Atyraý oblysynda memlekettik nómirsiz júrgen kólikti toqtatqany  úshin jol saqshylary bastyqtarynan sóz estidi. nómirsiz júrgen kólikti «nege toqtatasyńdar» degen Mahambet aýdandyq jergilikti polısıa qyzmetiniń bastyǵyna uqsaıtyn azamat, toltyrylǵan hattamany jyrtyp, jelge ushyrǵan. Sondaı-aq, óz qyzmetkerlerin balaǵattaǵan bastyqtyń sózderi beınetirkeýishte jazylyp qalǵan.  Bul týraly «31 arna» jańalyqtary habarlady.

Mahambet aýdandyq İshki ister bóliminiń jergilikti polısıa qyzmetiniń bastyǵy Nurlybek Dosqaıyrovqa uqsaıtyn azamattyń memlekettik nomeri joq kólikti toqtatqan jol polısıa qyzmetkerlerine qoqan-loqy kórsetkendigi myna áýesqoı túsirilimnen baıqalady. Bul jolǵy daýdyń basy  jergilikti ákimshilikke qarasty tehnıkadan bastalǵan. Nomersiz júrgen myna kólikti toqtatqan tártip saqshylary aýdan ákimi orynbasarynan da orynsyz aıqaı estigendigin anyq ańǵarýǵa bolady. 

Jelini shýlatyp, tártip saqshylaryna tosyn saýal tastaǵan sheneýnikter áleýmettik jelige taraǵan osy vıdeodan keıin ózderiniń ókinetindikterin jetkizdi. 
Mahambet aýdany ákiminiń orynbasary Málik Amanov, «Óte manaǵyǵa ókinemiz endi. Osyndaı jaǵdaıǵa baryp, osylaı shyǵyp ketkenine. Men polısıaǵa sóılegende eshteńe aıtpaǵan sıaqtymyn. Men jańa suradym, ne úshin toqtatqanyn, toqtatyp turǵan kim ekenin suradym», dep aqtalǵan.
Áleýmettik jelige taraǵan vıdeo boıynsha Mahambet aýdandyq  jergilikti polısıa qyzmetiniń bastyǵy jaýap bermedi. Tilshilermen tildesýge qulyqsyz basshy «qoly bos emestigin» ǵana aıtty. Esesine, Oblystyq ishki ister departamenti qaramaǵyndaǵy qyzmetkerlerge qatysty tekserýdi bastap ketken. 
Atyraý oblystyq İİD baspasóz qyzmetiniń jetekshisi Gúlnaz Muhtarova «Bul fakti boıynsha İİD-niń ózindik qaýipsizdik basqarmasymen qyzmettik tekseris júrgizilip jatyr. Qosymsha aqparat tekseris qorytyndysy boıynsha beriletin bolady», dedi.
Al memlekettik nómiri joq kólikti toqtatyp, hattama toltyrǵan qatardaǵy jol polıseılerine qatysty qandaı jaza qoldanylǵany belgisiz.