Marat Sultanǵazıev respýblıkalyq referendým aıasynda daýys berdi. Óńir basshysy Qonaev qalasyndaǵy №949 referendým ýchaskesine baryp, óz tańdaýyn jasady. Aımaq basshysy bul kúnniń el úshin mańyzy erekshe ekenin atap ótti.

«Búgin elimiz úshin asa mańyzdy tarıhı sát. Ózim tirkelgen referendým ýchaskesine baryp, Almaty oblysy turǵyny ári osy eldiń azamaty retinde tańdaýymdy jasadym. Ár azamattyń tańdaýy memleketimizdiń turaqtylyǵy men damýyna negiz bolady», – degen Marat Eleýsizuly Almaty oblysynda bul naýqandy uıymdastyrý úshin aýqymdy jumystar atqarylǵanyn baıandady.

«Óńirde jalpy sany 677 referendým ýchaskesi ashyldy. Onyń ishinde aýrýhanalar, áskerı bólimder men áleýmettik oryndarda 36 ýchaske jumys istep tur. Daýys berý prosesin júrgizýge tartylǵan 4781 mamannyń barlyǵy arnaıy oqýdan ótip, daıyndyqtaryn pysyqtady. Sondaı-aq 16 qoǵamdyq uıym ókili baqylaý júrgizýde.

Turǵyndarǵa yńǵaıly bolýy úshin sıfrlyq múmkindikter de qarastyrylǵan. Ýchaskelerdiń basym bóligi azamattardy tekserý júıesine qosylǵan. Qonaev, Esik, Talǵar, Qaskeleń qalalary men Ótegen batyr kentindegi 5 ýchaskede turǵyndardy tikeleı sol jerde tizimge qosý múmkindigi bar. Oblys boıynsha referendýmǵa qatysý quqyǵy bar 1 mıllıonnan astam azamat tizimge enip, olardyń barlyǵyna shaqyrtýlar taratyldy. Múmkindigi shekteýli jandardyń kedergisiz daýys berýine erekshe kóńil bólindi. Oblystaǵy 2320 múgedektigi bar azamat úshin ýchaskelerde arnaıy pandýstar, yńǵaıly kabınalar men kórý, estý qabileti nashar jandarǵa arnalǵan kómekshi quraldar men belgiler ornatyldy», – degen oblys ákimi ózgeris jaýapkershilikten bastalatynyn, jańartylǵan Konstıtýsıa árqaısymyzdyń quqyǵymyzdy nyǵaıtyp, memlekettiń halyq aldyndaǵy mindetin aıqyndaı túsetinin jetkizdi.

Aıta keteıik, búgin Qazaqstan boıynsha Jańa Konstıtýsıa jobasyna qatysty respýblıkalyq referendým ótip jatyr. Kámelet jasyna tolǵan árbir azamat óz tańdaýyn jasaýǵa quqyly.