Bul oqıǵa ózimizdiń kórshiles Ózbekstanda bolǵan. Ómirde bolǵan, estigen oqıǵamdy aıtyp otyrmyn. Eki jas neke qıyp, úılenedi. Olar keıbir otbasylar sekildi aralarynda bala bolmaı, birneshe jyl kútpeıdi, óz ýaqytynda áıeli bir qyz bosanady. Kelesisinde taǵy bir qyz týady. Aqymaq kúıeýi qyz týa berdiń degen syltaýmen, áıelin eki qyzymen birge kóshege qýyp shyǵady. Áýel basta ul bolady dep, ózin qatty sendirip qoıǵan-aý.
Sodan áıeli baıǵus qaıtsin, birin jetektep, birin qushaǵyna qysyp, eki qyzyn alyp, basy aýǵan jaqqa kete barady. Basynda óz jurty az-kem kómektesken bolar, biraq qyzdary eńbekteı bastaǵannan-aq, ana baıǵus eki qyzdyń qamyn oılap, jumys isteı bastaıdy. Jumys tańdaýǵa shama joq. Tabylǵanyn isteıdi. Ne kórmedi deısiz? Aýyr bolsa da, qandaı jumys bolsa da, bala bolashaǵynyń qamy úshin bárine de kóndi. Úmitiniń aqtalǵany bolar, qyzdary mektepti úzdik bitirip, joǵary oqý oryndaryna tegin tústi. Ekeýi de dárigerlik mamandyqty tańdady. Oqýyn aıaqtaǵan soń, aýrýhanaǵa jumysqa turyp, óz salasynyń úzdigi retinde kózge túse bastady. Qyzmetteri de joǵarylaı berdi. Bireýi bas dárigerlikke deıin kóteriledi.
Al, bul kezde aqymaq áke basqa bireýge úılenedi. Álgi beıbaqqa ul bala súıý buıyrmapty. Ekinshisiniń de tapqany óńsheń qyz bolady. Tórt ret qursaq kóterip, tórteýinde de qyz bosanady.
Eki qyzdyń anasy kóp qıynshylyq kórdi dedik. Kóp ýaqyt kóshe sypyrýshy bolyp jumys istedi. Páterden páterge kóship júrgende, ýaqyty kelip úkimetten úı alady. Qyzdaryn adal, arly bolýǵa tárbıeleıdi.
Eki qyz boıjetip, birshama jasqa kelgende, qatygez ákeleri de birqalypta tursyn ba? Ol da qartaıady. Bir kúni kenetten júrek talmasyna ushyrap aýrýhanaǵa túsedi. Muny estigen burynǵy áıeli eki qyzyna ol kisiniń ákeleri ekenin eskertedi. «Sen bizdi tastap ketkensiń» degen sóz aıtpaı, qyzdary álgi kisige jaqsylap qaraıdy. Sol kezdegi ákeleriniń ókinishin aıtsańyzshy. Eńirep jylap, qyzdarynan áli kúnge deıin keshirim suraıdy deıdi.
Iá, pende bul ómirde neniń qaıyrly, neniń qaıyrsyz ekenin bilmeı jatady. Qyz degen janashyr halyq. Jaqsylyqty kórgende qyzdan kóresiń degen úlken kisilerdiń sózi tegin emes-aý.
Muslim.kz saıtynan alyndy
Nurqanat Baızaq
