«Qamshy.kz» portalynda «AQYSYZ VIZA ÚSHİN 68 MYŃ TEŃGE TÓLEGEN QAZAQ ÁDİLDİKTİ «QAMSHYDAN» TAPTY» atty maqala jarıalanǵannan keıin, redaksıamyzǵa etnıkalyq qazaqtarǵa vızany tegin uzartýǵa qatysty saýaldarmen habarlasqandardyń sany artty.
Sondyqtan, «Qamshy» portaly vızany berý jáne uzartý Qazaqstan Respýblıkasy İshki ister mınıstrliginiń quzyretinde bolǵandyqtan qoǵam kókeıinde júrgen saýaldardy mınıstrlikke joldady.
Kóp kúttirtpeı jaýaby da keldi. Oǵan sáıkes, etnıkalyq qazaqtardyń Qazaqstan Respýblıkasynyń vızalaryn bergen, qalpyna keltirgen nemese uzartqan kezde baj tóleýden bosatylady dep tasqa tańba basqandaı kórsetilgen.
Iaǵnı, Qazaqstan Respýblıkasynyń salyq salý jáne kedendik ákimshelendirý máselelerine baılanysty ózgerister men tolyqtyrýlar engizý týraly Qazaqstan Respýblıkasynyń 2016 jylǵy 30 qarashadaǵy № 26-VI QR Zańynyń 544-1-babyna sáıkes Qazaqstan Respýblıkasynyń vızalaryn bergen, qalpyna keltirgen nemese uzartqan kezde memlekettik baj tóleýden etnıkalyq qazaqtar bosatylady. Osyndaı qyzmetter úshin etnıkalyq qazaqtar eshqandaı aqy tólemeıdi.
Vızany tegin uzartý úshin qolyńyzda qazaq ekenińizdi dáleldeıtin qujat bolýy qajet.
Kóshi-qon zańyn bilmestikpen vızany uzartýǵa tólenetin 68 myń teńge kólemindegi memlekettik bajdy tólep qoıǵan jaǵdaıda, qolma-qol nemese aýdarym arqyly tólem júrgizgen ekinshi deńgeıde bankke nemese bank operasıalarynyń jekelegen túrlerin júzege asyratyn uıymǵa jazbasha túrde aryzdanady dep jazylǵan hatta.
Buǵan deıin de biz Soltústik Qazaqstan oblysynyń kóshi-qon polısıasyna habarlasyp, vızany uzartýǵa tólengen qarjyny qalaı qaıtaryp alýǵa bolatyny bildik. Soltústik Qazaqstan oblysynyń aǵa ınspektory Rashıd Júsipbekov ol úshin kóshi-qon basqarmasyna baryp, «Túbirtek qoldanylmady» degen anyqtamany alyp, onymen salyq departamentine barýy qajet ekenin jáne sol kezde aqshasy qaıtarylyp beriletinin jetkizdi.
QR İshki ister mınıstrligine jáne kóshi-qon polısıasynyń bergen málimetine sáıkes etnıkalyq qazaqtar vızany tegin uzartady. Kóshi-qon basqarmasynda vızany uzartýǵa tólenetin 68 myń teńgeni suraýǵa eshqandaı quqyǵy joq. Eger atalmysh sommany tólep qoıǵan jaǵdaıda, qarjyńyzdy ońaı qaıtaryp ala alasyz.
Daıyndaǵan: Ásem Álmuhanbet
