǵy erekshe nysandardyń biri – retrokólikter mýzeıiniń negizin qalaǵan.

Elge sińirgen eńbegi men qoǵamdyq belsendiligi úshin ol Qonaev qalasynyń Qurmetti azamaty ataǵyna ıe bolǵan.

Kásipker referendým kúni óz ýchaskesine baryp, azamattyq tańdaýyn da jasady.

«Búgin men respýblıkalyq referendýmǵa kelip, óz daýysymdy berdim. Kásipker retinde elimizdegi turaqtylyq pen zań ústemdigi bıznestiń damýyna tikeleı áser etetinin jaqsy túsinemin. Memleketimizdiń damýyna qatysty mańyzdy sheshimder qabyldanatyn kezde bárimizdiń jumylǵanymyz durys», – dedi Murat Sirgebaev.