«Zańdy neke», «Azamattyq neke», «Sharıǵat boıynsha neke» degen sıaqty nekeniń túrli-túrli ataýlaryn estýshi edik. Endi ajyrasýdyń da túrleri shyǵa bastapty ,-dep jazady zamana.kz. 

Biz estigen ajyrasýdyń bul túri «evropeıskıı razvod» dep atalady eken. Iaǵnı erli-zaıyptylar ajyrasyp ketse de balalardyń kóńiline dyq túspes úshin bir shańyraqtyń astynda tura beredi.
Menimen túıdeı qurdas qudasham bar edi. Ekeýmiz jaqyn aralasyp, syrlas-muńdas bolyp júrdik. Ol óziniń súıgen jigitine kúıeýge shyǵyp, tórt balaly boldy. Tórtinshisin bosanǵannan keıin kúıeýimen ekeýiniń arasy salqyndap ketkenin aıtyp júretin. Biraq onyń sońy ajyrasýǵa soqtyrady dep oılamappyn. Kezdesken saıyn kúıeýiniń úıge keshigip keletin ádet tapqanyn, ózine kóńil bólmeıtinin, balalardyń shýylyn da jaqtyrmaı bara jatqanyn aıtatyn. Men ony  otbasyndaǵy usaq-túıek jaı áńgimege jatqyzatynmyn. Sóıtsem ekeýiniń sezimderi múldem sýyp ketken be, aqyrynda sotqa aryz jazyp, zańdy túrde ajyrasyp tynypty.
Biraq balalardyń qamyn oılap, bir shańyraqtyń astynda turýdy uıǵarypty. Qudasham: «Muny «evropeıskıı» ajyrasý deıdi. Olar bizge qaraǵanda aqyldy ǵoı. Ózderin emes, balalarynyń baqytyn birinshi orynǵa qoıady», – dedi ózderiniń osy sheshiminiń durystyǵyn dáleldegendeı bolyp. «Birge turatyn bolsańdar, bir-birińnen uzaqtap ketpeseńder, nesine ajyrastyńdar?», – degenime ol: «Bir úıde turǵanymyzben, birge tamaqtanbaımyz. Men balalarymmen tamaqtanamyn. Ol biz iship bolǵan soń ózine as ázirleıdi. Maǵan sóılemeıdi, biraq balalarymen qarym-qatynasy burynǵydaı. Men onyń kir-qońyn jýyp, jaǵdaıyn jasamaımyn, erkin, azat áıelmin», – dedi.
Men oılanyp qaldym. Sebebi bala kóńili óte sezimtal keledi. Olar  áke-sheshesiniń arasyndaǵy salqyndyqty birden  biledi. Tipti olardyń bir dastarhannan tamaq ishpegenderi, sóılespegenderiniń ózderi balanyń janyna aýyr salmaq emes pe? Sonda olar kimdi aldap júr?
 

Avtory: Q. Jarmaǵambetova