Aqtóbede ortalyq bazar mańyndaǵy telefon satatyn jigitter terakt kezinde basty kúdiktige aınalǵan bolatyn. Aqtóbedegi oqıǵa kezinde olardyń barlyǵy qamaýǵa alynyp, tergeý júrgizildi.
Búginde teraktige qatysy joqtyǵy dáleldengender bosap shyǵyp, saýdalaryn jalǵastyryp jatyr. Olardyń syrt pishininde sál ózgeris bar: saqaldary qıylǵan, qysqa balaqty shalbardyń ornyna balaǵy rezeńke trıkolar kıgen.
Olar ózderimen áńgimelesýden bas tartqan joq. Tek sýretke túsirip, attaryn atamaýdy surady.
«Bizdi «saqaldylar» dep ereksheleıtin eshteńe joq. Abaı atamyz da saqal qoıǵan, erikkennen emes shyǵar?! Biz de ózge adamdar sekildi qoǵamnyń múshesimiz. Kún kórý úshin tirshilik jasaımyz. Bireýge zıan keltirý oıymyzda joq. Sizben sóılesý úshin men bes saǵat ýaqyt jumsaýym múmkin. Keıin siz áńgimeme qyzyǵyp, kúıeýge shyqqyńyz kelýi múmkin. Sóılespesten buryn ózińiz oılanyńyz. Maǵan kúıeýge shyqqyńyz kelse, sóılesýge qarsy emespin», - dedi top jigittiń arasynan birinshi bolyp til qatqany.
Din jolyndaǵy jigitterdiń úılenýdi birinshi kezekke qoıatynyn bilgendikten «Sizdiń áıelińiz bar emes pe?», - dep áńgimege tarta tústik. Saqalyn qıdyrǵan jigit óziniń ómiri týraly jaǵdaıdy jaıyp saldy.
«Áıelimniń bary ras. Shúkir, bir emes, eki áıelim, segiz balam bar. Áli eki "vakansıa" bos tur. Boıymda qýat bar kezde kóńilimnen shyqqan qyzdy jar etýge qarsy emespin. Qazir qanshama qyzdar jigitterdiń oıynshyǵyna aınalyp jatyr. Kúıeýge shyǵa almaı júrgen kári qyzdar kóp. Men birneshe áıel alsam, olardy kóńil kóterý úshin ustap otyrǵan joqpyn. Olardy qamqorlyǵyma alyp, balaǵa áke, ózine jar bolamyn. Qolymnan kelgeninshe barymdy aldaryna aparamyn, ash emes. Sondyqtan bos turǵan eki "vakansıany" da toltyrý oıymda bar», - deıdi ol.
Atynyń qupıa qalýyn suraǵan telefon satýshy jigit óziniń áıelderi týraly da aıtyp berdi.
«Din jolyna bet burǵanyma on shaqty jyl boldy. Joldastarymnyń tanystyrýymen kóńilimnen shyqqan qyzben otaý qurdym, tórt balam bar. Jaqynda ǵana kishkentaıly bolyp úıde otyr. Onyń jasy menen tórt jas kishi. Men onymen ımanyna qarap qosyldym. Birinshi áıelimmen eki-úsh jyl turǵannan keıin ózimnen bir jas úlken áıeldi toqal qylyp aldym. Ol buryn turmysta bolǵan. Onyń sulýlyǵy «áıelim bolshy» dep aıtýǵa sebep boldy. Islamda áıel tańdaǵanda ımanyna, sulýlyǵyna, baılyǵyna kóńil bólý kerektigi aıtylady. Onyń balasyna óz balamdaı qaraımyn. Qazir ortaq balalarymyz bar. Maǵan kómektesý úshin qosymsha atelede jumys jasaıdy. Ómirime ókingen emespin. Osy ýaqytqa deıin olar da maǵan ókpelerin aıtyp, renish bildirgen joq. Áıelderim de, balalarym da bir birimen aralasyp turady. Balalarǵa túsindire bilse, eshqandaı renish bolmaıdy. Olar meniń ózderiniń analaryn qalaı syılaıtynymdy, qamqorlyǵymdy kórip ósip keledi. Sondyqtan, balalarym da qyzǵanysh týdyryp kórgen emes», - deıdi ol.
Telefon satýshy jigit lańkestik jasaǵan jastar bireýlerdiń azǵyrǵanyna erip ketti degen pikirde.
«Nege bizdi qoǵamnan bólip qaraıdy? "Saqaldylar" dep jatady. Múmkin bolǵan oqıǵadan keıin adamdarda qorqynyshtyń bolýy zańdy da. Biraq ol oqıǵa kezinde kileń jastardyń qaza tapqanyn ózderińiz bilesizder. Aqyl toqtatpaǵan olar erip ketti. Bári de úılengen, arttarynda balalary qaldy. Sol kúni negizi barlyǵymyzdy da qonaqqa shaqyrǵan bolatyn. Sonda túsinispeýshilikten bolyp tur. Jastar erip ketti, bári qyryldy. Qalǵandaryna osy jaǵdaı sabaq bolady dep oılaımyn»,- dedi ol Aqtóbedegi jaǵdaıǵa baılanysty kóp eshteńe aıta almaıtyndyǵyn túsindirip.
«Sizderdiń meshitke kóp barmaıtyndaryńyz jıi aıtylady. Din týraly bilimdi syrttan alatyndaryńyz, ımamdar pikirimen kelispeı qalatyndaryńyzǵa qatysty da jıi jarıalanyp júr. Buǵan ne aıtasyz?» - degen saýalymyz da jaýapsyz qalǵan joq.
«Nege biz meshitke barmaıdy ekenbiz? Meshit Allanyń úıi, namazdy biz sol jerde oqımyz. Bizdiń ımamdar suraqtyń ózine senimdi jaýap bere almaıdy. Kúmiljip, bireýdi kinálap jatady. Men eshkimdi jamandaǵym kelmeıdi. Biraq meshite qaltaly adamnyń ólgenin tilep otyratyn «shabashnık» ımamdar kóp. Olar din týraly tereńdetip bireýge túsindirmek túgili, ózderi túsinbeıdi. Sondyqtan ádebı kitaptar oqımyz. Men ózimniń dinge qalaı kelip, ımamdarǵa barǵanym esimde. Ol kezde keri pikirler qalyptaspaǵan kez. Meshit pen ımamnyń bólek ekenin sol kezde-aq túsingenmin. Bireýdi qaralamastan buryn, kináni árkim ózinen izdeý kerek»,- dep qoshtasty telefon satýshy jigit.
