Keshe Astanada qazaqstandyq-amerıkalyq «Toqal» fılminiń aldyn ala kórsetilimi ótti, dep habarlaıdy «QazAqparat»
Dramany «Mount Helix Inc.» kompanıasynyń qatysýymen Qazaqstannyń «Art Media Production» jáne AQSH-tyń «Hollywood Film academy» kınokompanıalary túsirgen. Túsirilim ótken jyly tamyz aıynda Almaty men Los-Andjeles qalalarynda ótti. Senarı avtory jáne rejıseri Evgenıı Chelsov (Reseı), bas prodúser - Gaýhar Nurtas. Sondaı-aq fılmniń óndirisine atqarýshy prodúserler: Armanjan Baıtasov (Qazaqstan, bas demeýshi), Oleg Abdýlqabirov (Qazaqstan), Kevın Fý (Ulybrıtanıa) jáne Stıv Braýn (Amerıka) qatysty. Kartınadaǵy basty rólderdi Gaýhar Nurtas (Bota), Jánel Maqajan (Kámıla), Erik Joljaqsynov (Qaırat) jáne Tuńǵyshbaı Jamanqulov (Temirlan) oınaıdy.
Kınokartına aýqatty áýlet týraly baıandaıdy. Otbasynyń uıytqysy bolýy tıis Bota qoǵamdyq jumystarmen aınalysamyn dep eri men balalarynan alystap ketedi. Otaǵasy Qaırat bolsa, kelbeti kelisken Kámıla esimdi boıjetkennen aldanysh tabady. Bárin bilgen Bota báıbishe rólimen kelisip, otbasyn saqtap qalýǵa tyrysady. Biraq sezimge berilgen Qaırat jas áıelin tańdaıdy. Sóıtip januıasynan da, bedeldi qyzmetinen de aıyrylady. Onyń jańa otbasyn asyraý úshin jumysqa ornalasý talpynystarynan eshteńe shyqpaıdy. Aqyry, júk kóliginiń júrgizýshisi bolyp kúneltedi. Sanany turmys bılegennen keıin «jas jubaılardyń» arasyndaǵy sezim birte-birte kókke usha bastaıdy. Qaırat balaly-shaǵaly, toqshylyqtaǵy burynǵy ómirin saǵynady. Kúnderdiń kúninde jas áıelinen ketýdi sheshedi. Ol ýaqytta zańdy nekedegi áıeli Bota bolǵan jáıttardy oı eleginen ábden ótkizip, bir qorytyndyǵa kelgen bolatyn. «Meni qymbat kóretin ári maǵan qymbat adamdar janymda bar» degen sheshimmen Qaıratty qaıta qabyldaǵysy kelmeıdi. Sóıtip, názik jandylardyń ekeýi de Qaıratsyz, al Qaırat ekeýinsiz qalady.
Baspasóz máslıhatynda málim bolǵandaı, oqıǵa jelisin Gaýhar Nurtas jazyp shyqqan, keıin ony Evgenıı Chelsovtyń nazaryna usynǵan. E.Chelsovtyń aıtýynsha, Reseıde toqal máselesi bar bolǵanymen, ol basqasha atalady ári oǵan kózqaras bólek. Kartına avtorlary bul másele barlyq ulttarǵa jaqyn, er adamnyń eki ottyń arasynda qalýy barlyq ortada kezdesedi degendi aıtýda. «Buryn toqaldy báıbishe bala kótere almaǵanda, áýlettiń urpaǵyn jalǵastyrý úshin alǵan. Bolmasa, aǵaıyndylardyń biri kóz jumǵanda, onyń áıeli men bala-shaǵasy qańǵyp qalmas úshin, baýyrlarynyń biri toqaldyqqa alǵan. Al toqaldyń búgingi fenomeni ata-baba dástúrin jańǵyrtyp otyr dep aıta almaımyn. Biz bul fılmmen eshkimge aqyl aıtqymyz kelmeıdi, dogmalar týraly aıtpaımyz», - deıdi Gaýhar Nurtas.
Al toqaldyń rólin oınaǵan Jánel Maqajan kartınaǵa túskennen keıin ózi úshin qundylyqtardy qaıta baǵalap shyqqanyn atap ótti. Toqaldy somdaý kóńiline jaqpaǵanyn ári «shynaıy ómirde mundaı rólmen kelispes edim», degendi aıtyp otyr. Sondaı-aq ol, tósektegi qarym-qatynas kórinisine túsýden bas tartqanyn jetkizdi. Rejıser ol epızodqa dúblerdy jaldaǵan. Fılm rejıseri Evgenıı Chelsovtyń aıtýynsha, ol senarı boıynsha bir jarym jyl boıy jumys istegen. Áý basta qazaqtyń bıznesmenin, ıaǵnı Qaırattyń rólin amerıkalyq akter Mark Dakaskos oınaýy tıis bolǵan. Ol bul rólge qýana kelisip, alǵashqy túsirilimderge de qatysqan. Alaıda, fılm týraly jarnama ınternetke túskennen keıin, Mark Dakaskostyń kezekti ret qazaqtyń rólin somdaýy halyqqa jaqpaǵan jáne olar óz pikirlerin áleýmettik jelilerde qyzý bildire bastaǵan. Budan keıin avtorlar basty keıipkerdi aýystyrý sheshimin qabyldap, ornyna akter izdestiredi. Uzaqqa sozylǵan izdenis jumystarynan keıin kezdeısoq Erik Joljaqsynovqa kezigedi. Joljaqsynov reseılik rejıser birden unaǵan. «Toqal» keń prokatqa 8 jeltoqsan kúni shyǵady. Fılm bir mezgilde Mońǵolıa, Ázerbaıjan jáne Qyrǵyzstan elderinde kórsetile bastaıdy.
