Bala Dımash alǵan bata

Dımekeń Almatydaǵy №14 mektepte bilim alǵan. Joǵary synypta oqyp júrgen kezindegi bir oqıǵany orys tili páninen bergen Anna Pavlovna Shýrova degen ustazynyń esteliginen oqydym. «Bir kúni Dımash sabaqqa eki saǵat keshigip keldi. Synyp jetekshisi shydamsyzdyqpen Dımashty ustazdar bólmesine alyp keldi. Dımash «Ekinshi qaıtalanbaıdy» dep keshirim surady da, ketip qaldy. Bir aıdan keıin Maksımılıan Krýtov degen Azamat soǵysynyń ardageri kelip: «Sizderde Qonaev degen bala oqı ma?» - dedi. «Birdeńe búldirip qoıdy ma?» - dep eleń ete qaldyq. Ana kisi bolsa «Sizder jaqsy azamattar tárbıelep júrsizder. Men sizderge rızashylyǵymdy bildirýge keldim. Qonaev meni ajaldan alyp qaldy. Talmam ustap, ózenniń jaǵasynda qulap jatqan jerimnen emhanaǵa alyp bardy. Ol bala bolmasa, men sizderdiń aldaryńyzda bulbulsha saırap turmas edim. Sol balany osynda alyp kelseńizder», - degen ótinishin aıtty. Kelgen soń Dımashty qushaqtap: «Qudaı saǵan densaýlyq bersin! Sen baqytty adam bolasyń», - dep mańdaıynan súıdi. Sol kezde Dımekeń bar-joǵy 7-synyp oqýshysy bolǵan eken.  

Dinmuhamed Qonaevtyń ókinishi

Dımekeńniń: «Tústi metaldar ınstıtýtynda oqyp júrgenimde Oraldaǵy shahtaǵa baryp, Pavel Savelevıch degen shıetteı bala-shaǵasy bar kisiniń úıinde jattyq. Asharshylyq jyldary bolatyn. Sol kisi bir bólke nandy balalarynyń aýzynan jyryp bizge bergen edi. Alǵashqy eńbekaqymdy alsam, álgi kisiniń balalaryna tamaq, kıim salyp jiberem deýshi edim. Arada eki-úsh jyl ótkennen keıin, sálemdeme jáshigimen kıimder, tamaqtar salyp jiberdim. Alǵan-almaǵany maǵan beımálim, ol jaqqa qaıta jolym túspedi. Baryp hal-ahýalyn bilmedim, balalaryna bir shapaǵatym tımedi. Soǵan moınymnyń jar bermegenine ókinemin», - dep júregi aýyrýshy edi.

Qonaevtyń naqylǵa aınalǵan sózderi:

Búgingi kún – keshegi kúnniń shákirti.

 ***

Jalada shyndyq bolmaıdy.

 ***

Satyǵa aıaq salmaı jatyp, baspaldaqtan attama.

 ***

Qanmen sińgendi qasıettemeseń, qadiriń bolmaıdy.

 ***

Ómirdiń eki tiregi: úırenýden jalyqpaý, úıretýden aıanbaý.

 ***

Aqıqattan attap ketý – arǵa syn.

*** 

Oryndy syn oılantpaı qoımaıdy.

 ***

Adamǵa jazanyń eń úlkeni – jumyssyz qaldyrý.

 ***

Adam aınasy – adam.

 ***

Táýelsizdiktiń júgi aýyr.

 ***

Qarań qalǵan bılik qaıtyp ońalmaıdy.

 ***

Bitimi qısyq aǵashtyń kóleńkesi de ózindeı bolady.

 ***

Adamdyq qalypty bıik ustaý – kimge de bolsa úlken syn. Adamgershilik degen asyl qasıetti alasartyp almasaq eken. Ómir ózegi osy, azamattyq joly da osy. 

 Materıal Islam.kz saıtynan alyndy.