Qaraǵandy aımaǵyndaǵy birqatar kenish pen óndiris nysanyna qojalyq etetin «ArselorMıttal Temirtaý» kompanıasynyń basshylyǵy oblystyń Saran qalasyndaǵy kenishte 10 qarasha kúni bolǵan apatqa qaza bolǵan kenshilerdiń ózin kináli etip otyr, - dep habarlaıdy Qamshy.kz.
Esterińizge salsaq, 10 qarasha kúni Saran shahtasynda saǵat túski eki jarymdar shamasynda apat bolyp, oqıǵa ornynda 3 kenshi kóz jumyp, beseýi aýrýhanaǵa jetkizilgen. Jaraqat alǵan kenshilerdiń bireýi 11 qarasha kúni Qaraǵandynyń Maqajanov atyndaǵy klınıkasynda kóz jumǵan bolatyn.
Ashyq derekkózderde apattyń qalaı bolǵany jazylýda. Sol kúni aýysym aıaqtalǵan soń 12 kenshi «Ferrıt» dızeldi kóligimen joǵary qaraı órlep kede jatqan. Jolda kólik tirkemesiniń trosy úzilip ketip, ondaǵy 12 adam 200 metr bıiktikten tirkememen birge tómen qaraı qulaǵan.
Ádettegideı atalǵan oqıǵanyń sebepteri men kinálilerdi anyqtaý úshin Investısıalar jáne damý mınıstrligi janynan arnaıy komısıa qurylyp, jumysyn bastaǵan. Oblystyq prokýratýra bolǵan qaıǵyly oqıǵaǵa baılanysty qylmystyq is qozǵalyp, sotqa deıingi tergeý bastalǵanyn habarlady.
Arnaıy komısıanyń jumys qorytyndysy shyqpaı jatyp, kenish qojaıyny «ArselorMıttal Temirtaý» basshylyǵy qaıǵyly oqıǵa bolǵan kúnniń erteńine óńirdegi aqparat quraldaryna baspasóz habarlamalaryn joldap, onda bolǵan apattyń «sebepterin» kórsetipti. Kompanıa basshylyǵy apatqa kenshilerdiń «tehnıkalyq standarttarǵa saı emes kólik quraldaryn paıdalanýy» sebep bolǵan dep otyr.
«Aldyn ala aqparattarǵa saı, 10 qarasha kúni saǵat 14.25-te jumysshylar tehnıkalyq standarttarǵa saı kelmeıtin kólikti paıdalanǵan. Talapqa saı emes kólikti durys paıdalanbaý úsh adamnyń ólimine jáne bes adamnyń jaraqat alýyna ákep soqty», - delingen atalǵan habarlamada. Kompanıanyń basqasha aqtalýy múmkindigi de joq edi. Ádette kómir shahtalarynda apattar jer qyrtysynyń opyrylýynan bolyp jatady. Ol kezderde kenish basshylary da, kompanıa jetekshileri de bar kináni opyrylǵan kenge aýdaryp, aýyr aıyptan qutylyp ketetin.
Alaıda, apat sebepterin qolmen qoıǵandaı etip kórsetken kompanıa basshylyǵy kenishte «tehnıkalyq talapqa saı emes» kóliktiń qalaı paıda bolǵanyn, ony paıdalanýǵa kim ruqsat bergenin ashyp aıtpapty. Baspasóz habarlamasynda sondaı-aq, ol kóliktiń qandaı tehnıka ekendigi, apatqa naqty qandaı aqaýlar sebep bolǵany da aıtylmaǵan. Kompanıanyń komısıa jumysynyń qorytyndysyn kútpeı jantalasa osyndaı habar taratýynyń basty sebebi – qaıǵyly oqıǵadan bastaryn aýashalap alý ekendigin baspasóz habarlamasyndaǵy myna bir sóılemder áıgilep tur.
«Osyndaı jaǵdaılardyń bolýynyń aldyn alý maqsatynda tıisti sharalar baǵdarlamasy ázirlenip, qaıǵyly jaǵdaıǵa baılanysty qurylǵan komısıa jumysy bastalǵanǵa deıin qoldanysqa engizildi», - degen «AMT» basshylyǵy arnaıy komısıanyń aldyn orap, basqa kenishterdegi kem-ketikterin jasyrýǵa kirisip ketkendeı.
Óńir turǵyndary tek kompanıa basshylyǵyna ǵana emes, oblys ákimdigine, basqa da memlekettik organdardyń sylbyrttyǵyna narazy. Máselen, qaıǵyly oqıǵa týraly habar tek sol kúni keshki altylarda taraǵan. Oǵan deıin kompanıa basshylyǵy da, memlekettik organdar da jumǵan aýyzdaryn ashpaǵan. Eger birneshe kenshi kóz jumbaǵanda, bul apat ta «jabýly qazan jabýly kúıinde» aıtylmaı da qalar ma edi?
Birneshe otbasynyń shańyraǵyna qaıǵy ákelgen apatqa baılanysty qaraly kún jarıalaý, óndiris oshaqtarynda jıi bolyp turatyn apattarǵa qatysty qoǵamdyq belsendilerdi qatystyra otyryp tyńdaý ótkizý de ázirge oblys basshylarynyń oıyna kelmegen syńaıly. Ony aıtasyz, qaıǵyly oqıǵadan bir kún ótken soń ǵana oblys ákimi N. Ábdibekovtiń atynan qaza bolǵandardyń otbasyna kóńil aıtý joldanǵan. Apat ornyna baryp, bolǵan jaıdy óz kózimen kórýdi kendi ólkeniń basshysy qajet dep tappaǵan syńaıly. Osylaısha jer asty baılyǵyna belshesinen batqan kompanıa jergilikti jumysshylarǵa, tipti, bılik ókilderine de pysqyryp qaramaıtynyn anyq ańǵartyp otyr.
Jomart Abdollauly
