Máskeýde belgili zańger Valerıı Sokolovtyń jeke kýáligin notarıýs qujat retinde qabyldamaı, qyzmet kórsetýden bas tartqan. Advokat notarıýstyń ústinen Babýshkınskıı sotqa shaǵym túsirgen. Alaıda, sot shaǵymyn qanaǵattandyrmaı tastady.

«Qazaqstandyq jeke kýálikti, jeke basty kýálándyratyn qujat retinde qabyldamaı tastaǵanda, Babýshkınskıı aýdandyq sotyna shaǵym túsirdim. Alaıda, sot notarıýstyń áreketin zańsyz dep tanýdan bas tartty. Men Ádilet Mınıstrligi men basqa da memlekettik mekemelerge advokattyq saýal joldap, Máskeýdiń qalalyq sotyna apelásıalyq shaǵym túsirdim» dep tengrinews.kz tilshisine baıandap berdi.

Máskeýlik sot birinshi ınstasıanyń sheshimin joqqa shyǵaryp, V.Sokolovtyń jeke kýáligin zańdy dep tanyǵan. Advokattyń aıtýynsha mundaı jaǵdaılar qazaqstandyq azamattardyń basynan jıi ótedi.  

2005 jyly 17 mamyrda Qazaqstan prezıdenti Nursultan Nazarbaev pen Reseı prezıdenti Vladımır Pýtın Chelábınskide birlesip qabyldaǵan qujaty bar. Onda QR men RF azamattary eki el arasynda jergilikti kýálikterimen (jeke kýálik) jáne balalardyń týý týraly kýáligi (Qazaqstandyq azamattar 16 jasqa tolmaǵandarǵa, Reseılikter 14 jasqa tolmaǵan balalarǵa)  júre alatyndyǵy tasqa tańba basqandaı kórsetilgen. Reseılik sottyń atalmysh qujat jóninde bilmegeni advokatty qatty tań qaldyrypty.