«Assalaýmaǵaleıkým, halqymyzdyń mańdaıyna bitken qos juldyzy!»

Qolyma qalam alyp,  aldymda jatqan aq qaǵazǵa osy bir sóılemdi jazǵanyma tup-týra eki saǵat boldy. Osydan soń hatymdy qalaı jalǵastyrarymdy bilmeı áli otyrmyn. Oıyma qaıta-qaıta keshe keshtegi dostardyń bas qosýy túse beredi.

– Seniń tabynyp júrgen eki Muhtar atańnyń da  pikir alaýyzdyǵy bar eken ǵoı, –  dedi meniń «Dáýir dastany» men «Ulytsyzdaný uranyn» jatqa aıtatynymdy jaqsy biletin dosym Janarbek maǵan tıise sóılep.

– Joq, olaı deme, tek Shyńǵysqan jónindegi pikirleri bir jerden shyqpaıdy deseń durys bolady,–deımin men onyń sózine túzetý jasap.

–  «Jarmaq» romanyn oqyǵan bolarsyń?

–  Ia, eki qaıtara oqyp shyqtym.

– Kókiregi oıaý adam sol kitaptan-aq baıqar, úlken atalarymyzdyń alaýyzdyǵy qandaı ekendigin,– deıdi Janarbek renjigen beınede.

– Joq, olaı emes, ol bir ádebı shyǵarma ǵana, eshteńeni túsindirip bere almaıdy,– deımin men qarsylyq bildirip.

– Onda sen ǵalamtordan qazaq elindegi «Mádenıet» telearnasynyń «Kitaphana» atty baǵdarlamasyn kórgen shyǵarsyń, buǵan ne deısiń?– deıdi olda moıynsal bolmaı.

– Basqa talqylaıtyn másele joq pa? Eki Muhtar aǵada qazaqty jan-tánimen súıedi, ekeýi de "ár qazaqty – jalǵyzym " dep biledi, ekeýi de ár qazaq úshin et júregin sýyryp berýge daıyn!

 –  Boldy, dostarym daýlaspańdar! – dedi qashanda eshkimniń kóńilin aýyrtqysy kelmeıtin Baqyt.

– Olaı emes,– dep Aıdyn da sózge arlasty. – Eki Muhtarda qazir derbes adam emes, ekeýi de búkil qazaqtyń Muhtary, tipty búkil adamzattyń Muhtary. Olar osyndaı asqaq tulǵa. Sondyqtan, óz basym eki Muhtar zamanynda týǵanymdy maqtanysh etemin.

– Sen eki Muhtardy qanshalyqty qorǵashtaǵanyńmen bizdiń kóńilimizde sheshimin tappaǵan bir kúdik qaldy, buny kim túsindirip beredi?– dep Qadyr da maǵan qarsy «shabýylǵa» ótti.

 Bir sát tynyshtyq ornady. Jaýap kútken qara kózder maǵan qadaldy. Ne aıtarymdy bilmeı ábirjyp qaldym. Az únsizdikten keıin:

– Onda men eki Muhtarǵa hat jazyp, olardy úıime shaqyraıyn, aqsarbas soıyp, astylaryna at mingizeıin.  Sol dastarqanda eki Muhtar senderdiń kóńilderińdegi túıinshekti sheship bersin,– dedim men basqa sóz taba almaı.

Qarańǵy tún. Jarqyraǵan elektr shyraǵynda, baǵana jazǵan bir sóılem sózime áli qarap otyrmyn. Kenet kitap bólmemniń esigi ashylyp áıelim keldi.

– Ne jazyp otyrsyń? Kesh bolyp ketti, jatsańshy.

Men úndemedim. Ol meniń aldymdaǵy qaǵazǵa úńildi de sózin jalǵady:

– Oı, sen rasymen eki Muhtar aǵaǵa hat jazyp, úıge shaqyrǵaly otyrsyń ba? Bireýi ata jurtta, bireýi Eýropada, al sen Qytaıdasyń. Onyń ústine, ol kisiler – uly adamdar, al sen – qarapaıym qazaqsyń. Munyńdy eshkim bilmesin, kúlkige qalasyń.

Hat jazbaqshy bolǵan qaǵazymdy jyrtyp-jyrtyp tastadym. Biraq, áńgimesi jarasqan eki Muhtar aǵanyń bizdiń úıde qonaq bolyp otyrǵan beıneleri  men olardy qumarta tyńdap otyrǵan dostarymnyń máz bolǵan beınesi kókeıimnen keter emes.

Shalqar Qanátbekuly 

QHR.