«Elimizdegi memlekettik qyzmet salasyndaǵy reformalar búginde álemniń kóptegen elderiniń qyzyǵýshylyǵyn týdyrýda. Bul týraly búgin QR Memlekettik qyzmet isteri agenttiginiń tóraǵasy Álıhan Baımenov Taıland Koróldiginiń Memlekettik qyzmet jónindegi komısıa ofısi Bas hatshysynyń orynbasary Vısoot Prasıtsırıvongsemen kezdesý barysynda aıtty.«Elimizdegi memlekettik qyzmet salasyndaǵy reformalar búginde álemniń kóptegen elderiniń qyzyǵýshylyǵyn týdyrýda».

"Qazaq úni" gazetinen

Maqtansań qazaq, osylaı maqtan!

Álıhan Báımenovtyń aıtyp otyrǵanyna qaraǵanda, memlekettik qyzmet salasyna reformalar jasaýda bizdiń Qazaqstan – álemdegi teńdesi joq ozyq elderdiń biri kórinedi. Buǵan senesiń be, senbeısiń be?..

...Áli esimde, 1990 jyly sol kezdegi elimizdegi marqum Batyrhan Dárimbet ekeýmiz shyǵaryp jatqan tuńǵysh táýelsiz saıası basylym – «Azat» gazetine jazǵan bir maqalamnyń taqyrybyn: «Álemdegi eń maqtanshaq el – bizdiń Keńes Odaǵy bolýy múmkin» dep qoıǵanym. Shynynda da, ómirdiń qaı jaǵynan alyp qaraǵanda da Keńes Odaǵy shekten shyqqan maqtanshaq el edi!

Sodan beri arada kózdi ashyp-jumǵansha  shırek ǵasyrǵa jýyq ýaqyt ta zymyrap óte shyǵypty!  Álgi «maqtanshaq el» - Keńes odaǵy kelmeske ketti! Keńes Odaǵynyń quramyndaǵy memleketterdiń eń sońy bolyp, Qazaqstan ázer degende táýelsiz memleket boldy!

Sol kelmeske ketken Keńes ımperıasynyń quramynda 15 odaqtas respýblıkalardyń bolǵany belgili. Búginderi sol «on bestiń» deni óz aldyna jeke táýelsiz memleket! Áli kózderi bozaryp, táýelsizdikterin ańsap otyrǵan olardyń bodandaǵylary qanshama? Bul – óz aldyna bólek áńgime.

Al, endi  «maqtanshaqtyq» jónindegi áńgimeme qaıta oralaıyn!

Meniń keshegi kelmeske ketken Keńes Odaǵyn «maqtanshaq» el dep júrgenim beker bolyp shyqty. Olaı deıtinim, maqtanshaqtyq jóninen ol Keńes Odaǵy myna bizdiń Qazaqstannyń janynda jip ıire almaı qalady eken.

Oǵan dálel, joǵaryda sózinen úzindi keltirip otyrǵan Álıhan Báımenovtyń aıtqandary.

Álıhansha aıtqanda, Qazaqstan memlekettik qyzmetke reformalar jasaýda álemdegi aldyńǵy qatarly memleket sanalsa, ana 5 myń jyldyq tarıhy bar Qytaı memleketi, 300 jylǵa jýyq tarıhy bar AQSH, sondaı-aq, kezinde jarty álemdi bılegen Anglıa, Fransıa, Germanıa, Italıa, t.b. memleketter memlekettik qyzmetke reformalar jasamaı, búginge deıin aýyzdaryn ashyp, aıǵa qarap, shoshqa taǵalap kelgen be, sonda?

Olar búginge deıin Qazaqstan degen memleket bolmasa, onyń reformatory Álıhan Báımenovi bolmasa, kórgen kúnderi qarań eken ǵoı?..

Bizdiń Qazaqstan bıligi qasıetti Arqada az ýaqyttyń ishinde aty joq astanasyn salýyn, orystarmen birigip, Qazaqstanda tuńǵysh ret ATOM elektor stansasy qurylysyn bastaǵysy kelgenin, ana muhıttyń arǵy jaǵyndaǵy Kanadadan asyl tuqymdy buqalardy ushaqpen jetkizýin, tipti, Arqadaǵy jabaıy qaraquıryqtardyń «Eýrazıalyq ekonomıkalyq odaqqa» múshe bolǵaly beri kúrt ósip ketýin («Qazaqstan»  telarnasy, «Tańsholpan» baǵdarlamasy), t.b.  álemdegi teńdesi joq jańalyqqa jatqyzǵanda, aýzyń ashylyp, kóziń jumylyp qalady eken. Mine, naǵyz maqtanshaq memlekettiń kim ekenine endi kóziń jetken shyǵar...

«Habar» men «Qazaqstan» telearnasyn qarasań, bizdiń Qazaqstan ómirdiń qaı qyrynan da álemdegi «eń ozyq el» ekenine eriksiz kóziń jetedi.

Iá, Qazaqstan bıliginiń shekten shyqqan maqtanshaqtyǵy kún ótken saıyn shekten shyǵyp barady.

Jumash KÓKBÓRİ,

10.07.2014 jyl.