«Altyn dombyra» aıtysynyń tóńireginde taýsylmaı jatqan daýǵa qatysty aqyn Qalıev Aıbek te óz pikirin bildirdi.

 «Eki-úsh kúnnen beri «Altyn dombyra» tóńiregindegi daý tolastar emes. Eki jaqty da túsinýge bolady. Men de eki ottyń arasynda ekiudaı sezimde qaldym. Muxtarjannyń dombyrany alǵanyna qanshalyqty qýansam, Aqbókenimniń almaǵanyna sonshalyqty qynjyldym. Áleýmettik jelide Muxtardyń atyna qanshama áńgimeler aıtylyp jatyr, jol shynymen de Bolatbektiki edi, biraq Muxtarda kiná joq qoı. Muxtarǵa jaqsylyq jasaımyn degen keıbir qazylar, kerisinshe kórermen jurtty oǵan qarsy qoıyp qıanat jasap qoıǵan sıaqty. Muxtar da, Bolatbek te meniń eń jaqyn aralasatyn, týǵanymdaı bolyp ketken baýyrlarym. Ekeýi de pendeshilikten joǵary turǵan azamattar. Aqyn degen bir aýyz jyly sózge marqaıyp qalatyn, bir aýyz sýyq sózge júregi aýyratyn jandar ǵoı. Sondyqtan da eki dúldúlimizdiń arasyna kirbiń túsirip, jandaryn jaralap almaıyqshy, aǵaıyn! Qazirgi aıtysta shappa-shap aıtysta, sýyryp-salmalyqta Muxtardyń aldyna túsetin, jyrynyń kórkemdigi jaǵynan Aqbókennen ozatyn aqyn joq. Ekeýi de basy men bolyp aıtys aqyndary tarapynan moıyndalyp qoıǵan. Eldi birlikke shaqyratyn «Altyn dombyra» aıtysy osylaısha el arasyna iritki salatyn bolsa, endi ótkizbeı-aq qoıý kerek shyǵar», - dep jazǵan aqyn jelidegi paraqshasynda.

Aıta keter bolsaq, jeltoqsannyń 3-4-i kúnderi Almatydaǵy Respýblıka saraıynda el táýelsizdiginiń 25 jyldyǵyna arnalǵan «Jasampazdyqtyń 25 jyly» atty aıtys ótti. Aıtystyń bas júldesi «Altyn dombyrany» Muhtar Nıazov ekinshi ret aldy.  Ol tipti keleshekte «Altyn dombyrany» taǵy da ıelengisi keletinin aıtqan.

Eske salsaq, ótken aıtystyń júlde berer sátinde halyq bas júldeniń berilýine narazy bolyp, «Bolatbek» dep aıǵaılap turyp alǵan edi. Halyqty Almaty ákimi Baýyrjan Baıbektiń ózi «sabyrǵa shaqyrǵan» bolatyn. Soǵan qaramastan qoǵamda aıtystyń ádildigi týraly alýan pikir týyndap jatyr.