Venesýelanyń ońtústik shyǵysynda Anhel dep atalatyn dúnıejúzindegi eń bıik sarqyrama bıikten qulaı aǵýda. Bul jerde tabıǵattyń tylsym da ǵajaıyp kórinisin tamashalaýǵa bolady.

Bul sarqyramany eýropalyqtar alǵash ret osydan úsh-tórt ǵasyr buryn kórgen. Biraq ol zamannan sarqyrama týraly eshqandaı jazba qalmaǵan. HH ǵasyrdyń basynda botanık Ernesto Sanches La Krýs Venesýelaǵa sapary kezinde bul aımaqtan buryn esh jerden kezdestirmegen ósimdikterdi kórip, tań-tamasha bolady. Biraq botanık ǵalymnyń sarqyrama týraly jazǵandary da bizge jetpegen.

  1933 jyly Djeıms Eındjel esimdi pılot almaz izdep, Venesýelanyń ústinen ushyp bara jatyp, Anheldi baıqap qalady. Almazdy tappaǵan ol ǵajaıyp sarqyramany zertteýge 1937 jyldan bastap kirisken eken. Úndister bul jerdi Aýıan (jyn taýy) dep ataıdy.

Qazir sarqyrama ony alǵash zerttegen pılottyń atymen Anhel  dep atalady. (Eındjel degen adam aty  ıspan tilinde osylaı dybystalady). 1949 jyly sarqyrama ornalasqan Aýıan-tepýı aımaǵyna arnaıy ekspedısıa barady. Bul top sarqyramanyń bıiktigin anyqtaıdy.

Anheldiń jalpy bıiktigi 979 metr. Al Aýıan-tepýıa  teńiz deńgeıinen 2950 metr bıiktikte ornalasqan.

Aýıan-tepýıanyń tumansyz kúnderi sırek. Erekshe ósimdikterimen, jándikterimen tanymal sarqyramaly óńirdi ǵalymdar áli de zertteý ústinde.

Ázirlegen Dana Qamshybek