Aıbek Janseıitov. Bul – otandyq ánshi, eki balanyń ákesi Búrkittiń azan shaqyryp qoıǵan esimi. 1978 jyly Taraz óńirinde dúnıege kelgen Aıbek myrza búginde halyqty kóńildi ánderimen qýantyp júr. Ánshiniń ónermen aınalysamyn degen sheshimin otbasy qup kórmeı, tipti Almatydan  Tarazǵa qaıtarýǵa tyrysqan. Alaıda Búrkit eshkimge des bermeı, degenine jetti.

«Ákem áskerı adam. Al aǵalarym bızneste júrgendikten, ónerdi kóp túsine bermeıdi. «Ne júris mynaý?!» dep urysatyn kezderi boldy. Men áý bastan bul istiń qolymnan keletinin bildim. Tek ýaqyt qajet edi. Qazir áke-sheshemdi «Búrkittiń ata-anasy» dep tanystyrǵanda, marqaıyp qalady. Bul kúnge qajyrly eńbekpen ǵana jettim. Nıet te aq bolý kerek».

Ánshilerge qardaı appaq nıetten bólek, kóńildi ánder de kerek. Án – adam  ómirine tikeleı áser etedi dep senedi Búrkit. Muny ol óz ómirlik tájirbıesinen aıtyp otyr. Birneshe jyl buryn Búrkittiń repertýarynda – «Baqytymdy taba almaı júrmin» nemese  «Jaýapsyz mahabbat» degen saryndaǵy ánder kóp edi.  Ol ánshiniń ómirine keri áserin berip, kóp ýaqyt boıy ómirlik jaryn taba almaı júrdi. Repertýarynda kóńildi ánder paıda bola salysymen, baqytyn tapqan. Qazir Zeıin, Omar esimdi balalary bar.

«Ómirdegi eń úlken maqsatym – balalarymnyń boıyna naǵyz er azamatqa tán qasıetterdi sińirip ósirý. Qartaıǵanda balalaryńyń saǵan qalaı qaraıtyny,  tárbıege baılanysty. Qazir jigittermen «Assalaýmaǵaleıkým, qalyń qalaı?» deseń  «Barlyǵy ok» dep qarap turady. Sondyqtan, balanyń tárbıesine úlken mán berý kerek. Sońǵy ýaqytta qos jynystylar men jynysyn aýystyrǵysy keletin jigitter de kóbeıip keledi. Olar da ózderi týraly ashyq málimdeı bastady. Oǵan ǵalamtordyń kóp áseri bar. 18-ge tolmaǵandarǵa zań júzinde keıbir saıttarǵa kirýge tyıym salý týraly úkimetke usynys jasaý kerek. Al ózim áke retinde  balalarym 18-ge tolmaǵansha úıdegi ǵalamtordy óshirip tastaımyn».

Áriptesterińiz sekildi depýtattyqqa saılanyp, atalmysh máselelerdi kótergińiz kelmeı me degen saýalymyzǵa, ánshi úzildi-kesildi «joq» dep jaýap berdi.

 «Men óz elimdi súıemin. Saılaýǵa qatysyp, azamattyq boryshymdy ótep júrmin. Qazaqstanda ne bolyp jatqanynan habarym bar. Alaıda, ár adam qolynan keletin ispen aınalysý qajet».

Suhbattasqan Ásem Álmuhanbet