Búgin maqala jazý barysynda "DDC" DNQ ortalyǵyna habarlastym. Bul ortalyq negizinen Reseıde ornalasqan. Al, Qazaqstannyń Astana, Almaty qalalarynda fılıaldary bar. "Almatyda balanyń tegin anyqtap beretin DNQ ortalyǵy jumys jasaıdy" dep maqala jazbaqshy, tegin jarnama jasap bermekshi bolǵan men kompanıa qyzmetkerleriniń tarapynan teperish kórdim. Saıttyń qazaqsha nusqasy bolmaǵandyǵyna shaǵymdanǵan meni aqymaq-jyndy qyldy. Shaǵymymdy sanasyzdyqqa balady. Memlekettik til týraly zańdy nazarǵa almady. Jan aıqaıyma, eń bolmaǵanda, jandary ashymady. Sóıtip, bireý meniń búkil energıamdy soryp alǵandaı boldy. Ózimniń kim ekenimdi, ne istep júrgenimdi túsinbeı qaldym. Shoktyń áseri shyǵar... Maqala jaıyna qaldy. Yzaǵa býlyqtym. Reseı Federasıasyna, Máskeý qalasyna qońyraý shaldym. Qyzmetkerleriniń sózin jetkizdim. Bastyqtaryn suradym. Meni tergeýge aldy. Tergeýlerine tózimdilik tanytyp, istiń mán-jaıyn aıttym. Reseılikter qazaq orystaryna qaraǵanda meıirimdileý eken. Etıka degennen habarlary joq emes. Muń-zarymdy bastyqtaryna jetkizetin boldy (shetelde eken). Óz kezekterinde, qazaq tilinde aqparat kerek bolsa, qazaq tildi mamandar bar ekenin jetkizdi. Biraq ol endi men úshin mańyzdy emes bolyp qaldy. Saıttarynyń qazaq tildi nusqasy bolýyn talap ettim.
Astana, Almaty qalalarynyń qyzmetkerlerimen aramyzda bolǵan dıalog:
- dnk-center.kz saıtyn ashyp otyrmyn. Jýrnalıspin. Saıttyń qazaqsha nusqasy bar ma? Qazaq tilinde aqparat kerek edi.
- Joq.
- Nege?
- Saıtymyz orys tilinde. Saıtty qaı tilde jasaıtynyn kompanıa ózi sheshedi. "Qazaq tilinde saıttyń nusqasy kerek" dep talap ete almaısyz.
- Qyzyq, nege?!
- Sebebi bul bizdiń quqyǵymyz.
- Qazaqstanda turǵandyqtan qazaqstandyq kez kelgen aqparatty memlekettik tilde alýǵa quqyly. Ony bilmep pe edińiz?
- Kompanıa aqparatty ózi qalaǵan ıaǵnı orys tilinde berýge, jarıalaýǵa quqyly.
- Oryssha bilmeıtindermen ne isteımiz? Olar aqparatqa zárý delik.
- Kerek bolsa oryssha túsinip alady.
- Túsinbese she?
- Óziniń problemasy.
- Bul sizdiń oı-pikirińiz be? Álde búkil kompanıa atynan sóılep tursyz ba?
- Siz nege sonsha shamdanasyz?! Oryssha jaqsy-aq sóılep tursyz.
- Men aǵylshynsha da sóıleımin. Siz she?
- Azdap túsinemin.
- Kompanıanyń shetelde fılıaldary bar ma?
- Bar.
- Latvıa, Shvesıa, AQSH-taǵy saıttaryńyz tek orys tilinde me?
- Qazaq tilinde aqparat kerek bolsa qazaq tildi admınıstratordyń nómirin bereıin.
- Men qazaqsha bar aqparatty ýaqytty joǵaltyp, telefon arqyly emes saıttan aq alyp oqyǵym keledi. Oǵan ne deısiz?
- Menen ne qalaısyz?
- Eń úlken bastyqtaryńyzdyń aty-jónin, nómirin berińizshi. Sizdiń memlekettik tilge qatysty kózqarasyńyzdy basshylyqqa jetkizbekshimin. Olar ne deıdi eken?!
- Aty-jóni saıtta kórsetilgen.
- Aıtý qıyn ba? Nómiri she?
- Nómirin bere almaımyn.
- Bul qupıa aqparat pa?
- Bul Reseı kompanıasy.
- Meıli AQSH-tyki. Vashıngtonǵa zvondaýǵa daıynmyn.
Paýza. Tutqany qoıa saldy. Telefonnyń jalyqtyratyn gýili oınaı bastady.
Sóz sońy: Men kimmin? Qaıda turamyn? Ne istep júrmin ózi?...
Jazıra Baıdaly
