Merýert Túsipbaeva nege shetelge kóship ketkisi keledi? Ózin «Talǵamsyz» dep aıtqan sángerlerden esesin qalaı qaıtarmaq? «Jibek-2» serıalyndaǵy Merýert nelikten jumysyn toqtatýǵa májbúr bolǵan..? Osy saryndaǵy san túrli saýaldarǵa jaýapty tómennen oqyńyz. 

 —  Siz týraly alyp-qashpa áńgime jazǵysh «sary» saıttarmen kúresip júrgen edińiz. Sonyń sońy ne boldy?

 — Meniń ınstagramdaǵy paraqsham jabyq. Men olarǵa nege renjımin? Bir kúni: «Búgin mende demalys. Segodná ý mená vyhodnoı…»-dep, keýdeme deıin kórpe jamylyp jatqan sýretimdi ınstagramǵa salǵanmyn. Sóıtsem, eki kúnnen keıin «Túsipbaeva makıajsyz jalańash shyqty…, anaý-mynaý» qudaı saqtasyn ý da shý áńgime… Endi ne isteý kerek ekenin bilmeımin. Instagramdy jaýyp-ashyp, ashyp-shaýyp sharshadyq. «Jibek» serıalyna túsken kezde prodúserler jarnama úshin qajet dep paraqshalarymyzdy ashyp qoıýdy talap etken bolatyn. Baıaǵyda sheteldik arnalardan Madonnalardyń jýrnalıserden betin búrkip, jaýyp, tyǵylyp qashyp júretinin kóretin edik qoı. «Anaý úıtip qapty, mynaý búıtip qapty» dep shýlatyp jatatyn. Sol zaman bizge keldi me dep oılaımyn. Men saıttarǵa taǵy da aıtamyn: «Maǵan tımeńdershi, óz-ózimmen ǵana tynysh ómir súreıinshi. Men ózime ózim jaýap bere alamyn. Men týraly jazbaı-aq qoıyńdar!»

 — Sizben qatar sahnaǵa kelgen, ataqty qanshama ánshiler bar. Nege sol saıttar tek siz týraly jazýǵa qumar? Sebebi nede dep oılaısyz?

 — Bilmeımin…. Men bir kúni bir jýrnalıske suhbat bergen edim. Ol: «On jyl buryn sizdiń ánderińiz hıt boldy. Nege qazirgi ýaqytta sizde hıt án joq?-degende , -«Óıtkeni ol kezde men qatty ǵashyq edim. Ol kisiniń basy bos emes edi. Meniń sol kezdegi kúızelisim, sátsiz mahabbatym sol ánderdiń shyǵýyna sebep boldy»- dep jaýap bergenmin. Sóıtsem 4 kúnnen keıin «Ajyrasqannan keıin otbasyly adamdy qulaı súıdim!» dep jazyp qoıypty. Al, men eshqandaı artyq oısyz, hıt týraly suraǵanda shyn kóńilden ashyq jaýap berdim ǵoı. «Oı, bilmeımin, qazir bári toıdyń ánin oryndaǵasyn…» dep qysqa jaýap bere salýyma da bolar edi. Qaıdan bileıin, saıtqa kirip qalsam qanshama pikir jazyp, jurt shýlap jatyr. Keıbir aǵalardy otbasynan aıyryp, kúıeýge shyǵyp alǵan ánshilerge el olaı jabylmaǵan shyǵar. Bul maǵan aýyr boldy. Iá, men barynsha shynaıy jaýap berýge tyrysamyn. Biraq, saıttardyń osylaı reıtıń qýyp, búırekten sıraq shyǵaratyny ashýyma tıedi. Tek saıttar emes, anaý bir «El aýzynda», «Juldyzdar jarqyraıdy» degen baǵdarlamalar da joqtan bar shyǵaryp kesip-kesip ana sózdi anda, myna sózdi mynda qoıyp, jalǵap-jalǵap birdeńelerdi jasap qoıady. Odan keıin qaıtip renjimeısiń? Aıtqyń da kelmeıdi, sóılegiń de kelmeıdi, tipti basqa memleketke qashyp ketkiń keledi…

 — Osydan 5 jyl buryn jaǵdaı basqasha edi…

 — Iá, kelisemin. Buryn mundaı emes edi!

 — Burynǵy kezdi ańsaısyz ba?

 — Árıne, burynǵy kezdi qatty ańsaımyn. Ol kezde «ınstagram», «feısbýk» degen joq qoı. Ol kezde ártisti kórý degen arman. Tek konsertke barǵanda ǵana kóredi, boldy! Bir konsertimde adamdar meni kórý úshin grımerkanyń esigin syndyryp kirip kete jazdaǵan. Qazir ártis degen oıynshyq bop qaldy ǵoı. Álde ártistiń baǵasy qulap qaldy ma..? Osynyń barlyǵyna osy áleýmettik jeliler kináli dep oılaımyn.

 — Al, adamdar mádenıetten alshaqtap bara jatyr dep oılamaısyz ba?

 — Iá,munyń ras. Instagramda meni boqtaıdy. Tipti bir qyz qatty boqtaǵan, ony taýyp alyp mılısıaǵa aparǵanda jylaǵan. Osy keleńsiz oqıǵadan keıin, júregim aýyryp, ınstagramdy jaýyp tastaǵanmyn. Instagram maqul, jastar otyrady delik, al feısbýkte kópti kórgen, egde jastaǵy azamattar, azamatshalar otyr. Olar da neshe túrlini jazady.

 —  «Bir sózińizde shetelge kóship ketkim keledi» dedińiz. Kóship ketýge ne kedergi?

 — Eshqandaı da kedergi joq. Balamnyń oqýy bitsin dep otyrmyn.  Balamdy toǵyzynshy synyptan keıin Amerıkaǵa kolejge bergim kelip edi. Balam barsa , men de ketemin dep oılaǵanmyn. Biraq aınalamdaǵy jaqyndarym: «Bala tym kishkentaı, erte jiberme» dep keńes berdi. Birde bir tanysym:  «Siz aýyldy turdyńyz ǵoı?»- dep surady. Men: «-Iá, turdym» dedim. Ol «Sosyn Almatyǵa keldińiz ǵoı…» dedi, men taǵy «-Iá!» dedim. Sosyn ol: «Endi aýylǵa barasyz ba?» degeninde «-Joq, barmaımyn!» dep jaýap berdim. Sol sıaqty bir tal balam memleketke kelmeı qoıa ma, qazaq bolmaı kete ma degen suraqtar da oılandyrdy.

  — Otandyq dızaınerlermen nege renjisip júrsiz?

 — Men anyqtap surastyrdym, bul tapsyrys bolǵan eken. Úsh dızaınerge de «Merýert Túsipbaeva talǵamsyz kıinedi!» dep aıtqyzǵan. Osy sizderdiń saıttaryńyz arqyly aıtaıyn, oqysyn!

Eger men eń talǵamy tómen ártis bolsam, onda bizdiń estradadaǵy ánshilerdiń sahnalyq sáni (kıimi) «óte joǵarǵy deńgeıde» eken. Óıtkeni sahnada semirip ketken, salpy etek bizdiń qyzdarymyz, ápkelerimiz, sińililerimiz kóp. Men ózimdi olardyń qasynda talǵamsyzbyn dep sanamaımyn. Onyń ústine men búgingi tańda qalaǵan kıimimdi satyp ala alatyn jaǵdaıdamyn.

 — Siz tipti olardyń jumysy sapasyz dep te sóktińiz. Ony nege súıenip aıttyńyz?

 — Dýbaıda júrgenimde bir kóılegime alqa kerek boldy. Ol alqany ala sala men Samaraǵa ushýym kerek. Kóılegim qazaqı stılde Qazaqstanda tigilgendikten oǵan sondaı oıýlary bar kókshil alqa qajet edi. Kómekshime «Tez arada myna kóılekke alqa taýyp salyp jibershi, Kaýmenovaǵa bara sal» dedim. Ol Aıda Kaýmenovanyń býtıgine barǵan da 98 myńǵa bir alqany alǵan. Ony maǵan jedel jetkizdi de biz birden Samaraǵa ushyp kettik. Sonda baryp álgi alqany kóreıin dep ashyp qalsam, Qudaı saqtasyn, Qytaıdyń 5 myń teńgelik syrǵalarynan tikken. Onyń tigýi bar… Aıdanyń aty bar… jaraıdy, sonyń bári 50 myń teńge bolsyn, al 98 myń degen eki myń teńgesi kem 100 myń teńge ǵoı. «Jaraıdy, qurysynshy ,taǵa bereıinshi» dep taqyrypty jaba salǵam. Sosyn Aıda meni talǵamsyz degende álgi sýretti feısbýkke shyǵardym. Árkim óziniń janyn qorǵaıdy ǵoı. «Mine, búginde bizge ne kıý kerek, qalaı kıiný kerek, sán men symbatty úıretip júrgen dızaınerlerimizdiń dúnıesi osyndaı bolsa, bizde qaıdan talǵam bolsyn»-dep jazdym. Áıtpese ol alqany alǵanyma bir jarym jyl bolǵan, jańaǵy sapasyz syrǵalary qaıda túsip qalǵanyn da bilmeımin. Sonda da eshkimge aıtpaı, eshqaıda jarıalamaı typ-tynysh júrgenmin. Men eshkimge ózdigimnen tıispeımin, biraq tıisse ońdyrmaımyn. Sol postty jarıalaǵannan keıin óte kóp adam maǵan hat jazdy. Bári de sol Aıdadan pálen baǵaǵa alǵan kóılekteriniń sapasy syn kótermegenin jarysa jazdy.

 — Buny estigen Aıda Kaýmenova sizge habarlaspady ma?

  — Maıra İlıasova habarlasyp «Feısbýktegi» sýret pen jazbany alyp tastap, aıtyspaı ózara kelisimge kelýge sebepker boldy. Nátıjesinde ádemi sheshimge keldik. Aıda aqshamdy qaıtaryp berdi (kúldi). Alqany alyp qaldy. Endi erteń Portýgalıaǵa ushpaqpyn, sol jaqqa  baryp  98 myńǵa basqa jaqsy brend alqa satyp alamyn.

 — Al, Jadoǵa qatysty ne aıtasyz?

 — Endi ol kisi áýesqoı dızaıner, áýesqoı prodúser, áýesqoı bıshi ǵoı. Búgingi kúni áýesqoı degen sóz men úshin naǵyz baǵasyz… Men oǵan ápke retinde bir ǵana aqyl aıtar edim: «Bireýdi synamas buryn adam óziniń deńgeıin saralap, baǵalap kórý kerek!». Men de dızaıner bola alamyn. Kishkentaıymnan is tigý men toqyma toqýǵa qatty áýes boldym. Senesiz be, kıim joq kezderde men barlyq týǵan-týystaryma, ózime kerektiń bárin toqyp alatynmyn. Men óte jyldam ári tyńǵylyqty toqımyn. Endigi oıym bir dızaınermen, Erlan Joldasbekpen be qosylyp toqymadan koleksıa jasasam ba dep otyrmyn. Meni synaǵan dızaınerlerge osylaı jaýap bermekpin. Bireýdi jaldap toqyta salýǵa de bolar edi, biraq men qansha kerek sonyń bárin ózim toqıyn dep sheshtim. Qashan bastadym, qashan aıaqtadym bárin ınstagramǵa salyp, onlaın kórsetip otyramyn.

 — Sizdi synǵa alǵan dızaınerler ózderi siz sıaqty is tigip, toqyma toqı ala ma eken?

 — Kúmánim bar…

 — Sizge tegin alý múmkindigi týsa, otandyq dızaınerlerdiń qaısysynyń kóılegin kıer edińiz?

 — Erlan Joldasbektiń jumystary qatty unaıdy, izdep júrip kóremin. Aıda Kaýmenovanyń koleksıasy da jaman emes, biraq bári bir saryndy. Larıanyń , Saltanyń, Berik Ismaıylovtyń  kıimderin tegin berse kıer edim. Mende bul dızaınerlerdiń báriniń kıimderi bar.

 — Al, Jado hanym sizdi synamaǵanda, onyń kıimderin kıer me edińiz?

 — Mende onyń kıimi joq. Qaıbir jyly shetelge konsertpen qazaqsha kóılek kıip barý kerek boldy. Jadonyń salonyna júgirip bardym. Ana qoımasyn bir kórsetti, myna qoımasyn bir kórsetti. Men bul jaıly aıtqan emespin, ony kómekshileri biledi, senesiz be senbeısiz be, sol san túrli kıimderdiń ishinen prokatqa ózime bir kóılek te tappadym…

 — Múmkin sizdi synǵa alǵan dızaınerlerden kıinseńiz sizdi maqtaıtyn ba edi?

 — Múmkin. Aıda, kel saǵan kóılek tigip beremiz dep shaqyrdy. Kóre jatarmyz, buıyrsa kıermiz, buıyrmasa ózimizde de, shetelde de kıim kóp.

 —  «Jibek 2» telehıkaıasy jaıly siz feısbýk paraqshańyzda : «Býgin «Jibek-2» serıalynda jýmysymdy aıaktaımyn.(Kstatı ,ıa samaıa vysokooplachıvamaıa aktrısa,v serıale )Kazanshynyn oz erki bar go…Aksha bitti me???Kim bilsin?Aıteýip ,Jansaıany ,alyskaaaaa jıberıp jatyr,,(senarıstte oz kolynda go)balasyda týsinde kormeıdi,korermen týgili….Ne aıtamyz??Kazır artıs prodúser -degen kýdaıdyn kýly goı….Bipak,az týssemde,emosıonalnaıa nagrýzka «Jibek-2»-kop boldy….Sharshap,aýyryp,tipti kartaıyp kettim….Bagasyn beretin sizder!!!» — dep jazdyńyz. Shynymen de solaı boldy ma?

 — Iá, bul jolǵy túsirilimder qıyn boldy. Shetelde qalaı ekenin bilmeımin, biraq, bizde gonorar on eki saǵat jumysqa tólenip otyrdy. On eki saǵat bir túsirilim kúni bop esepteldi. Sol serıalǵa túsken 5 kúnde 5 jylǵa qartaıyp, sharshap kettim. Prodúserler maǵan azyraq aqsha tóleý úshin búkil aýyr epızodtardy sol on eki saǵattyń ishine tyqqan eken, «syńbyrýge» ýaqyt bolmady. 5 kún qatarynan demalyssyz jumys istep aýyryp ta qaldym. Biraq bizdiń elde prodúser-Qudaı. Akterdiń jaǵdaıy ne bop jatyr…, ol aýyryp qalmady ma degen sıaqtylar esh eskerilmeıdi. Prodúser ne dese sol bolady.Bizdiń elde otandyq serıaldardy túsirý qolǵa alyndy ǵoı. Qanshama qarajat bólinip jatyr. Biraq onyń qaıda ketip jatqanyn bir Qudaı biledi, bir prodúser biledi. Ol akterlerge julmalanyp jetkenshe tıyn bop qalady. Ol tıynǵa kelispeıin deseń seniń ornyńa odan da tómen baǵaǵa teatrdan tanymal bolýdy armandap júrgen kez kelgen akterdi shaqyryp alyp túsire beredi. Bizdiń serıaldarymyzdyń sapasynyń tómendigi de sodan bolar. Bizde ne kóp aktrısa kóp, óner akademıasyn oqymaǵan da aktrısa, oqyǵan da aktrısa, ózin-ózi aktrısa dep atap alǵandar, týma-týys, quda-jekjattardyń arqasynda aktrısa bolyp júrgender de kóp. Bizde amal joq, ataqtymyn dep kóp aqsha surasań anaý, suramasań mynaý! Serıaldyń prodúseriniń aıtýynsha, men osy serıalda gonorary eń joǵary aktrısa ekenmin. Senarı ózderiniń qolynda tur ǵoı.(kúlip aldy) Sondyqtan…meniń keıipkerim óte alysqa ketedi. Tipti balasynyń da túsine kirmeıtin alysqa. Túske kirý úshin de men oınaýym kerek, oǵan da aqsha tólený kerek degendeı. Tús kórý de qymbat bop otyr ǵoı…

 —  (Kúlip) Merýert hanym, suqbattasqanyńyz úshin raqmet! Sáttilik tileımin!

Suhbat Ikerim.kz saıtynan alyndy.