Mańǵystaý oblysynda respýblıkalyq referendým ótken kúni kópbalaly otbasylardyń birinde ul bala dúnıege kelip, oǵan Atazan esimi berildi.

Náreste – otbasyndaǵy toǵyzynshy perzent. Ul bala 4130 gram salmaqpen, 57 santımetr boımen ómirge keldi. Dárigerlerdiń aıtýynsha, anasy men sábıdiń jaǵdaıy jaqsy, ózderin qalypty sezinedi jáne mamandardyń baqylaýynda.

Balanyń dál osy kúni dúnıege kelýi otbasy úshin erekshe ári sımvolıkalyq oqıǵa boldy.

«Ulymyz el úshin mańyzdy kúni dúnıege keldi. Sol sebepti bul kún otbasymyzdyń tarıhynda máńgi saqtalsyn dep oǵan Atazan dep at qoıdyq. Bolashaqta elin súıetin, Otanǵa paıdasyn tıgizetin azamat bolyp ósse deımiz», – dedi náresteniń anasy.

Ata-anasynyń aıtýynsha, uldarynyń el úshin mańyzdy kúni dúnıege kelýi olar úshin úlken qýanysh ári ómir boıy este qalatyn sát bolǵan.

Perzenthana dárigerleri ata-anany qýanyshty jańalyqpen quttyqtap, sábıge myqty densaýlyq, amandyq jáne baqytty balalyq shaq tiledi. Medısına qyzmetkerleri deni saý balanyń dúnıege kelýi – árdaıym otbasy úshin de, dárigerler úshin de úlken qýanysh ekenin atap ótti.

Aıta keteıik, Mańǵystaý oblysynda ana men balany qoldaýǵa erekshe kóńil bólinedi. Óńirde kópbalaly otbasylarǵa ómir sapasyn arttyrýǵa jáne balalardyń ál-aýqatyn jaqsartýǵa baǵyttalǵan túrli áleýmettik qoldaý sharalary qarastyrylǵan.

Kishkentaı Atazannyń dúnıege kelýi otbasy úshin taǵy bir qýanyshty oqıǵa bolyp, el ómirindegi mańyzdy qoǵamdyq-saıası kúnde bastalǵan jańa ómirdiń sımvolyna aınaldy. Týystary men jaqyndary ata-anany qýanyshymen quttyqtap, sábıge baqytty ári jarqyn bolashaq tiledi.