«Jumyspen qamtý – 2020 jol kartasy» baǵdarlamasy aıasynda oblysta kóptegen jańa jobalar júzege asýda. Osy rette «Yrys» mıkroqarjy uıymy kásip ashqysy nemese bıznesin kórkeıtkisi kelgenderge 6 mln. teńgege deıin jeńildetilgen paıyzben nesıe berýde. 

 Eger tıesili jer telimi nemese mal asyraýǵa qolaıly qora bolsa, osy uıymnan qarjy alýǵa bolady. Ol úshin jospar aıqyn, tıisti qujattar túgel bolýy tıis. Tek «Yrys» mıkroqarjy uıymyna kepilge jyljymaıtyn múlik qoıylsa bolǵany.

– «Jumyspen qamtý – 2020 jol kartasy» baǵdarlamasy 2011 jyldan beri júzege asyrylýda. Bıyl osy baǵdarlama aıasynda 3,39 mlrd. teńge tartylyp, búginde ol kásip bastaǵan azamattarǵa berilip jatyr. Jumyssyz nemese ózin-ózi jumyspen qamtamasyz etip otyrǵandar biz arqyly 6 mıllıon teńgege deıin qarjy ala alady. Nesıeniń syıaqy mólsheri 7 paıyzdan aspaıdy, óteý merzimi – 5 jyl. Eń bastysy, qarajatty alǵan kásipker 60 kún ishinde nesıeni maqsatty paıdalanǵany týraly bizge qujattaryn ótkizýi tıis, – dedi «Yrys» mıkroqarjy uıymynyń basshysy H.Nazarmetova.

Bıyl el Táýelsizdigine – 25 jyl. Osy aıtýly merekege baılanysty «Yrystan» nesıe alyp, ony ekonomıkanyń damýyna jumsaǵan 25 kásipker marapattalýda.

Óz isin dóńgeletip otyrǵan azamattardyń biri – Qarabulaq aýylynyń turǵyny Ergash Halnıazov. Ol 2015 jyly «Yrys» mıkroqarjy uıymynan mal bordaqylaý maqsatynda 4 mln. teńge nesıe alǵan. Istiń babyn tapqan sharýa kásibin damytyp, 2016 jyly qarjy ortalyǵynan taǵy da 3 mıllıon teńge nesıe aldy. Sharýashylyǵy jyldar óte kele irilenip, búginde qorasyndaǵy mal sany 60-qa jetip otyr.

– Eńbek etemin degen adamǵa memleket úlken qamqorlyq jasaýda. Buryn avtobýs júrgizýshisi bolǵan kezimde qoramda azyn-aýlaq malym bolýshy edi. Keıin mal sharýashylyǵyn otbasymyzben qolǵa aldyq. Qazirgi tańda qoramda 60 iri qara ustaımyn. 20 saýyn sıyrdy kelinim saýyp, sútin fermaǵa ótkizemiz. Múmkindik týyp turǵanda qol qýsyryp qarap otyrýǵa bolmaıdy, eńbektený kerek, – deıdi kásipker.

Óz isine adal, eńbekqor, kásibiniń násibin kórip otyrǵan Saıramdaǵy kelesi kásipker – Adılsha Kochıev. Ol da bıyl joǵaryda atalǵan qarjy ortalyǵynan 3 mln. teńge nesıe alypty. Kásipke den qoıǵan Adılsha búginde 20 buqa bordaqylaýda. Jeke kásipker mal sharýashylyǵynan bólek, egistik jerine bıdaı ósirýmen de aınalysady. «Qazir jem-shóp baǵasy qymbat bolyp tur. Ózimiz ósirgen bıdaıdyń arqasynda mal azyǵynan kóp tarshylyq kórmeımiz. Eger jemshópti túgel satyp alatyn bolsaq, shyǵynǵa ushyraıtyn edik» deıdi ol.

Kelesi marapat ıesi Mankent aýyldyq okrýgine qarasty Aqqala aýylynyń turǵyny, «Arystan» sharýa qojalyǵynyń ıesi Rýstam Iýnýsov 2012 jyly «Yrystan» alǵan 9 mln. teńge nesıege mal bordaqylaý isin bastaǵan. Óziniń aıtýynsha, bordaqylaý merzimi maldyń tuqymyna qaraı 3-6 aıǵa deıin sozylady. Baılaýda turǵan ár mal kúnine 700-800 gramǵa deıin salmaq qosady. Jastyǵyna qaramastan tirliktiń kózin tapqan Rýstamnyń sharýa qojalyǵynda búgingi tańda 350 buqa, 50 jylqy baǵylýda. Mal turatyn úlken úsh qorasy bar.+

Aýyl sharýashylyǵyna degen memlekettiń qoldaýy men járdemi osy qarqynmen jalǵasa berse, sala eńbekkerleri aldaǵy ýaqytta budan da úlken tabystarǵa jeterine shúbá joq.

Baıan DARǴOJINA, «Ońtústik Qazaqstan».