Elbasy japon haqy hrızontema Japon jurty baqyt gúliniń jańa túrin ósirip, oǵan Prezıdent Nursultan Nazarbaevtyń esimin berdi. Kúnshyǵys eliniń halqy úshin hrızantemanyń orny erekshe. Óıtkeni Japonıanyń eltańbasynda dál osy gúl beınelenip, eldiń jáne ımperatordyń kórinisi retinde qalyptasqan. Sondyqtan japondyqtar jylda baqyt gúliniń jańa tuqymyn oılap taýyp, odan ári kórikti bolýyna kúsh salyp jatyr. Sońǵy bes jyldan beri elý myń gúldiń ishinen ádemiligimen áıgilengen hrızantemanyń endigi ataýy - «Prezıdent Nazarbaev». Ony Kaıdzýka qalasynyń bıligi jurtshylyqqa arnaıy tanystyrdy. Baqyt gúliniń jańa túri Prezıdent Nazarbaev dep atalady.
Bul týraly 24.kz arnasy habarlaıdy.
Osy ýaqytqa deıin birde-bir álemdik saıasatker mundaı qurmetke ıe bolmaǵan. Elbasynyń esimi berilýinde aıtarlyqtaı qupıa joq. Japondyqtar Nursultan Nazarbaevty beıbitsúıgish prezıdent retinde tanıdy. Sol sebepti bul ataqty Elbasyǵa laıyq kórgen.
Jýnsýke Kıshıvakı, gúl ósirý óndirisiniń prezıdenti: - Biz eń joǵarǵy surypty gúlge Nazarbaev ataýyn berýdi jón sanadyq. Óıtkeni sizderdiń Prezıdentterińizdiń boıynan kemeńgerlikti, danalyqty kóremiz. Jurt bul gúldi baqyttyń jáne aqyldylyqtyń belgisi dep biledi. Mine osyny eskerip, sondaı-aq eki eldiń qarym-qatynsynyń ary qaraı nyǵaıýyn kózdep, osy ataýdy berýdi uıǵardyq.
Búginnen bastap kompanıa saıtynda Nazarbaev dep atalatyn jańa brend paıda boldy. Endi elbasynyń esimimen japon halqy keńinen tanysady. Sóıtip bul gúl ǵasyrdan-ǵasyrǵa jalǵasyp, el jadynda máńgi qattalady. Japondar baqyt gúliniń tarıhyn jáne olarǵa berilgen ataýlaryn esh ýaqytta umyt qaldyrǵan emes. Tipti osy hrızantema týraly ańyzdy aqıqatqa balaıdy. Japon halqynyń aýyzdan-aýyzǵa taraǵan ańyzyna súıensek, ertede Qytaıdy qatal ımperator bılegen. Kúnderdiń-kúnderinde ol teńizdiń arǵy jaǵynda sıqyrly gúl baryn biledi.
Onyń shyrynyn ishken adam máńgi jasaıtynyn estip, sol ósimdikke qalaıda qol jetkizýge talpynady. Biraq ony tek júregi aq, sezimi pák adam julý kerek bolady. Sóıtip Qytaı bıleýshisi gúldi ákelýge 300 bozbala men boıjetkendi jóneltedi. Alaıda olar sol ketken kúıi qaıta elderine oralmaıdy. Óıtkeni gúldiń ádemiligine tánti bolyp, osy araldy máńgi meken etip qalyp qoıady. Sol ýaqyttan beri japon halqynyń bul gúlge degen iltıpaty men mahabbaty erekshe. İs-sharaǵa kelgen turǵyndar «Prezıdent Nazarbaev» gúliniń sulýlyǵyna tańdaı qaqty. Uzyndyǵy 1 metr 85 santımetr bolsa, dıametri 30 santımetrden asady.
Iamamorı Toekadzý, Izýmı qalasynyń turǵyny: - Mundaı is-shara bizdiń qalada jylda bolyp turady. Birde-bireýinen qalyp kórmeppin. Osy joly árıne úlken hrızontemaǵa kózim tústi. Ádemilik dep osyny aıt. 1876 jyly Imperator Meıdzı gúldiń ádemiligin joǵary baǵalap, abyroıyn asyrdy. Dálirek aıtsaq, eń úlken marapattardy hrızantemamen baılanystyrdy. Sol ýaqyttan beri ol nagrada sanaýly saıasatkerge tapsyrylǵan. Sonyń biri - bizdiń Elbasy Nursultan Nazarbaev. 2008 jyly Imperator Akıhıto Qazaqstan Respýblıkasynyń Prezıdentine Úlken lentadaǵy Hrızantema ordenin taqqan edi. Osydan-aq baqyt gúliniń baǵasyn baǵdarlaı bilýge bolady.
