Qazaq poezıasy taǵy bir aýyr qazaǵa ushyrady. 25 qańtar kúni Qytaıdaǵy qandastarymyz arasyndaǵy tanymal aqyn, qabyrǵaly qalamger Zadaqan Myńbaı ómirden ótti.
Zadaqan Myńbaıulyn – Qazaq poezıasynyń, qazaq óneriniń atany, qazaq ádebıetiniń, qazaq qara óleńiniń júgin kótergen atany. Zadahannyń qaıtys bolýymen Shyńjań qazaq ádebıetiniń, XX ǵasyrdyń sońynda kelgen poezıanyń bir dáýiri aıaqtaldy. Ol poezıasynyń bir kezeńiniń basty ókili edi. Ózindik bıigi, aıryqsha lırıkalyq saryny bolǵan.
Zadaqan Myńbaı ómirge eki ret kelgen, eki ret ómir súrgen adam. Ol saryýyz balapan kezde on alty, on jeti jasynda "qazaq kúzetshi "uıymynyń múshesi dep aıyptalyp 50-jyldardyń sońynda barsa kelmeske - Tarymǵa aıdalǵan. Jannyń siriligimen, shoı tabandylyǵymen, ómirge degen qushtarlyǵymen sol Tarymnyń ózinde ot basyn quryp ósip-ónip kóktedi. Ondaǵy onyń armany Tarbaǵataıǵa, Atamekenge, Qulystaıǵa aman oralý ǵana bolǵan edi. Tarymǵa barǵan 3000-nan astam bozdaqtyń aman qaıtqan 700 adamnyń ishindegi bireýi Zadaqan edi. Qaıtqannan keıin mańdaıyna tas tıgen, júregi shaılyqqan, ómirde maqsat murattan qaımyqqan Zadaqan emes. Qaıta túlep dúr silkintken qazaq ádebıetine Zadaqannyń poezıasy, Zadaqannyń shyǵarmalary degen úlken qomaqty dúnıeler qaldyrdy.
Eı, otynshy qyrshyn taldy qımashy,
Jup torǵaıdy úrkitpeshi qýmashy.
Jasty qısań qýaryp jer qushady,
Jupty qýsań eki aırylyp ushady. .
Men de solaı qyrshynymnan qıylǵam,
Men de solaı aıyrylǵanmyn jubymnan...
– Dep bastap edi qaıta oralǵanda óleńdi.
Zadahan Myńbaı áıgili jazýshy Qajyǵumar Shabdanulymen Tarym lagerinde birge bolǵan. Qolqanaty, tileýlesi bolǵan adam. Qylmys romanyndaǵy Zaryqbek deıtin aqyn keıipkerdiń prototıpti Zadahan Myńbaıuly edi.
Zadaqan Myńbaı 1939 jyly QHR, SHUAR, Tarbaǵataı aımaǵy, Dórbiljin aýdany, Qarakemel aýylynda ómirge kelgen. 1955 jyly baıyrǵy Shyńjań ınstıtýtynyń til ádebıet fakúltetine oqýǵa túsken.
Jas aqyn alǵash ataqty kompozıtor Málik Júnisuly mýzykasyn jazyp taratqan, «Elektr» áni arqyly elge tanylǵan. 1960- 1980 jyldary solaqaı saıasattyń kesirinen qaqpaı kórip, baspasóz quqynan aırylǵan. «Kókeıtesti» atty óleń-dastandar jınaǵy, «Mahabbat qurbandary» atty dastany (birlespe jınaq) «Betpe-bet» atty óleńder jınaǵy, «Dala zańy» atty dastandar jınaǵy baspadan shyqqan. «Betpe-bet» Jańa dáýir ádebıeti úzdik shyǵarma syılyǵyna, «Dala zańy» Qytaı az ulttar ádebıeti úzdik shyǵarmasy syılyǵyna ıe bolǵan. 1984 jyly «Altyn qanat» balladasy Shyńjań uıǵyr avtonomıaly ólkelik balalar ádebıeti syılyǵyn alǵan.
«Qamshy» portaly ujymy marqumnyń otbasyna qaıǵyryp kóńil aıtady.
