Albanıanyń Memlekettik saılaý komısary Qazaqstandaǵy referendýmnyń ashyqtyǵy men tarıhı mańyzyn atap ótti.

Qazaqstanda ótken respýblıkalyq referendýmnyń ótý barysyn halyqaralyq baqylaýshylar da qadaǵalap jatyr. Solardyń biri - Albanıa Respýblıkasynyń Memlekettik saılaý komısary Ilırdjan Chelıbashı. Ol Qazaqstanǵa Ortalyq saılaý komısıasynyń shaqyrýymen kelgen.

Sheteldik delegasıa Astana qalasyndaǵy birneshe daýys berý ýchaskesinde boldy. Baqylaýshylar barǵan nysandardyń biri - Astana qalasy ákimdiginiń «№119 jalpy bilim beretin mektebi» komýnaldyq memlekettik mekemesinde ornalasqan referendým ýchaskesi.

Ilırdjan Chelıbashı bul onyń Qazaqstanǵa alǵash ret kelýi ekenin aıtty.

«Men Albanıa Respýblıkasynyń Memlekettik saılaý komısary bolyp qyzmet atqaramyn. Qazaqstanǵa Ortalyq saılaý komısıasynyń shaqyrýymen keldik. Bul - meniń de, bizdiń delegasıanyń da Qazaqstanǵa alǵashqy sapary», - dedi ol.

Halyqaralyq baqylaýshynyń aıtýynsha, referendým barysynda kórgen daıyndyq jumystary jaqsy áser qaldyrǵan.

«Biz birneshe ýchaskede boldyq. Daýys berý prosesiniń qalaı ótip jatqanyn kórdik. Komısıa múshelerimen sóılestik, daýys berý tártibi týraly suradyq. Barlyǵy túsinikti túrde uıymdastyrylǵan. Qazirgi kórip otyrǵanymyz boıynsha, daıyndyq jaqsy deńgeıde», - dedi Chelıbashı.

Onyń sózinshe, referendýmnyń naqty baǵasy daýys berý aıaqtalǵannan keıin ǵana beriledi.

«Qorytyndyny kún sońynda ǵana aıtýǵa bolady. Biz áli birneshe ýchaskege baramyz. Biraq qazirgi áserimiz jaqsy, bári tynysh ári retimen ótip jatyr», - dedi halyqaralyq baqylaýshy.

Albanıalyq komısar referendýmdy demokratıalyq talaptardy nyǵaıtýǵa baǵyttalǵan qadam dep baǵalaýǵa bolatynyn aıtty.