Ál-Farabı atyndaǵy Qazaq ulttyq ýnıversıtetinde 15 sáýirde elimizdiń jáne túrki áleminiń tarıhyndaǵy uly qaıratkerlerdiń biri, "Alash" ult-azattyq qozǵalysynyń negizin qalaýshy ári kósemi, saıası qaıratker Álıhan Bókeıhanovtyń týǵanyna 150 jyl tolýyna arnalǵan "Álıhan Bókeıhanov jáne "Alash murasy" atty ǵylymı-tájirıbelik konferensıa ótedi, - dep habarlaıdy «Qamshy» portaly.
Konferensıaǵa Qazaqstan Respýblıkasynyń Memlekettik hatshysy G. N. Ábdiqalyqova, ál-Farabı atyndaǵy QazUÝ rektory, akademık Ǵ. M. Mutanov, QR Mádenıet jáne sport mınıstri A. Muhamedıuly, QR Parlamenti Senatynyń depýtaty, Qazaqstan jazýshylar odaǵynyń tóraǵasy N. M. Orazalın jáne basqa ǵylym, bilim jáne mádenıet qaıratkerleri qatysady.
Konferensıa jumysy «Alash» ult-azattyq qozǵalysy men elimizdiń táýelsizdik alýyna ólsheýsiz úles qosqan qozǵalys kóshbasshylarynyń murasyn taratý men qalyń kópshilikke dáripteýge baǵyttalǵan. Azattyqty ańsaǵan babalarymyzdyń uly muraty Qazaqstan Respýblıkasynyń Birinshi Prezıdenti N.Á.Nazarbaev tusynda júzege asty. Ǵalymdardyń pikirinshe, Prezıdent alǵa tartqan "Máńgilik El" ıdeıasy "Alashtyń" negizgi ustanymy – qazaq bostandyǵymen tyǵyz úndesip jatyr.
Á.Bókeıhanovtyń ozyq oıly ıdeıalary ony Eýropa men Azıanyń kórnekti saıası qaıratkerlerimen bir deńgeıge qoıdy. Búginde onyń 150 jyldyq toıy IýNESKO kóleminde toılanýda. Á. Bókeıhanov patshalyq Reseı ýaqytynda da, keńes úkimeti kezinde de qazaqtardyń erkindigi úshin kúresti. Úsh ret jazaǵa tartylǵan ol 1937 jyly atý jazasyna kesildi. Tek jarty ǵasyr ótkennen keıin ǵana jazyqsyz jaladan aqtaldy.
Konferensıada M. O. Áýezov atyndaǵy Ádebıet jáne óner ınstıtýtynyń dırektory, Ýálıhan Qalıjanuly «Ulttyń uly tulǵasy»; QR BǴM tarıh jáne etnologıa ınstıtýtynyń dırektory, tarıh ǵylymynyń doktory, profesor Hangeldi Ábjanov «Á. Bókeıhanov jáne ulttyq tarıhty zertteý metodologıasy»; QR UǴA korespondent-múshesi, tarıh ǵylymynyń doktory, profesor Mámbet Qoıgeldi «Álıhan Bókeıhan – Qazaq Ulttyq qozǵalysynyń kósemi»; Memlekettik syılyq ıegeri, akademık O. Sábden «Alash ıdeıasy arqyly órkenıetke jańa qadam" atty baıandamalar jasaıdy, sonymen qatar ózge de kóptegen baıandamalar tyńdalady.
Konferensıa aıasynda Á.Bókeıhanovtyń eńbekterine arnalǵan kitap kórmesi ótedi, pýblısıs Muhamedjan Seralın 1911 jyly negizin qalaǵan "Aıqap" jýrnalynyń jańa sanynyń tusaýkeseri bolady.
